By By qui Tang Tacio
Madagos daw an eleksyon sa Mayo 14?
posted 29-Apr-2018  ·  
1,379 views  ·   0 comments  ·  

Nagpoon na kasu udma ang trabaho kan Constitutional Review Committee na sinugo ni Pay Digong na repasohon ang 1986 Constitution tanganing bag-ohon ini asin ilaog ang federalismo.

Segun sa orden ni Pay, dapat daang tapuson kan comitiva an trabaho ninda sa Abril 30 para maipresentar na an draft kan bag-ong Constitution.

Ngonian, ini daa an rason kung ngata an mga kandidato sa barangay asin SK elections dae ngona magparapainom o caya manuga sa mga votante.

Tibaad daa pag-resume kan sesyon sa Senado, orderan naman ni Pay Digong an liderato caini na ipospon an eleksyon sa Mayo 14 sa ibaqng petsa tanganing maisabay na an plebisito sa  bag-ong Constitution.

Harimbawang mangyari ini y maaprubaran an federalismo asin Cha-Cha, iguang sarong taon na transition period. Bungkal an mga elegidong opisyal na habo kan Malakanyang, na iyo an ma-appoint nin mga OIC. Saka na daa mapaeleksyon si Pay Digong. Hayahay an mga congressman, gobernador, alcalde y mga consejal na naoringan sa kusina kan Malakanyang, he! he! he!

Dae ta sigurado kung ini talaga an mangyayari sa masunod na semana. Magmaan sana an mga kandidato, lalo na itong harayo pa ngani an borotohan dae na gatirinohan, he! he! he!

*****

Posible man na maapektuhan an pangaturogan ni Manay Siliwong na magin congressman sa 2019.

Harimbawang madagos an federalismo, sarong taon pang matukaw si Cong Cesar sa botakang iguang caja de hierro, he! he! he!

Segun sa mga huringhuding, nagsabi daa an congressman na igua daang tolong opisyal sa local na gobyerno na kung bakong sususpendihon, palayason sa puesto dahel sa kung anong reclamo. Dakula an posibilidad na saro dindi si Gob Boboy, lalo na ta an tunay daang pangaturogan ni Cong Cesar magin hade sa capitolyo masque na sige niyang sayuma, he! he! he!

*****

Nagpatanid palan sa publico an DSWD sa mga epal o mapapel na mga politico na gustong gamiton an pagtaltag nin Emergency Shelter Assistance (ESA) pati na an CCT kan 4Ps sa pulitika.

Dae daa maniwara an mga tawo sa mga politicong ini, ta an cuartang tabang kan gobyerno hare man sana sa bulsa kan mga tawo.

Segun sa DSWD, dae daa iboto ang mga epal ta pigaloko man sana ninda an mga pobre.

Kung hohorop-horopan ta an gustong sabihon nin epal o kapalmuks, kabale dindi an mga politicong mnahilig magpaskil nin pandok ninda asin pangaran sa mga proyecto nin gobyerno na an cuarta hare man sana sa tawo.

*****

Kung igua pa daang duda sa kakayahan asin determinasyon kan mga Wong na paganahon si Manay Siliwong sa 2019 sa laban sa pagka-congressman, helingon sana daa an handa caini duman sa Amenia beach resort.

    Kaibahan an familia y mga amigos y amiga, naghanda daa an dating gobernador para sa selebrasyon kan saiyang compleaño na enot nang sinilebrar sa Maynilang kayganda.

    Sobra daa sa veinteng putahe an nakaluwag sa garikong lamesa, kabale na an lechon. Sa kadinakulan kan caonon, kulang an ordinaryong plato. Sayang daang bakong bandehado an dinuhor sa mga visita, he! he! he!

    Bagui daang gasakay sa lantsa kung Deciembre bago magtapos an harabhaban ta nanaltag an manejamiento nin supot, bako na kanghan nin suka kundi laogan nin mga pambahog sa mga ayam na batid magtutbras, he! he! he!

*****

    Igua na naman palan na naglampaw na awto diyan sa Virac fountain na dae gaturawis.

    Siguradong nakainom na naman an mga sakay caini, siring sa mga invuelto sa mga nacaaguing aksidente.

    Ano na daw an nangyari duman sa Anti-Drunk Driving Act?

    Sagcod ngonian, dae pang naidistribuir na breathalyzer na cotana magamit kan mga kapulisan sa pag-eksamen kung an drayber nakainom, lalo na ngonian na piristahan.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs