By By qui Tang Tacio
Dae ngona magpusta sa sultada
posted 15-Apr-2018  ·  
1,223 views  ·   0 comments  ·  

Ngonian na tapos na an Cuaresma, tapuson ta naman an diskusyon sa musikero sa prusisyon.

Segun qui Monsenyor Manolo, bago pa man mag-abot an Semana Santa, pinaapod na an mga cagsadiri nin caro o pasos sa miting duman sa simbahan. Duman daa napaghoronan na sunodon sana an mga gawe kan nacaaguing tolong taon, na an mga musikero dapat nasa enotan.

Caya pinapasabot an mga invuelto sa caribocan na ini na igua sindang onceng bulan para madiscutir otro an bagay na ini tanganing dae na malaog si Santa Maria Dolorosa, he! he! he! Imbitaran man an mga musikero kung ano man an saendang masasabi caini, lalo na ta hanapbuhay man ninda an afectado.

*****

Nangana an dulac ninda RTC Judge Lelu Contreras y Cong Cesar na nagpoon sa pagkadacop kan halos dos cientos na kahoy sa laog kan trak na cagsadiri kan companya kan aqui ni Gob Boboy.

Hueves pa, nag-isyu na daa si juez nin orden para sa congressman na nagtatao saiya nin sitenta y dos oras tanganing simbagon kung ngata dae siya puede padusahan sa orit-orit na pag-insistir na sala an pag-imbestigar y pagsentencia duman sa drayber y pahinante nin hababang pagkakulong. Maguiromdoman na dagos man pa-interview an juez sa radio para depensahan an Corte, kung sain pinariwanag niya an basehan kan desisyon sa kaso, lalo na an Republic Act 10951 na nag-amyenda sa Revised Penal Code o mga padusa sa acusado, asin an revised guidelines sa continuous o daeng tunong na pagdangog nin mga kaso sa Corte.

An problema sana para sa sheriff, iguang visitang secretaryo nin DOH an congressman caya dae daa nalugaran an pagsirve kan orden. Naatraso pa an biyahe kan eroplano, resulta naubusan na nin oras si Sec. Duque, dae na nagpunta sa EBMC ta nagdiretso na sa airport.

Sayang na dae dinagdagan nin balon an sheriff, cotana nakabakal man siya nin tiket, nagsabay sa eroplano y duman na sinirve an orden habang naka-seat belt an congressman, he! he! he!

Sabi sa Hall of Justice, naisirve man daa an orden kan hapon nang ito matapos mangarigos nin daeng sabon an sheriff. Pinaagui daa ini sa Viber account ni Cong Cesar, caya caso udma na Martes, posibleng igua nang simbag na pinadara sa RTC.

*****

Dae man daa macandidatong gobernador si Cong Cesar, siring sa paluwas kan mga suportador ni Gob Boboy.

An tuyo man sana daa kan congressman sa paghagad nin mas hararom na imbestigasyon sa kaso kan trak na nadakop na may kargang kahoy iyo na protegeran an natatada pang kakahuyan sa isla.

An problema sana ta an maysadiri kan trak sarong companya kana qui nin gobernador, caya napulitika na naman an isyu. Dati na daang pinagsuspetsahan kan capitolyo na interesado si Cong CS sa tocawan ni Gob para sinda kan saiyang tugang na si Atorni Jorge an maghade sa isla.

Alagad, masakit mangyari ini, ta mababanga an cuartang panaltag y dae pa sa istorya sa duwang halangkaw na posisyon sa isla na manggana an mag-agom o magtugang sa parehong eleksyon.

Ngonian naman, caya daa sige an  atake ni Cong qui Gob, para malibyano an laban ni dating Gob Siliwong sa pagcagobernador tanganing solo sanang candidato si Manoy Jorge sa congreso. An problema sana caini, magkagusto pa daw an mga votante qui Siliwong?

Halawig pang panahon an natatadang anom ba bulan bago an Oktubreng deadline sa pag-file nin certificate of candidacy para sa eleksyon sa 2019.

    Posibleng igua pang mga mangyayari na mga paghororon, negosasyon, cuerentahan nin gastos, saralubotan asin iba pang mga kamarangmarangan.

    Kung sa derby, dae ngona magpusta an mga parabulang hanggan dae pa naheling an mga maldos o naisihan  kung kisay ini ta tibaad masala….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs