By By qui Tang Tacio
Namasyar si Jorge y Cotipyo
posted 7 days ago  ·  
470 views  ·   0 comments  ·  

Siring sa dati, an satong mga parabayad nin buwis mahalat na naman na abutan nin deadline sa Abril 17.

Iyo na talaga ini an mga Pinoy, mahilig sa paburukudan pag oras na. Hahalaton ngona magsenyal numero tres bago pa mapreparar nin typhoon guard o manaraysaray nin gamit.

Kaya siguradong sa Lunes, maribong na naman an saendang mga daculang payo sa pila sa bangko y sa BIR duman sa kalipungawan kan San Isidro Village.

Dae nang maguinibo kung gamo an hanap kang mga taxpayers na ini. An importante, tama an pigabayad na buwis para sa gobyerno. Ta natiyempong Semana Santa, posibleng laogan man nin Espiritu Santo an mga ini para bawas-bawasan an daya, duru-dagdagan an gananciang ideclarar sa Income Tax Return.

An dae sana nakadaya na mga taxpayer iyo an mga naempleyo sa gobyerno y mga toltol na privadong companya, ta dati nang pigabawas an withholding tax bago pa man ninda makaptan an quincenas na suweldo.

An grabeng ventaje iyo an mga parasugal, ta an saendang ganancia sa bulang, pai-que, tong-it, madyong, pusoy, pusoy dos, cara cruz y iba pang sugal, dae man naheheling nin gobyerno.

Alagad mas dacul an natabag kan satong mga mahabas na politico. Por ejemplo, an congressman, gobernador o alcalde na mahilig sa porsiyento, milyon-milyon an nakua sa mga contratista y supplier. Advance na, tax-free pa, he! he! he!

Matonong sana ini kung dae na man magpabakal nin voto an gabos na votante. Ini an milagrong baguing dae pa mangyayari sa termino ni Presidente Digong.

*****

Iguang nag-arabot na mga politico sa isla.

Nag-atender sa grand alumni reunion kan Catanduanes Colleges si dating DICT Undersecretary Jorge Sarmiento, na soboot posibleng magcandidatong congressman sa paggraduar kabn saiyang tugang na si Cong Cesar sa 2019. Nagngalab-ngalab man daa ini duman sa Twin Rock nin huro-halawig, ga-praktis na siguro sa campanya, he! he! he!

Kasabay niya man kan nacaaguing semana si dating Congressman Cotipyo, na an familia nagguiromdom kan ika-treintang anibersaryo kan pagcagadan kan saendang padre de familia diyan sa Gogon. Saro man daa ini si Cotipyo na iguang planong bawion an saiyang dating tocawan sa Congreso. Sabi kan mga chismosong politico, igua pa siyang sobrang santaon para magbilang-bilang nin ipanaltag sa mga votante, he! he! he!

Ta dacul an nagpararibod na mga taga-isla hale sa Maynilang kayganda, sa abroad asin iba pang lugar, siguradong dacul man an maprusisyon sa manlaenlaen na banwa, lalo na sa Viernes Santo. Sigurado man na mapaheling an satong mga politico, gana man o daog, sa saendang mga haharyawon sa 2019. Babay duman, abrasa dindi, patara-tara sa mga kamidbid. Ano daw kung magsolsol man kan saendang mga kasalan sa publico (bako sanang si Nestor)?

*****

Nagrecibe nin fondo hale sa Performance Challenge Fund kan DILG an gobyerno provincial y an municipio nin Virac kan nacaaguing Lunes por sobre sa saendang panggana kan Seal of Good Local Governance.

Nakakua nin siete milyones pesos na fondo an capitolyo sa pangengenotan ni Gob Boboy Cua y tres milyones man sa administrasyon ni alcalde Sammy Laynes.

Ini premyo sa saendang magayon na pag-administrar kan banwaan, senyal sana na dae man nasala an mga votantes sa pagpili nin saendang lider kan sarong taon. Natural, dae man ninda ini makukua kung dae man nagtrabaho an mga nasa Sanggunian y an enterong mga empleyado.

Cotana arogon man kan ibang lideres sa isla an saendang ejemplo, lalo na an San Miguel y Caramoran na iyo daa an mga banwang kulang sa kamas-kamas sa termino kan saendang mga dating mayor.

    Sabi ngani ni DILG regional director Biet Pastor, igua pa nin oanahon an mga bagolbolon na mga jefe polirical na bagohon an saendang mga estilo tanganing manggana man sinda nin SGLG seal.

0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs