By By qui Tang Tacio
Iguang codigo sa ALS test?
posted 14-Jul-2018  ·  
1,025 views  ·   0 comments  ·  

Namurong an magcapirang observador sa sobrang boot kan mga miembros-consumidores kan Dificelco.

Sabi ninda, an presyo kan corriente sa Islang Maogma saro sa pinakahalangkaw sa enterong nasyon, alagad daeng gareclamo

Dae cabale dindi re reclamo an mga pangmoda y pagpaluwas nin init ning payo sa facebook. An gustong sabihon kan observador ang reclamo na maabot sa pagkaso sa ERC, RTC o NEA.

Iguang mga gustong guyodon sa mga hearing an Dificelco o sisay man na power supplier, alagad an saendang natakotan iyo an gastos caini sa pag-atender nin hearing duman sa Maynilang Kayganda y an posibilidad na an saendang kalaban makua nin de-calibreng mga abogado.

Kung hehelingon nin banwaan, puede nang ireclamo an mga director na nagpirma kan daendatang mga contrata sa corriente na dae lamang inadalan, pati na an dae pagsunod dindi sa ngonian.

Noarin man daw magimata an mga taga-islang abogado tanganing matabangan an mga reclamador na consumidor?

*****

Iguang nag-apod na ciudadano kan nacaaguing semana manongog sa Alternative Learning System o ALS, an programa kan Department of Education (DepEd) para duman sa mga dae nakapadagos nin pag-adal sa elementarya o hayskul.

Segun sa chismosong ini, igua daang mga ALS passers na nagsabi saiya na igua daa sindang codigo kan mag-eksamen sa ALS Equivalency Test, bagay na nakadisganar daa sa nakadangog.

Sabi pa, saro daang taga-ALS ang nagpasa nin mga simbag sa test sa mga ma-eksamen sa paagui nin text message. Entonces, cadacul daa nindang tama duman sa eksamen dahil sa text-a-friend, he! he! he!

Habo naman daa itao kan mga nakapasar an copya kang text ta tibaad daa sinda man an balikan kan nagpasa, orawang nakapadagos na sinda sa hayskul.

Sa ngonian, puro sana ini osipon ta dae pa man kitang naheling na evidencia na makapatunay kang alegasyon na ini. Alagad, mas magayon man na marepaso kan ALS in-charge an proseso sa pagtao nin eksamen kung talagang puedeng mangyari na makaluwas an simbag sa ALS Equivalency test bago pa man gibohon an eksamen.

Puedeng hilingon an mga test paper kan mga nag-eksamen kung iguang pararehong simbag. Masakit man kaya kung pabayaan na sana an huringhuding na ini ta mararaot an imahe kan ALS sa Islang Maogma.

*****

Pinag-orden na palan kan Supreme Court ang pagbalyo kan mga kaso sa shabu lab sa Palta Saday duman sa ciudad ni Binay.

    Segun sa mga bareta, iparipa daa an mga kaso sa Makati RTC oras na mag-abot an mga document hari sa Virac.

    Oras na ini ma-assign na sa kung saen na RTC branch, puede na mag-apply an mga akusado, lalo na si NBI senior agent Eric Isidoro, na siya ilipat na nin kulungan sa Maynilang kayganda.

    Maguiromdoman na naghagad ini qui Juez Contreras na tugotan siyang madetine sa NBI habang pigadangog an kaso, alagad ini sinayumahan.

    Alagad puedeng abuton pa ini nin semana, caya si Isidoro padagos pang mahigda sa plywood na kama kaibahan an mga preso sa BJMP Virac.

    Kung itao kan Corte an kahagadan ni NBI na duman siya makulong sa Taft, maghagad man daw an saro pang akusado na duman man siya sa NBI ikulong?

*****

    Helingon ta dae kung mangyari ang panuga ni Napocor president Pio Benavidez na mapaandar ang 3.6-megawatt genset na dating kapot kan CPGI.

    Hanggan pigagibo ang diyaryong ini, brownout pa sa kung anong dahelan.

    An panuga daa ni Piong taga-Bato ginibo qui GM Zafe y sa pakimiting kan NPC bossing qui Cong Saryo.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs