By By qui Tang Tacio
Patanoson an karapkapan
posted 11 days ago  ·  
366 views  ·   0 comments  ·  

Nagpa-survey palan daa an SUWECO kung inano ang camogtacan kan mga pigabanabana na makandidato sa 2019 sa duwang pinakahalangkaw na posisyon sa isla.

Segun sa osipon, halos tabla daa an laban sa capitolyo, cuarenta y cinco porciento qui Gob Boboy Cua mantang an congresistang si Cesar cuarenta y tres. Entonces, dose porciento pa an dae nacasiguro kung sisay an pipilion.

Sa pagca-congressman, nangengenotan daa si atorni Jorge Sarmiento, masunod an naderotang bise gobernador, pangtolo an awat nang tambay na si JAS, pang-apat si Manay Siliwong, y kapurit si Manoy Hec Sanchez.

Inda kung matubod kamo sa survey na ini. Sa pagca-gobernador possible pa, alagad sa congressman baguing sala ta sa pagheling kan cadaclan si Manay Siliwong an dapat numero uno, masunod si Jorge, y an natada pang tolo bahala na magpurukpukan kung sisay an makapurit.

Saro pang hapot kung totoo nanggad ang survey na ini, ano daw an interes kan supplier nin corriente sa politica sa isla sa 2019? Gahanap nin poderosong amigo o manaltag man nin libreng corriente?

*****

Uya palan daa si atorni Jorge matapos an magcapirang bulan na nawara.

Maribot na siguro ini sa islang maogma ta naenot na kan nacaagui pang semana an tugang na si Cong Sario. Dae pa sana naawat nagbisita man si Manoy Hec y an dating bise. Noarin man daw si Manay Siliwong y JAS mabubod nin bahog sa manoc?

*****

Sa inatenderan daa caining mga pasumpa nin opisyales nin barangay, diit man sana daa an patarara ni Cong Cesar.

Kan mangrabrasa daa ini diyan sa Plaza Rizal sa Virac sa pasumpa ni alcalde Samuel, iyo sana daa ini  an sabi ni Cong sa cada capitan del baryo: “Congratulations! Macandidato akong gobernador!”

Iyo an an gadiskarte, directa, igong pirmi, he! he! he! Sabay bado pa nin t-shirt na an tatak sa rikod, “SARMIENTO 19,” he! he! he!

Alagad an simbag kan magcapirang capitan kan hapoton kung ano an heling ninda sa maabot na laban iyo ini: dae daa manegaran an cadacul na proyectong dinara ni Cong Cesar sa islang Catandungan, alagad pag-abot daa sa mga panahon na caipuhan nin tabang personal an mga tawo, an dalagan duman qui Gob Boboy.

*****

An masakit sa liderato kan PNP ngonian, lalo na duman sa Maynilang kayganda, kulang na sanang maglukso sa cada tataramon ni Pay Digong.

Kan magsabi an presidente na arestohon an mga tambay, tulos man pandacop an mga pulis ni Albayalde sa Metro Manila, pati na an mga ordinaryong ciudadano na gahalat man sana nin sakay o gapahangin sa luwas. Ni dae lamang inisip na dati nang pano an mga carcel ninda y an bagansya awat nang hinari sa Codigo Penal.

Sukat nang iguang sadiring isip an kimot ni Pay Digong, sabi kan mga kalaban sa politica. Imbes na magbasa an mata sa prepared speech, an kimot na an basang na gabuka, he! he! he!

Ngonian, sabi ni Pay, dae man daa siya nagtaram na arestohon an mga tambay kundi kapkapan sana, he! he! he!

Marinas man ini, ang karapkapan, lalo na sa gusto magpakapkap. Alagad, magayon na iguang rules of engagement tanganing dae basta sana mangapkap an mga pulis lalo na kung magayon an kakapkapan, he! he! he!

*****

Eksatong sarong taon na sana, tapos na an mga termino kan satong mga local na opisyal.

    Igua na sana sindang doseng bulan tanganing mapagayon an saendang imahe sa mga constituentes.

    Sa Virac, an hapot ngonian sa saod, kung kakayanon kan administrasyon ni alcalde Samuel na hamanon an pagpatanos kan saod bago pa matapos an taon na ini.

   Helingon ta sa mga masunod na semana kung makapoon an municipio sa pagpa-bidding kan proyecto. Posibleng sa isyung ini madepende an banwaan kung tatawan pa nin sarong termino an alcalde….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs