By By qui Tang Tacio
Gamiton an sentido kumon
posted 31-May-2018  ·  
1,027 views  ·   0 comments  ·  

Ngonian na panahon na cadacul an gusto magpayaman  nin daeng pagal, dapat na mag–ingat an gabos sa mga manloko.

Segun sa bilang ni PBM Sonny Francisco, apat na an nagluwas na mga navictima sa cellphone load scam gamit an saiyang boses y pangaran. Posibleng uya sa isla an kaguibo ta an gabos na panloko nangyari habang si PBM nasa luwas kan provincia.

Bako man sanang ngonian ini nangyari ta kan mga nacaaguing taon igua na man nin mga navictimang mga pulis, principal, maestro, empleyado asin iba pa. Gamit an boses asin pangaran nin sarong naderotang opisyal sa capitolyo, inutangan nin rinibong load sa cellphone an mga pobreng empleyado y negociante.

Sukat nang dae gadarangog sa radio o gabarasa nin diyaryo. Naringwan an leksyon kan mga nacaagui, nawara ang senso common na maghapot kung ngata an mayaman na PBM o opisyal caipuhan pang mangutang ning load na an dara nindang cellphone naka-plan sa Smart o Globe.

Duwa man sana an paon kan daeng calag na ini: an poder kan inarog na opisyal o caya an panugang makaganancia an inapudan.

Segun sa mga nacaisi, igua daang application na nacaarog kan boses nin tawong narecord sa smartphone. Kung iyo ini nanggad an nagagamit kan daendatang tawo, posibleng nacahuron na kan suspechado an mga tinarget na opisyal para kopyahon an saendang boses. Adyan sana an herodes na ini, halaton tang makasikyod.

Caya inaapodan an gabos na mag-isip ngona bago magpa-utang nin load, cuarta o ano pa man. Hapoton ngona an sadiri: kung mayaman an gaapod, ngata ta mangutang pa ning load kung iguang postpaid smartphone?

*****

Haen na daw an mga nagsabing dae makulang an kuryente ngonian na summer?

Dae pa sana naawat, nagpaluwas nin mensahe an Napocor na dae daa makurang an kuryente sa isla. Sabi ngani kan taga-Batong presidente caini na si Pio Bnavidez, masque daa dae na paandaron an pinatambay na Daihatsu genset kan CPGI, sobra-sobra na an kuryente, he! he! he!

An enot na nauyag an tolong maquina kan Napocor, magsunod man an tolong maquina kan SUWECO duman sa Solong, caya inabot nin tigcabangang aldaw an brownout sa isla.

Sinabi na dati kan junta directiva kan Dificelco na manipis an reserbang kuryente sa grid, caya ngani harayo pa naghagad na sinda sa Napocor na paandaron an Daihatsu, alagad an simbag kan Bato Alistong presidente, dae puede…

*****

Nangaturog na daa cotana an mga votante sa Islang Maogma, lalo na ta pinahomhom nin rinibo kan mga kandidato kan 2016.

Alagad igua man daang nagmuruklat kan magpili kan mga lideres sa saendang barangay.

Minsan cadaclan na lugar nagtaraltag nin cuarta, iguang mandiliit-diit na mga kandidatong nakaluwas minsan dae naggamit nin cuarta sa pamakal nin voto.

Sa Virac, adyan si Tey Tablizo kan Cavinitan, Rudy Tolentino kan SIV, Lino Lumbao kan Palnab del Norte asin iba pa. Igua man nin mga kagawad sa barangay asin SK chairman na nanggana sa siring na paagui. Mabuhay sinda gabos!

Sabi ngani ni Atorni Bunao kan COMELEC, dacula an papel kan mga pulis asin soldados sa naging matoninong na eleksyon.

Cotana, sa masunod na eleksyon, kung puede sanang dagdagan an numero ninda nin mga reservist o iba pang volunteers para mabantayan an cada barangay para mabawasan an barakalan nin voto. Kung puede mag-orden si Presidente Digong nin 6 P.M. curfew sa mga lugar na golpi an barakalan nin voto, arog sa islang Catandungan, mas magayon.

    Puede man cotanang magcaoroyon an mga candidatong dae na manaltag siring sa saendang mga panuga sa candidates’ forum. Alagad, dae mahari an duda, dae mabawasan an kagustuhan na manggana masque anong mangyari, caya igua man siyempre nin suwail, gabos mamakal….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs