By By qui Tang Tacio
Makabayad na ning utang an mga nadanyosan
posted 25-Mar-2018  ·  
1,590 views  ·   0 comments  ·  

Dae na daa maawat tibaad maglubog na an banwaan nin Bato.

Sabi nin sarong chismoso, pagkadinakul daa ngonian nin mga proyectong pasemento sa kahadean ni alcalde Leo kaya magabat na daa an daga nin Bato, he! he! he!

Clarohon ta sana na bako man fondo nin municipio an gamit dindi, kundi sa DPWH o kaya sa capitolyo. Nunca man daa anas ini patrabaho kan ER Construction. Siring man, bako man daa totoo an osipon na adyan na gaopisina an dating district engineer kan DPWH matapos ining haleon sa puesto.

Masuerte sana talaga an administrasyon ni Mayor Eulogio ta golpi an fondong nakabuag sa saiyang mahal na banwaan.

Lo mismo ngani daang si alcalde an nakareparo na igua palan nin proyecto an DPWH duman sa dalan papunta sa putol na lumang tulay ning Bato. Kung ngata ta an widening project na ini duman ikinahang sa bihira na nganing agihan na dalan, an gapatrabahong agencia sana siguro an nakaisi.

Hapoton ta daw an mga opisyales sa DPWH y PEO kung ano talaga an rason. Tibaad gibohon tourist spot an putol na tulay, luksuhan nin mga bakasyonistang gustong maglataw-lataw sa Bato river, he! he! he! 

*****

Sa mga reclamador na nadanyosan ni typhoon Nina kan Deciembre 25, 2016, nasimbag na tabi an saen dong hapot.

Segun sa DSWD, kinua na kan capitolyo an tseke kan fondong tagama sa mga residents kan partially damaged houses.

Hinalat ngona daang maitao gabos an veinte cinco mil pesos na ayuda sa mga tawong enteronbg nagaba an mga harong.

Tibaad daa ngonian o sa masunod na semana idistribuir an diez mil pesos cada beneficiario depende na sa schedule kan mataltag.

Caya puede niyo na pakimahelakan an mga inutangan ninyo nin cuarta para pambakal nin yero, tiklad, pako, kahoy asin iba pa. Harimbawang iniwal kamo kan saendong inutangan na inabot nin santaon an bayad, maghagad nin dispensa y dae pagtamparingon nin manangribo.

*****

Rinibo na naman na estudyante sa colegio an magraduar ngonian na semana sa CSU asin iba pang halangkaw na escuelahan.

Natural maogma an gabos, lalo na an mga pagar-pagar nang mga magurang na tatawan nin diploma kan saendang mga aqui. Harimbawang, bako sanang diploma kundi marriage certificate pati birth certificate an itao kan aqui, magpasalamat man siempre ta nadagdagan an saendong familia nin macuapok, lalo na kung an ama mahigos man sa trabaho.

Dapat na pangadalan man siempre an mga nag-graduar na ini an diploma bakong pruweba kan saendang kakayahan magtrabaho sa privado o gobyerno. Mga letra y pirma sana an adyan. An caipuhan kan lalaogan na oficina iyo an laog kan payo kan aplikante pati na an atitud niya sa pagtrabaho. Natural, an mga nagbulakbol sa enterong walo o sampulong semestre, iyo an lugi. Hagadi na sana si Pay mo nin pambakal nin traysikel…

*****

Herac man kan nakasuhan na kagtawo sa daga na tinogdokan kan shabu lab sa Palta Saday.

Sa gabos na nakasuhan kan DOJ kan nacaaguing semana, siya sana an pinaka-dae.

Duwang kaso nin possession of dangerous drugs y sarong kaso nin manufacture of dangerous drugs an isinampa kontra ki Lorenzo Piñera II asin pag-iribang Intsik.

Ang problema, nakadulag na o kaya posibleng nadispatsa na an grupo ni Paolo Uy, kaya an bantay sa farm an makukulong nin daeng piyansa kaibahan an NBI agent na si Eric Isidoro.

Alagad, dae pa man daa nawaran nin pag-asa an akusado pati na an familia caini. Sabi ngani kan sarong taon kan magcapirang opisyal na konektado sa imbestigasyon, maluya an evidencia y tibaad ibasura man sana kan juez pakatapos kan ralaban sa Corte.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs