By By qui Tang Tacio
Matagas na, barato pa!
posted 16-Jul-2018  ·  
913 views  ·   0 comments  ·  

Maski palan bato, baybay o graba puede nang i-order sa Lazada.  Karne na sanang hilaw na dilamon ang dae, he! he! he!

Segun sa osipon, magcapira daang mga empleyado kang Provincial Engineering Office ang naengganyong mag-order nin cellphone dahil sa daculang discount. Binayadan ninda on-line ang mga order.

Pagdeliber daa kang mga item, naogma an mga customer ta magayon ang packaging, alagad namurong an saro kung ngata mantang gakarokago an kahon, medyo magabat ang laog.

Pagbuksi an mga kahon, an saro iguang laog na pidaso nin hollow block mantang an saro iguang paghilog na bato, he! he! he!

Posibleng dinugas kan parapatos kan supplier nin Lazada an cellphone y tinukalan kan bato y hollow block. An marinas man sa Lazada ta tulos man daang rinibod an cuartang ibinayad.

Leksyon ini sa mahilig mag-shopping sa internet. Bako gabos na naheling mo sa computer siring na gayo pag-abot sa isla. Igua nganing nag-order nin desktop computer, tama an CPU na nag-abot alagad ang keyboard sa Intsik an letra, he! he! he! Igua man diyan nin mga bagay nab aging pagkadinacula, alagad pag-abot saday na sana, he! he! he!

*****

Nagreclamo an kapamilya kan mga dinakop na parasugal sa isla.

Sa saro sanang aldaw, quinceng katawo an inaresto kan mga pulis, ta gahabol daa an Campo Camacho sa quota sa illegal gambling. Cabale dindi an limang taga-Virac na soboot gamadyong sa solar ninda.

Segun sa reclamador, an sabi sa search warrant sa harong an lugar, alagad dinakop daa sinda duman sa payag sa luwas nin harong.

Cotana daa, an pag-interesan kan mga pulis an STL sa barangay man ninda. Bako naman daa ining STL kundi jueteng na, ta an numero uno sagcod cuarenta y an pagrebisar kan mga taya ginigibo sa gilid kan tinampo. Magayon daang mareparo ini kan local na gobyernol y an kapulisan, lalo na kung diit man sana an saendang nareresibe. Helingon ta kung maglayat an ayam na iguang akab, he! he! he!

*****

Magpoon daa ala una sagcod alas cuatro, naribokan an mga residentes sa paribot kan bonoan sa Bigaa.

Bako daa ini por dahel sa ogik nin mga orig na dododoon o caya unga kan mga karbaw na papatokon sa payo.

Magpoon pa daa kan sarong taon, pirmi na daang nangarigos ning moda an mga empleyado kan bonoan sa mga agrabyadong mga parabono. Caya ngani daa sa sobrang carigos, inabot nin alta presyon an amo sa bonoan, dae na naomayan.

An rason, awat na daang napabayaan kan municipio nin Virac an slaughterhouse na itinogdoc pa kan panahon ni Mayor Cito.

An maculog daa sa boot kan mga tawo, an bonoan ga ganancia nin diez mil  cada aldaw sa matanza, o cabong-cabong na P3.6 milyon cada taon.

Sarong taon na daang uyag an water pump para sa water tank, caya daeng tubig na ginagamit an mga parabono kundi riwoy na sana. Cincuenta mil man sana daa cotana an bag-ong pump alagad dae daa nakabakal an municipio ta dae nang fondo, gahalat pa nin supplemental budget.

An atop man kan bonoan, awat nang horowa caya kung gadosnok, diretso sa tubig da laog, kung minsan minaresulta sa short-circuit kan ilaw.

Saro pa, sagcod daa ngonian, dae pa lamang nabawasan an tambak nin duhay sa rikod kang bonoan. Dati daa pigtakua ini, alagad baguing pinabayaan na. Caya inaapodan an mga paraoma na nangaipo nin abonong natural, puede na kamong magdara nin sako asin pala. Masqui pilang sako an alsahon niyo, libre.

    Harimbawang igua pang tada, puede man diit-diiton kan mga parabono kadarha duman sa municipio, itambak sa lobby hanggan mangyari an saendang kahagadan na maayos na an bonoan.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs