By By qui Tang Tacio
Ang lagay kan LTO Virac
posted 2-Apr-2015  ·  
11,826 views  ·   1 comments  ·  

Lalo palan naderota an delegasyon nin Catanduanes sa Palarong Bicol 2015. Imbes na mamantenir man lamang an dating ranking na pang-anom, nagbaba pa sa pang-siyam. Pareho daa kan performance ni Gob Siliwong, pababa nang pababa, he! he! he!

Sabi kan mga opisyales, dae man nin problema sa gamit, uniform, sapatos o pagkaon. Bastante ngani daa an habhab na linuwag kan caterer sa Pili masque binabaan an contrata sa P250 cada tawo cada aldaw, imbes na P300. Bako man daang totoo na an mga pinagamit na mga sapatos y sports equipment mga luma na, y an laog kan bodega sa DepEd mga lumang sapatos na dae na puedeng gamiton.

Tangani daang presentable an satong mga atleta, pinaguntingan pa ngani daa ni Gob Siliwong an gabos sa mga trainees sa TESDA. Tibaad nabawasan an cusog kan satong mga Samson, ta ginuntingan ni Gob Delilah, he! he! he!

Helingon ta sa maabot na semana diyan sa palasyo ni Bise Bong, ta tibaad igua naman nin mga contrastistang bokal na magngalab-ngalab sa isyung ini, lalo na ta an sarong PBM dati nang nadangog na mahalangkaw an ranking kan Catanduanes ta magayon an suporta kan administrasyon.

*****

Nagbag-o na palan talaga an servicio diyan sa Lagay Transportation Office, an pinakapamosong oficina  diyan sa San Isidro Village, na ngonian mapano na nin mga holdaper na agencia de gobyerno, he! he! he! Pasensya an mga toltol na opisyales sa DPWH, PEO, DENR y BIR, he! he! he! Cabale pa dindi an CAAP, na iyo man an gibo sa mga motoristang ma-parking sa airport, he! he! he!

Ni sarong taga-isla, dae na diyan sa LTO Virac, kaya ngani daa mapaspas na an transaksyon ta dae nang milidbidan. Natural, kung nagrahay an servicio, nagtaas man an taripa, he! he! he!

Matao ka nin cincuenta o sanggatos sa pag-stencil kan engine asin body number duman sa security guard bilang sideline. Pagpa-inspection kan vehiculo, lalo na kung dae galudab an mga signal light o daeng speedometer cable, iguang dagdag bayad. Kung habo mo na ipa-inspection sa laog, bayad ka naman nin dae mababa sa dos cientos pesos, pangpiyong nin mata habang gafirma sa documento, he! he! he!

Sa pagcua nin lisensiya sa pagmanejo, lalo pang napadari tam as mahanglas daa ngonian, lalo na kung oolaan mo pa nin asayte. Sabi kan sarong ciudadano, nagkua daa siya nin eksamin para sa subprofessional driver’s license y sinabihan siya kan personaje na magbayad na sana nin nueve cientos para pasado na ora mismo dae pa ngani gadukot an tinta nin bolpen sa papel.Kung professional license daa, mil dos cientos pesos an taripa.

Ngonian, dae nagbayad si madam ta kulang an perac. An resulta, bagsak daa siya sa eksamin, segun sa personaje nin Lagay Transportation Office. Sabi daa ni bossing, magbalik ka na sana pakatapos nin tolong bulan para magkua otro nin eksamin. Halawig palan an review sa LTO exam, baging sa PRC, he! he! he!

Hinagad niya daa an resulta kan saiyang eksamin alagad dae na daa itinao ni ser ta bagsak na ngani. Iyan an lagay kan LTO Virac sa ngonian, magayon an servicio sa tamang presyo, daeng milidbidan, mabilis an resulta kan eksaminasyon ta kung daeng pahanglas, bagsak na pirmi, he! he! he!

*****

Gaarabot na an mga chicheria sa isla, masque sobra pang sarong taon an piyesta kan mga votante.

Kan nacaaguing semana, namasyar si senador TG Guingona ta visita ni alcalde Obet Fernandez kan Payo. Grabe sigurong proyecto an itinato caini sa banwaan. Dae pa naawat adyan si Cong Boyet Gonzales kan Mandaluyong City, tibaad magsenador man ini.

Sa mga local na mga aspirante, dati nang naenot si Bise Bong Teves y Larry “Uktoy” Que. Dinagdagan pa kan bus operator na si Jovel Lopez, na grabe na an pamidbid sa banwaan, magpoon sa mga caratula sa tricycle sagcod sa mga graduation y piyestahan.

Sisay pa daw an mabotwa magpoon sa Domingo de Ramos y sa mga maabot na aldaw nin semana santa, para magprosesyon, manaltag nin rosaryohan, pamaypay, mirindalan, dolce y iba pang pangaroy?

1 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Kung arog kaan ang sistema palan sa LTO milyonaryo na ang mga empleyado jan ha tbi qui tatasyocio? Ta mala si agom ko dai lamang pig-entertain ni Mr. Jerome maski sobra na 45minutos ning halat kan pagtoktok ni agom naghuramentado buda pinaapod so guard ninda ta pigapahali na si agom. Toltol na ugali an? Nasa gobyerno pa man daa....propesyunal pa man daa kung propesyunal man siya....ta garing dai nahiling sa ugali nya. You are very rude Mr. Jerome! Sobra busy pano ni Mr. Jerome masupog man!
by Michiko Kaori Shimizu 10-Apr-2015  ·  
Other Isip-isipon Ta articles
home home album photo album blogs blogs