By By qui Tang Tacio
Buy One, Take One (BOTO)
posted 11-Jun-2018  ·  
1,376 views  ·   0 comments  ·  

Dapat magselebrar an mga votante sa darang good news ni Cong Saryo.

Segun sa mga chismoso, makandidato daa ini sa pagkagobernador kalaban si Gob Boboy. Kaibahan daa an saiyang tugang na si Atorni Jorge na gusto man macua an babayaan na tocawan ni Cong Saryo duman sa Hababang Harong (Lower House).

Nagpoon na daang magpaisi an congressman sa saiyang mga lideres sa cada banwaan mantang si Siliwong man awat nang nag-anuncio kan saiyang ambisyon na masalidahan si Cong Saryo, sige na ngani daa caini nin pamakal nin motorsiklo para sa mga lider.

Atorni laban sa negociante sa capitolyo, atorni laban sa duwang negociante sa congreso. Suma total, halangkaw an barakalan sa 2019, maogma an mga parapabakal nin voto, he! he! he!

Hababa na an sanribo an presyo sa Igang, posibleng milquinientos, he! he! he! Ini daa an magiging istratehiya kan magtugang, Buy One Take One o BOTO, he! he! he!

Posibleng magkaibahan sa campanya an duwang negociante alagad pag-abot sa taraltagan, makanya-kanya man ini por sobre ta dae man puedeng pagsaroon an saendang mga lideres. Sanribo cada, puede pa lalo na kung mangutang naman an gobernador, ta si Manay Siliwong dae gahubas an burabod, he! he! he!

Kung maato pa si Manoy Hec, lalong engrande an handaan sa Mayo 2019, ta dae man ining helak sa cuarta masque minsan masakit nang magtubod an mga votantes kung tunay an makaptan nindang Ninoy.

Puede pa nganing magtapsok an bayaw ni gobernador na si Atorni Leo, na sige na an ribot sa mga banwaan y dae man nin sabi kung ano an sainyang tuyo sa maabot na panahon.

Sa ibang mga politico, an mangyayaring ini na duelo kan duwang lideres saro sana an idarang problema: maipit na naman sinda sa mangyayaring iriwal.

*****

Talagang asensado an mga bumbero sa Virac.

Sarong ciudadano an nag-osip kan bagong pakulo kan Bureau of Fire Protection matapos ipahingayad an fire station dae pa sana naawat.

Imbes daang an tolong bumbero an ikahang sa silong kan bagong baldoza, an iginarahe daa kabn mga bumbero iyo an saendang mga sadiling pribadong sasakyan: verdeng pickup na may atop an hurihan, sarong gray na kotse y mga motorsiklo kan mga bumbero. Kung minsan ngani daa, pigagibo pang car wash an garahe, tibaad bayad pa nin VIWAD o BFP an tubig.

Segun sa osipon, dae pa daa naturn-over an edificio caya dae pigagarahe an mga fire truck sa laog. Alagad kung siring an totoo, ngata man ta an saendang mga pribadong awto an ikahang duman?

*****

Gaagrangay an mga saraday na negociong gapabakal nin baybay, graba y hollow blocks.

Segun sa sainda, an iba nagtunong na ngona kan saindang trabaho ta daeng nakukuang baybay o graba. Pigasolohan na daa an mga quarry kan mga daraculang companya na harani sa ENRO sa capitolyo.

Dae man siguro sindang problema sa pagbayad nin taripa, na kung kukuwentahon mas dacula pa sa quarry fee asin tax na binabayad sa gobyerno.

Ano daw kung reparohon man an isyung ini kan mga honorableng vocal diyan sa junta provincial?

Harimbawang dae ini maaksyunan, magayon sigurong tugotan man an mga saraday na negociong ini na makakua nin quarry para sa sainda sana harani sa Sto. Domingo, bako na duman sinda ipakua nin graba asin baybay sa Simamla hanggang Dugui.

*****

    Igua na naman ning kiripingan y barakalan na nacaaguing eleksyon nin SK federation sa halos gabos na onceng municipio.

    Duman daa sa Gigmoto, motorsiklo an pinanuga y duman sa Bato, linaohan man nin politico, rinibo man an gastos.

    Diyan sana daa sa Virac an malinig na eleksyon, ta dae daa nanaltag an nanggana, aqui ni DILG regional director Biet Pastor.

    Iyo na ini an satong panunod da mga jovenes: daeng magana sa politica kung dae ka mamakal nin voto. Madaracula man an, siring na an kaisipan...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs