By By qui Tang Tacio
Mga karatista y boksingero
posted 23-Jul-2018  ·  
1,089 views  ·   0 comments  ·  

Pareho palan nagpalabas kan laban ni Pacquiao an duwang malaban sa 2019 sa pagkagobernador.

Si Cong Cesar aduman daa sa Virac Sports Center mantang si Gob Boboy nasa convention center.

Sabi ning taga-Bato Alisto na dae pang cable, namili daa siya sa wala o sa too. Duman daa sa wala (kung hari ka sa kahadean ni Mayor Eulogio), apat daa an boksingero igua pang libreng t-shirt boda extrang pelikula na ang bida si Cong Cesar, he! he! he!

Duman sa too, duwa sana an boksingero alagad duwa an karatista, daeng libreng t-shirt ta dae daang midbid na boksingero, aircon pa boda iguang mirindalan.

Senyal na mayaman na talaga an taga-Isla Maogma, parehong dae napano an duwang coliseum. Bahala na kamo mag-atid-atid kung sisay an nadagdag na duwang boksingero pati duwa man na karatista, he! he! he!

*****

Inaabisuhan an gabos na parasakay sa traysikel sa Virac na an pamasahe dati pa man siyempre, nueve sa poblacion, dose pesos pasakat sa Calatagan o Cavinitan.

An mga abusadong drayber na dae gauli sa binayad na imo, ikua tabi ang body number asin tulos na ireport sa municipio. Puede man  ini ireklamo sa consejo municipal sa comitiva ni Honorable Rosie Olarte para maaksyunan y kung kaipuhan bawion an prangkisa kan traysikel.

Segun sa mga nag-atender na mga miembros nin publico (cabale si Nestor y pag-iriba), sobra man an hinahagad na sais pesos na dagdag sa pamasahe. Dapat daa piso sagcos dos sana an umento sa pasahe.

Siring caini, hehelingon daa nin marinas kan Sangguniang Bayan kung ano talaga an dapat na dagdag, ta an nueve pesos na pasahe inaprobaran pa kan 2012 kan ang gasoline nabakal nin P42 an litro. Ngonian cincuenta na an litro o may dagdag na diez y nueve porciento. Entonces an dagdag cotana P1.70 per kilometer, alagad dae ka nang maheheling na sinsilyong veinte cinco, diez o cinco, caya mas mayad piso o dos na sana.

Sabi sa petisyon kan FREDVITODA, an dagdag-pasahe daa para sa mga “hand-to-mouth” na mga drayber ninda. An gustong sabihon, an kita sa oro-aldaw napupunta sana sa pagcaon kan familia.

Alagad, kung mag-agui ka sa P. Araojo coliseum kung Simba o aldaw na iguang pabulang an barangay, cadacul na yellow tricycle an maheheling mo sa bulangan, he! he! he!

Hababa na an kita kan mga drayber por dahel na kadinakul na ninda sa Virac. Saboton ta na an cadaclan ngonian na familia igua nang motor o tricycle na gamit sa paghatod sa escuelahan o trabaho. Caya ngani grabe na an trapik sa Pilot o CNHS Lunes hanggan Viernes.

Idagdag mo pa ang hilig sa sugal kan mga drayber, magpoon sa pustahan sa basketbol, taya sa paykyu o STL sagcod pagbulang cada Simba.

*****

Igua na palan nin dagdag na benepisyo an mga katabang sa harong.

Segun sa DOLE, an mga katabang daa entitled na sa special leave benefits maliban sa itinatao sainda kan Republic Act 10361 na standard minimum wage, pagpamiembro sa SSS, PhilHealth y PagIBIG, 13th month pay, limang aldaw na annual service incentive leave, y sarong aldaw na pahingaro cada semana.

Harimbawa daang kaipuhan mag-alaga an katabang kan sadiri niyang familia, puese siyang mag-avail kan Solo Parent Leave. Kung kaipuhan operaran sa gynecological disorder, iguang leave na madurar nin duwang semana sagcod duwang bulan.

Kung siya naging victim nin pang-abuso, puede siyang mag-aplay ning sampulong aldaw na paid leave sa irarom kan Republic Act 9262.

Maray ini. An problema ngonian kan cadaclan na familia na parehong maytrabaho an ama o ina, saen makua nin marinas na katabang.

Dati nang tres mil pesos an minimum na sueldo sa katabang sa Virac cada  bulan. An iba minatao nan in cuatro mil pesos alagad daeng nang nakua, minsan igua pang sadiring cuarto, iguang TV, hahagadan ka pa nin wifi para sa facebook.

Iyo na ini an saro sa kalaen na resulta nin 4Ps, harabo na magtrabaho an mga dating daeng trabaho. Kawat-kawat sana nin baraha, bingo o domino, tapos makubra nin 4Ps, hayahay na naman sa pamakal sa Virac, he! he! he!


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs