By By qui Tang Tacio
Bantayan an mga panlaki
posted 10-Feb-2017  ·  
885 views  ·   0 comments  ·  

Magcapirang magurang an nagreclamo sa soboot daing tunong na viaje kan mga maestro sa pampublicong escuelahan.

Segun sa saenda, pirang vez na daang nagsabi an saendang mga aqui na daeng escuela ta malarga na naman ang saendang mga titser, ma-seminar o training sa ibong o kung saen. Sabi ngani daa kan ibang mga maestrang natada sa escuelahan, duwa o tolo na sana minsan an nahubon para mag-ataman kan mga aqui.

An iba ngani daang mga viajerang ini, naka-iskedyul na kung noarin naman mahari y harayo pa piga-tipunan na an panggastos minsan magkautang. An hapot kan mga reclamador na dae nakalani sa principal, ngata daa ta sige sanang rosnos kan mga awtoridad kan mga request for travel nin mga maestro kung mapabayaan man an saendang mga aqui.

Hapoton ta daw sa division duman sa oficina ni Superintendent Coray dela Rosa kung totoo man ini…

*****

Diyan palan daa sa Bigaa, tibaad makasuhan asin masipa an enterong consejo kung dae masimbag an kahapotan kan sarong kagawad.

Nag-file daa nin sick leave an kagawad ta mapabolong sa harayong lugar. Isinumitir an papeles sa secretaryo, na iyo man cotana an masumitir caini sa DILG.

Natapos an duwang bulan nin pabolong, nagvuelta na an honorable. Malang naubusan nan in cuarta na ginastos sa helang, natural hinanap an saiyang bonus kan Deciembre.

An simbag daa nin capitan, binarangabanga na daa kan consejo. An papeles man daa sa sick leave, nawara kan secretaryo y sagcod ngonian dae na nacocoa.

An hapot ngonian, pano nacobra kan mga kagawad an bonus kan saendang kairiba? Sisay daw an nagpirma para sa saiya?

Magayon caini, hanapon na ni kagawad an payroll kan bonus, ipa-xerox y papirmahon an tesorero na ini true copy, saka siya magsang-at nin kaso administratibo. Harimbawang makimaherak an mga tatamaan, hagadon na niya sana na iribod an bonus pero doble na, he! he! he!

*****

Kaaldawan na naman nin mga puso sa maabot na Martes.

Siguradong igua nang maselebrar nin advance ngonian na Sabado y Domingo, lalo na itong iguang mga trabaho o naguardyahan nin mga agom, he! he! he!

Kaya magbantay an mga agom na babaye kung saen mangahang an saendang mga tahodan na panlaqui. Sigurohon na kung mapabulangan, duman sinda sa gallera y pakatapos kan sultada maparibod, gana o daog. Kung dae ini mag-aparecer, tibaad aduman naman sa ibang rueda sa mga tagong bulangan, nakipulukan na sa mga dumaraga o bunakan na hababa an tambod, he! he! he!

Bantayan man an mga kaakian, lalo na an mga daraga y soltero ta tibaad madangdang na sa kalayo. Herak man kan mga magurang na grabe an sakripisyo makapadara sana nin pang-tuition, hahagadan pa nin dagdag na perac na soboot pambakal nin project alagad panglamyerda man sana sa VTC o kung saen pang gimikan. Pira nang mga estudyante an dae nakagraduar ta kung bakong naakian, nakabados nin kaklase.

An iba man na mga colegiala, nabibiktima kan saenda man sanang mga maestro o propesor na an utak nasa saday na payo. Igua ngani daa caidtong propesor na naabtan nin guardia na kalampungan an estudyante pakatapos kan Christmas party. Habang tinatawan daa nin regalo ni ser an maboot na estudyante, naheling daa kan sikyo. Alagad, minsan binabaan nan in batuta kan sikyo an nakahubang maestro, sige sana daa caini an ilaid sa hubal na tapayas, he! he! he!

Cotana, isipon man kan mga draculang ini sa escuelahan, colegio o unibersidad na sinda mga magurang man na iguang aqui, na an saendang nabibiktima gahengoha man makatapos tanganing makapaghanapbuhay sa maabot na panahon.

    Satong isipon na kung ano an ginibo mo sa kapwa, mabalik man sana saimo, marinas man o maraot. An bosong….    

0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs