By By qui Tang Tacio
Giyera mundial na?
posted 30-Jul-2018  ·  
904 views  ·   0 comments  ·  

Nagbayabay na an Virac Water District na magpoon kan Lunes, fecha a-veinte tres kan bulan na ini, marasyon na sinda nin tubig.

Pasensya na daa an mga rinibong consumidor ta talaga daang patarak na an ilig kan tubig sa Cauayan, Padurog y Sibanhan. Sige sana pa naman nin kabit an mga taga-Viwad, baguing mga politico, he! he! he!

Segun sa bayabay, seis oras sana cada aldaw an bulos nin tubig sa gripo cada barangay. An iba, nakaskedyul nin aga, an iba banggui.

Herak man an mga  natokahan na tatawan nin tubig magpoon matanga sagcod maagahon ta mapuka an mabantay sa gripo. Dapat siguro magpasar an board of directors nin resolusyon na iguang diez porsyentong discount an mga consumidor na mapuka sa mga oras na ini.

Ngonian, sabi kan mga nakaisi, pinagdiscutir nin mga director an pag-implementar na ini kan water rationing na pigproponir kan manedyer na si Kuing Surtida. Segun daa sa mga director na ini, bako man solusyon an pagrasyon nin tubig, kundi an dapat na magin objeto iyo na makakua pa nin dagdag na pagkuahan nin tubig.

Igua na yata caidto nin proponidong deep well na kakanghan nin elevated water tank. Kung ngata dae ini nangyari, sinda sana an nakaisi.

Kung saarin mahaman an proyecto kan Viwad na sugponan an ginibong icaduwang pipeline kan DPWH diyan sa itaas kan Cauayan, baguing sa Deciembre pa daa ta naatraso an pa-bidding kan Viwad kan caipuhan na mga tubo.

Sa pagrasyon na ini nin tubig, dapat sigurohon kan Viwad na malinig, daeng mikrobyo y iguang regular na chlorine treatment an mailig sa satong mga posit. Masakit man na rasyon na ngani an tubig, libre pa an mga mikrobyong paodo, pwe!

Mayad sana an mga iguang cuarta ta makabakal nin mineral water o purified water sa mga tindahal o refilling station. An mga daeng ikabayad caipuhan magrig-ok nin hari sa bombahan na posibleng contaminado nin ihi o duhay, masqui minsan iguang libreng hipon.

Sabayan pa nin pagrasyon man nin corriente kan Dificelco, bagui na kitang nasa giyera mundial numero tres.

Ngonian na naman daang semana an panuga nin Napocor na paandaron an daculang maquina caini diyan sa Marinawa. Caya sacgod sa semanang ini, padagos an walong oras na brownout sa enterong provincial.

Sa ngonian pano, mas mahalaga na an corriente sa tubig. Kung mawaran kan nin tubig sa gripo, puede ka magsakdo sa bombahan o caya magbakal nin mineral water sa tindahan o ginalon na purified water sa refilling station.

Daeng napatos na corrienteng mababakal sa tindahan. An genset lampas diez mil an pinakabarato.

Ngata mas matimbang pa ini sa tubig sa panahon ngonian? An mga tawo, lalo na an mga adik sa internet, dae na mabuhay na dae ma-facebook. Habo na man mangahang sa library an mga estudyante ta pirmi na sanang sa Google gahanap kan simbag sa saendang mga assignment.

Caya pasensya man an mga director kan Viwad y Dificelco kung kamo an garecibe nin pangmoda kan publico (cabale si Nestor). An saendong katuyuhan servicio sa publico, caya magpatanos kamo!

*****

    An gusto palan daa kan SUWECO, gamiton an  saendang bag-ong genset sa irarom kanb 2nd Amendment kan ESA sa Dificelco.

    Habo an mayoriya sa junta directiva ta dati nang pigreparo kan NEA an 2nd Amendment ba bakong pabor sa Dificelco y dae inadalan nin marinas kan mga nagpirmang mga director.

    Kung isumitir kan kan duwang ini an saendang aplikasyon sa approval kan  2nd Amendment sa NEA, dae daw sinda makasuhan kan mga consumidor por dahel na pabor sa supplier an amendment?

    Halaton ta kung igua lamang na macontra na durodacula an sogoc sa satong mga politico...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs