By By qui Tang Tacio
Magcaon nan in Sinandomeng an mga pobre
posted 4-Mar-2018  ·  
1,464 views  ·   0 comments  ·  

Pasensya an mga dae nanggana sa paripa ni Mayor Boboy Hamor kang Casiguran, Sorsogon. Igua pa daang pa-raffle sa otro taon, doble na an mga premyo.

An gusto daa kang maperac na alcalde, dae nang itukal na boteng pano ning basurang plastic. Alagad, gusto ining ipadagos ni alcalde Samuel por sobre ta nabawasan an basurang cotana magalataw-lataw sa dagat o makaati sa paribot.

An labing sanggatos mil na botelya gigibohon na kudal sa escuelahan buda day care center. Pigapagibo man kan alcalde an mga ingeniero sa municipio na magdisenyo nin core shelter housing na an gagamiton na lanob mga bote nin plastic.

Cotana bako sanang tukal sa tiket an gibohon sa mga boteng ini. Ano daw kung tugotan kan municipio na ipanukal an mga 1.5-liter na botelya nin plastic sa amilyar o taon-taon na bayadan sa daga? Harimbawang mamiso an cada botelyang pano nin basura, caipuhan mnakaamot kan nin tres cientos na bote para pambayad sa real property tax kan saday mong daga. Depende na siguro sa pag-aadal kan tesoreria pati na an mga honorableng consejal kung puedeng uno cincuenta an cada bote o halangkaw pa.

*****

Kung diyan sa Salvacion sa kahadean ni Samuel an kurahaw “Salbaron an Baybayon,” diyan daa sa teritoryo ni Kap Choy sa Sta. Cruz, “Salbaron an Barangay Hall.”

Maguiromdoman na nagaba an parte kang boulevard diyan sa tampad kan barangay hall dae pa sana naawat. Gahak na an irarom kang kahalabaan kang boulevard of broken dreams. Ma-apat nang decada ining gatindog diyan sa may baybayon, an parte ngani magpoon Rawis hanggan Sta. Cruz nagaba kang suoy ni typhoon Sisang kan 1985.

Harimbawang iyo na ini an trabahuhan kan DPWH para sa ciento cincuenta milyones pesos na Phase 2 kang proyectong widening ni Cong Cesar, siguradong mawara na an diit na baybayon na natada sa Sta. Cruz. Magigi na ininmg banwitan aldaw-banggui, an mga parasira kung aldaw, an mga lalaki asin babayi kung banggui, he! he! he!

*****

Sa ngonian na aldaw, ubos na siguro an bagas sa bodega kang NFA diyan sa San Isidro Village.

Naubos na an dose mil na sakong ultimong deliber kang agencia hare sa Vietnam. Ang masunod sa Hunyo pa daa maabot ta ngonian pa sana nagkamas-kamas an mga tawo ni Tatay Digong.

Sa sakong pagheling, an desisyon na bawasan an importasyon ning bagas sa Vietnam o saen pa man parte kang plano nin gobyerno na hareon na an subsidy sa bagas, tanganing an gabos na tawo kaonon na an bagas na hare sa mga local na paraoma, minsan mas mahal an pabakal sa Mercado (bakong si Orly).

Bago siguro matapos an anom na taon na estar ni Pay Digong sa Malacanang, itunaw na an NFA ta bahala na an mga negociante mag-import nin bagas sa luwas kan Pilipinas. Magpatood-tood na sa commercial na bagas an mga pobreng nagsuporta sa campanya ni Duterte.

*****

Iinvestigaran palan kan Kongreso, cabale na siempre si Cong Cesar, an soboot anomalia sa quarry sa mga provincia, cabale siempre an Catanduanes.

Segun sa bareta, dacul nang mga distrito kan DPWH y mga contratista sa mga provincia ang gareklamo sa taripang pigakolekta kan mga capitolyo, pati na an dae pagtao ning quarry permit sa mga suwail na quarry operator o mga contractor.

Maguiromdoman na nagpoon an pagcolecta nin taripa ning capitolyo kan panahon ni Gob Dayunyor. Veinte cinto pesos cada metro cubico an quarry tax alagad pinatungan nin nin sanggatos para pambawi sa pagbakal nin voto.

    Siring na an nangyari sa mga nagsurunod na  administrasyon, kung minsan  ngani nagiging kolektor pa an DPWH. Natural mabawasan an ganancia ning congressman y kung habo magbayad an contratista niya, dae pa tatawan nin quarry permit. Iyo na ini an arayotan….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs