By By qui Tang Tacio
Prusisyon na daeng musikero, paradang daeng banda
posted 1-Apr-2018  ·  
1,516 views  ·   0 comments  ·  

Igua na palan ning bag-iong estilo ngonian sa prusisyon sa Semana Santa.

Segun sa mga chismoso, an napaghoronan daa kan Simbahan pati an mga cagsadiri nin mga carosa, dae na makahang nin musikero tanganing malugaran an mga para-prusisyon na magrosaryo y maghurop-hurop kan inaguihan ni Kristo.

Caya kan Domingo, enot na aldaw nin prusisyon, cotana silencio an lakaw kan mga tawo ta an madangog sana lapanak nin sapatos o sandal sa semento pati na an orapronobis nin mga paradasal. Alagad igua daang nagreclamo ta dae siguro nacaisi, caya tinugotan na magkahang nin musiko sa enotan pati sa rikod.

Igua man nin marhay rason an mga nakaisip caini, minsan masakit isipon an prusisyon na daeng tugtog o paradang daeng banda. Ika man daw an magpasay nin maluto na daeng sila, he! he! he!

Sa pagkadinacul na nin tawo sa islang ini, nawara na an orden sa prusisyon, kung bakong pangon an mga tawo, karanya-kanya nin grupo. An madangog m, horornakan, iristoryahan, karabritan, pahirilingan nin selpon, ma-selfie sa mga caro o caya sa mga palabas kan cada barangay.

An madangog mo na sanang gadasal iyo an mga manang, mga gustong maging manang, mga midbid na parapoon pati an mga miembros nin religioso. Sabi ngani, nawawara na daa an pagkasolemne kan okasyon.

Alagad, igua man nin punto ang mga habo caini. Kung hareon daa an mga musikero, mawara man an tugtog na iyo an gatao nin pagkasolemne sa prusisyon. Sabi ninda, harea daw an musiko sa dapit nin gadan kung inano na an hiwas kan mga tawo. Saro pa, herac man kan mga musikerong nakaguda man kung Semana Santa, mawaran nin hanapbuhay.

Ang maluway na kumpas kan musika, sabi pa, iyo man an gadikta kung inano kapaspas an buag kan prusisyon, caya ngani igua nin kurahaw nin alto ta an mga naenot na carong daeng musiko sige sana an abante.

Kung gusto daang maging tunay na solemne an prusisyon sa Semana Santa, an marinas daang gibohon iyo na ibawal an mga selpon, hareon an mga palabas nin mga tawong gasagin-sagin na mga Hudeo, pagbitison an mga maprusisyon, bawal an mabale na daeng bitbit na rosaryo, asin parilinyahon an gabos, dae na baleng abuton nin limang oras nin ribot bago makaantos sa simbahan, he! he! he!

*****

Iguang kinasuhan kan nakaaguing semana diyan sa RTC na sarong menor de edad na lalaki.

An kaso, pagmolestiya sa cinco anyos na aquing alaga niya bilang katabang na paraaring sa sarong harong.

Dae man daa cotana madiskubre an gibo kan akusado kung dae naheling an cinco anyos na aqui na ginigibo man sa tugang niyang dos anyos an kabagraan na ginibo saiya kan paraaring.

Leksyon ini sa mga magurang na midbidon nin marinas an mga tawong pinapalaog sa harong, lalo na kung makiestar o iyo an pamangnohon sa mga aqui lalo na kung an mag-agom nasa trabaho. Minsan singaki o kapamilya, magayon na maisihan ang tunay na ugali. Kung minsan ngani, an bako mo man na kadugo, iyo pa an gamaculog sa saimong familia.

*****

    Nagpoon nang magkalakaga an politika sa isla, damay pati judicatura.

    Sa paghirit ni Cong Cesar na dapat daang imbestigaran pa an kaso ning paghakot nin  halos dos cientos na kahoy sa Bagamanoc pa-Virac sakay sa trak na sadiri kan companya kan familia Cua, natural na mahanap man nin pambalos an tinamaan.

    Pati si Juez Contreras napilitan na magpahayag sa publico (cabale si Nestor) kan rason kung pano dinesisyunan an kaso, bilang simbag sa soboot pressure kan representante kan isla.

    Kung maaprobaran an resolusyon ni Cong CS, ipaapod na naman an mga invuelto duman sa congreso o kaya tibaad uya na naman an hearing, siyempre sa atubangan kan media.

    Mapasikat na naman an mga honorable  sa pag-imbestigar sa isyu. Ihagad ta na dae lamang nin maotsan sa isyung ini siring sa nacaaguing imbestigasyon sa shabu lab….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs