By By qui Tang Tacio
Krismas na naman!
posted 19-May-2018  ·  
1,513 views  ·   0 comments  ·  

Maselebrar an enterong isla nin Krismas sa Mayo 14.

An kaibahan sana caini sa Deciembre ta an mga pinangaki dae na masusod pa kan saendang mga ninong y ninang, sinda na mismo an madayo sa harong bitbit an regalong imo y kung minsan mga duwende pa an madeliber lalo na kung halaba an bolsa kan Santa Claus, he! he! he!

An mga kapos pati na an mga hababa an sungay na habo manaltag, maribot pa man siempre, manin-o, mangabrasa, mangumusta minsan pirang bulan mo nang dae naheling, he! he! he! Kung medyo nakadisponer sa mga amo, madara man nin kape, tinapay, biscuit o ano pa man na puede lamang timo-timoon habang galista nin mga bobotohan na candidato, he! he! he!

Iyo na ini an dae nabulong na helang kan mga taga-islang maogma. Puede man cotanang dae na mamakal nin boto, lalo na kung magakaoroyon an gabos na candidato na dae mamakal y halaton na sana an desisyon kan banwaan. Alagad, an gabos na gaambisyon magsirve sa publico gabos gustong manggana. Caya inanong pirma nin covenant sa plaza o pagsumpa sa atubangan kan simbahan, daog man siempre kan tentasyon ni Satanas, he! he! he!

Segun sa mga taga-bangko (bacong tocawan), mas dacul daa ngonian an cuartang magisip na hinagad ninda sa Bangko Sentral, kumpara sa kinua ninda kan Deciembre. Entonces, mas dacul talaga an Santa Claus na maribot sa kabangguihon nin Mayo 13 para kanapon an saendang mga pinangaki, he! he! he!

*****

Halos ciento cuarenta palan an mga madalagan na mga cabali sa listahan nin mga nagsukong durigista o pusher.

An aviso caini kan PDEA, kahoronon kan mga pulis y awtoridad sa local na gobyerno na mag-withdraw na sana an dating adik tanganing dae nang problema.

Harimbawang habo man ini mag-atras sa laban, lalo na ta karapatan nindang magkandidato, dae sinabi kan PDEA kung ibalangibog sa mga votante an mga pangaran sa listahan.

An makamundo pa caini ta segun sa osipon, minsan an sarong natokhang nagsuko na o naggraduar sa rehabilitation program, adyan pa man siempre an saendang mga pangaran sa drug watch list kan PNP. Dae daa puedeng harion sagcod na dae nakasiguro an mga pulis na an mga ini dae na mabalik sa dati nindang bisyo.

Posibleng an mangyari, ipadara an listahan na ini sa mga barangay o caya ihinghing sa mga votante tanganing sinda na an magdesisyon kung tutubdan an pulis o dae.

*****

Iguang reclamo sa mga patrabaho sa tinampo nacional lalo na duman sa Calolbon sa tampad kan SAVS.

Segun sa parabayad nin buwis, gaui daang gakawat nin tubig-tubigan an mga trabahador kan contratista, daeng equipaje, puro mano-mano. Tibaad hababa pa an pasuweldo ta bagui daang mga malaymay an hiwas.

Sabi kan reclamador, cotana daa apurahon na kan capitalista an patrabaho ta tolong semana na sana mapoon na an clase.

Segun sa huring impormasyon, pintanidan na daa kan DPWH an contratistang bagulbolon na dagdagan nin tawo asin maquina an patrabaho sa box culvert bago pa ini patunongon kan oficina.

Siring man daa ini sa mga patrabaho sa tinampo y tulay diyan sa Virac na awat nang atrasado. An kaibahan sana ta igua sindang rason kung ngata naawat: an dae naresolveran na right-of-way issue ta dacul an dapat gabaon na mga privadong propiedad pati na an afectadong mga establisimiento de negocio na an tampad dae puedeng trabahuhan nin sabay-sabay.

*****

Ultimong hurit sa mga ciudadano kan Islang Maogma…

    Sa saendong pagpili kan mga matocaw na capitan y kagawad, SK chairman y mga miembros caini,  helingon tabi an personal na buhay kan  mga candidato. Kung bul-ad ini sa harong,  bul-ad man ini sa consejo. An gawe-gawe kan tawo sa harong nadadara sa luwas. An caipuhan ta mga toltol, mahigos, iguang pagmangno sa saendang barangay...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs