By By qui Tang Tacio
Naenot na ang dapat mamurhi
posted 23-May-2018  ·  
1,291 views  ·   0 comments  ·  

Sagcod ngonian, dae pa nasususod an babayeng naghubon nin omboy diyan sa basurahan sa CSU.

Por dahel sa pagpaheling sa mga usiserong tawo kan CCTV footage diyan sa unibersidad, igua na nganing nabasangan na iyo an kaguibo kan makangildis na pagsabod nin sadiring aqui.

Ngonian igua naman nin osipon na taga-Cabugao, Bato daa an daragang nabadosan, aduman na daa nagdulag sa Maynilang kayganda.

An hapot, kung hare pa ini duman sa Cabugao, ngata ta nagdayo pa sa CSU diez kilometros pa an distancia para sana isabod an omboy? An huringhuding, tibaad daa an nag-ilaid sa lubang empleyado sa escuelahan na habo pangakuan an produkto kan saendang salang caogmahan.

Sa ngonian, dae pang rinaw kung totoo an istorya ta dae man nagpresentar sa pulis an chismosong taga-Cabugao.

*****

Kan nacaaguing semana, saro man na trese anyos na daraga an nagbitay sa sadiri diyan sa Virac.

Segun sa mga sihongan, an babaye daa nakikatabang habang gaadal sa CNHS alagad iguang naging kaharyawan. Kan bayaan daa ini kan soltero, iyo na an naging dahelan kung ngata rinigot an sadiri. Dae man sinabi sa report kung hinubonan ini nin kino-kino kan daeng kunsensiyang soltero.

Iyo na ini siguro an pang-apat o panglimang insidente nin mga tawong nag-apura makasakat sa langit. An duwang sunod anas napierde sa pagkamoot, dae kinaya an daculang kamunduan.

An mga arog caining mga tawo na hababa an luha y maluya an boot, caipuhan nin magcacanigong pariwanag kan mga tawong nasa paribot ninda.

Magayon na an mga miembros nin cada familia pati na an mga amigo y amiga batid magmaan kan namatean kan saendang caibahan. Masakit na mawaran nin mahal sa buhay, lalo na an mga aki pa na halawig pa cotana an aaguihan sa kinaban.

Siring man, magayon na maisihan man kan escuelahan, pribado man o pampublico, kung bados an saendang estudyanteng babaye tanganing ini matawan nin tamang aviso para sa salud niya asin an saiyang magiging aki.

Sa panahon na ini na pigaenot na an dapat mamurhi, marinas na an mga nadisgrasya iligtas sa mas lalo pang daculang problema – an tuyong paglaglag nin aki. Maski patuwadtuwadon an isyu, buhay na gibo n in Kaglalang an nakataya, buhay na dapat protegeran kan gabos, bako na isabod na sana sa basurahan siring kan gamit nang condom.

*****

Garuluwas na an veinte, cincuenta y sanggatos na pinanaltag bago pa man an eleksyon kan Lunes.

Pano na naman an saod, Bazaar, 888, Sunrise, McDo y Jollibee, pati na mga ukay-ukay.

Sabi ngani ni Reverendo Padre Atoy dela Rosa, bacong problema an violencia sa Islang Maogma kung panahon nin campanya, kundi an dapat bantayan iyo an imo-lencia, he! he! he!

Sa naheling kan mga tawo sa enterong tres cientos quinceng barangay, talagang dae mauswag an sisay man na gaambisyon manggana kung dae manaltag nin cuarta, shampoo, kape, pandesal,  noodles, sabon o bagas.

Nakamati sana nin pagbasol an mga nagpabakal nin voto kung sige na an panghab-on kan saendang pinatukaw sa puesto.

An mga naelegir kan Lunes, lalo na itong mga capitan na namakal nin voto mananggatos paitaas, natural nang magibo nin milagro oras na kapot na an fondo nin barangay. Diez porcientong SOP sa mga office supplies y construction materials, dagdag pang pahanglas hare sa contratista ni gobernador o congressman sa pagfirma kan certificate of acceptance kan mga ampaw na proyecto.
0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs