By By qui Tang Tacio
Ang lapok sa lab-ogan ning Sto. Domingo
posted 23-Apr-2018  ·  
1,505 views  ·   0 comments  ·  

Dae man daa nasayang an sarong oras na pagtambay kan mga periodista y taga-radio duman sa Hall of Justice habang gahalat kan pag-atubang kan NBI qui Juez Contreras.

Maguiromdoman na inorderan kan RTC an NBI na ipresentar an saendang detenidong ahente, si Atty. Eric Isidoro, sa Corte bilang pagsunod sa reglamento. Habo cotana kan autoridad ta an hagad kan abodago duman na ikulong an ahente sa carcel kan ahensya.

Natural, an hona kan quinceng armadong parabantay pati kan kan sampulong media y mga usisero dae sana maawat an proseso.

Nasala an hona-hona, ta inabot nin halos sarong oras an pariwanag kan juez manongod sa saiyang mga desisyon sa mga mosyon kan DOJ sa transfer of trial venue y transfer kan custodiya ni Isidoro, pati na an soboot panguyag sa reputasyon kan juez y RTC.

*****

Base sa saiyang pariwanag, an soboot bobowang affidavit ni PNP regional intel chief Alex Federio ang naging base kung ngata si juez an pinag-initan kan Congreso.

Sabi ni Juez Contreras, dacul an naisihan niya manongod sa shabu lab, lalo na kung sisay an nagsalakay sa shabu lab kan hapon nin Noviembre 25, 2016, o cabangang aldaw bago pa man ini pabuksan ni Mayor Laynes y mga pulis. Isi man daa ni juez kung sisay an opisyal na nag-orden sa saiyang mga pulis na kuahon an tres milyones na genset sa shabu lab.

*****

Sabi kan saro man na observador, an genset daang ini isinakay sa trak, dinara pa ngani sa Campo Camacho asin duman inabutan nin bagyo, saka pigbyahe paibong. Kung haen na ini ngonian, sa laog kan Camp Ola o kung sain sa luwas, an mga opisyal sana nin PNP an nacaisi, he! he! he!

An sinabi ni Federio Iyo man daa ini an ginibong evidencia kung ngata nadamay sinda Gob Cua, Mayor Laynes y Alex Ang Hung, segun sa chismosong bakong taga-Corte. Duwa daang politico, parehong dae sa puesto, an kagplano kan panguyag na ini.

*****

Saro man na chismoso an nagsabi pakatapos kan harampangan sa RTC na pinangaranan daa ni juez sa saiyang orapronobis kung sisay an saro sa nagsalakay sa shabu lab, bagay na naging rason kung ngata nakatakas an mga Intsik.

Aduman pa daa sa mga sinabi ni juez an pangaran kan nagkua kan mga CCTV camera pati an CCTV recorder na gabos dae itinao sa Corte bilang evidencia.

Aduman man daa an pangaran kan duwang opisyal na iyo an ginamit kan duwang politico (saro dae napangaranan) sa panguyag sa mga kalaban ninda sa politica y qui Juez Contreras. Kung sisay an mga ini, bahala na kamo maghagay sa mga sinabi sa Corte kan Viernes na aga. Basta daa an koneksyon kan apat na ini, an tolo magkaibahan sa sarong grupong magturugang y an duwa magkaibahan sa partido, he! he! he         !

*****

Nagpoon na an summer, segun sa PAGASA. Caya nagpoon na man an brownout kan Dificelco.

Marinas cotana mangarigos sa salog, lalo na diyan sa Sto. Domingo sa Virac.

Alagad, dae na daa ini makarigosan por dahel sa mga quarry sa upstream o enotan na parte kan salog sa Calabnigan, Simamla y Poniton.

Ta sigeng kutkot kan mga payloader sa irarom kan salog, natural madugui an tubig, dara na ini sa pagburos duman sa karigosan sa Sto. Domingo.

Segun sa mga reclamador, igua nang lapok an irarom kan saendang paboritong lab-ogan magpoon na kanghan nin harang an salog sa oroenotan kan tulay.

An hapot ngonian kan mga residenteng nabuhay sa salog pati na an mga karigoson, kung sisay an nagtugot kan pagkaykay nin graba sa tolong barangay. An pacahona daa kan cadaclan mga politico ta iyo daa an tuturo kan mga opisyales sa barangay. Ano daw kung igua ining mga ECC o quarry permit an mga operasyon na ini?


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs