By By qui Tang Tacio
Dagdag na negocio para sa Dificelco
posted 11-Mar-2018  ·  
1,487 views  ·   0 comments  ·  

Kung kamo marigmat an mata kung naglalakaw-lakaw sa sentro kan Virac, makareparo kamo nin mga goslab na gaharalat diyan sa gilig kan White House. An mga gurang na ini nakapila sa Izumi Wellness Center, sarong establisimiento na soboot gapainom nin milagrosong tubig habang an saendang mga lobot pigakuryente, he! he! he!

An teknolohiyang ini hari daa sa mga Hapon y an tubig, na inaapod na Antioxidant Alkaline Water iyo an pigarig-ok ni Shigechiyo Izumi, an saro sa mga pinakagurang na tawo sa kinab-an bago ini natigbak kan 1986.

Dakul na daang nabenepisyohan an Izumi magpoon na ini ibogtak diyan sa San Jose: nagregla an awat nang dae pigadugo, nakakapot nan in tagay nin Ginebra an parainom na nagtaragas an kamot, nawara an mga kulog sa tuhod kan rayumahon na ingeniero, y an cadaclan soboot marinas an pagmate pakatapos kan sesyon nin panguryente.

Libre daa an pagpakuryente, alagad iguang bayad an tubig. Dae siguro maaser an kuryente kung dae man mainom an pasyente.

Ini an sabi sa website kan Izumi: “While during the treatment, you feel like have taken a refreshing walk in a beautiful forest.The negative ions generated by negative high potential electrostatic fields can activate the ATP enzyme of the cell membrane. The generation and increase of ATP enzyme improve the selectivity and permeability of the ion of inner and outer cells, stimulate the energy of the cells, accelerate metabolism, delay organic aging, and help various metabolic diseases, such as diabetes and high blood.”

Entonces, dae ta nasabotan an siyensiya caini.

Pilang taon an nakaagui, nagpatanid an Food and Drug Administration sa soboot "false, deceptive and misleading" na mga promosyon sa "Izumi 5P Antioxidant Alkaline Water Ionizer."

"Drinking alkaline water or ionized water does not change the blood pH level or remove every known chronic disease condition. There are no scientific and clinical studies that would support or back-up its health and therapeutic claims,” segun sa amok an FDA na si Kenneth Hartigan-Go.

An produkto daa dae rehistrado sa FDA y an Izumi website gabalangibog nin "deceitful health and therapeutic claims."

Inda kung ano nang nangyari sa aviso kan FDA. Tibaad nakarehistro na o caya nagtao nin evidencia an Izumi kan marinas na beneficio kan tubig.

Ngonian, sabi kan sarong goslab na nakanamit na kan Izumi, pareho man sana daa ini kan Pyro-Energen Electrostatic Therapy Machine na nagluwas caidto y ipinabakal sa halagang sobrang sisenta mil pesos. An pagparibot daa sa ginhawa nin special electric field gamit an static electricity nakabolong nin kanser asin iba pang helang.

Bahala na an mga parokyano kan Izumi kung padagos an saendang pagpakuryenta boda an pag-inom nin alkaline na tubig. Kung sa paaguing ini, marinas an saendang pagmati, nasa saenda man yan.

An marinas caini, mag-aplay man nin prangkisa sa Izumi an Dificelco, ta makalamang ini ta libre an kuryente, he! he! he!

Gabos na mga collection center, kanghan kan gamit panguryente habang gapila an mga consumidor sa pagbayad. Puede man kanghan an conference room kan mga director lalo na an saendang mga tocawan, tanganing maayad an mga direktor na iguang kanser sa bulsa, he! he! he!

*****

    Maabot palan daa si DOJ Secretary Vitaliano Aguirre II para maging huespe de honor sa pagbungkal nin daga sa magiging edificio kan Prosecution Office sa Virac.

    Magayon na maisihan ta sa kaklase ni Pay Digong kung inano na an buhok caini y kung ano nang nangyari sa kaso kan shabu laboratory. Lampas nang santaon an nacaagui, dae pang kaso sinakat sa korte. Golpe na lamang gastos sa pagbantay kan mga pulis veinte cuatro oras sa Palta Saday...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs