By By qui Tang Tacio
Kulang an gracia, kulang an tagama
posted 26-Feb-2018  ·  
1,504 views  ·   0 comments  ·  

Kapurit na naman palan ang Isla Maogma sa Palarong Bicol sa ikaduwang sunod na taon.

Talagang an arin man na maquina, kung kulang an gasolina, dae makaantos sa pupuntahan.

Iyo ini an numero unong problema kan capitolyo y DepEd Division Office kung karawat an paghororonan: an cuarta, perac, sinsilyo o panggastos.

Caidto kang panahon ni Manoy Jose Alberto, suak-suak an mga atleta asin coaches sa fondo, pagcaon, gamit asin allowances, igua pang papremyo sa cada medalya. Ngonian, an mga politico maarabot sana sa delegasyon kung mapoon na an karawat, an bitbit manangribo o caya mirindalan, sabay paposing para sa facebook, pwe!

An importante ngonian, hanapan nin paagui kan mga lideres, magpoon qui Gob Boboy Cua kung pinainano kan CamSur o Albay na mapondohan an minimum na treinta dias na training kan saendang ginatos na atleta, coaches buda trainors.

Kung caipuhan na bawasan an mga proyectong semento sa 20% Economic Development Fund tanganing magcaigua ning dies milyones na fondo an mga atleta, mas magayon. Bawas-bawasan man an deligencia sa uniform, sapatos, bola, net, pati na an ibang gamit. Dae man ngona magsimit sa ganancia kan caterer, tanganing tunay an basog kan mga gurotom na atleta.

Ano daw kung macatuwang man nin golpe an satong congressman, bako sanang mga proyectong bato o semento na isi kan gabos na iyo an minatao nin gracia sa saiya?

*****

Nangangapudan an Simbahan na Catolica sa mga paratubod na cotana magtagama man nin magcacanigong tabang para sa mga tugang nindang pobre o caya nasa krisis por dahel sa calamidad.

Segun sa Caritas Virac, an saendang pakimaherak sa gabos na bako sanang sinsilyong tada sa bulsa o pitaka an idulot sa Alay Kapwa program kan Simbahan ngonian na Cuaresma sa cada second collection.

Duro-dagdagan man lamang daa, itong tunay nang tagama para sa mga kahimanwang plus na dae.

Satong guiromdomon na an gabos na biyayang satong nareresibi sa kinaban na ini, gabos iyan hale sa Mahal na Diyos. Satong ihiras an mga biyayang ini nsa mga tugang tang nagtitios tanganing lalo pang magdacul an natabangan kan Kagurangnan.

*****

Makaabot lamang sa kalangitan an baretang iguang mga tawong napaso an angog sa pagkahang nin venditadong abo kan Miercoles de Ceniza.

Segun sa mga bareta, an dahelan kan pagkapaso kan mga angog nin mga parasimba sa San Roque Cathedral sa Caloocan City iyo an soboot sobrang pagkaluto kan abo na naging acidic.

Sayang na mga ordinaryong tawong mga mandiliitdiit an kasalan an nagpasimbahan kan aldaw na ito. Cotana an enterong miembros kan House of Representatives, mga elegidong politico, pati na an mga taga-Customs y iba pang mga maanomalyang agencia de gobyerno an nagpunta duman para maduhitan nin abo. Tibaad cotana nagkaratabkatab an saendang payo sa kagabatan kan saendang mga kasalan, he! he! he!

*****

    Duwang daculang actividad an gigibohon sa Virac ngonian na Viernes.

    Iguang pagtiripon sa proponidong federalismo diyan sa CSU auditorium y an nangimbitar iyo si Cong Cesar y Atorni Jorge.

    Pagkahapon iyo man an paripa ni alcalde Samuel Laynes nin Virac y alcalde Edwin Hamor kan Casiguran, Sorsogon. Inda sana kung anong anghel an naglaog sa duwang ini ta manaltag nin  25 na motorsiklo, 350 electric fan y 300 rice cooker sa mga matucal nin tolong boteng 1.5 liter na pano nin plastic na basura sa cada tiket.

    Saarin man daw mahiras an iba pang politico sa isla na isi nin gabos na pirming nakaguda sa honasan y baybayon, pati na sa kabukidan?

0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs