By By qui Tang Tacio
Milagro sa pagdakop nin kahoy
posted 6-Aug-2018  ·  
1,106 views  ·   0 comments  ·  

Igua palan nin ibang istorya duman sa nadacop na trak na puno nin kahoy duman sa Viga.

Segun sa chismosong nag-osipon sato, kan maharang daa kan 2nd Provincial Mobile Force Company ang trak, saro daang pulis an nag-abot. Nadangog daa kan mga taga-PMFC an drayber y pahinante na maogmang nagsabi, “Ay, adyan na si sir!”

Saro man daang pulis na soboot invuelto man sa protection racket sa mga para-ilegal an nakidiskusyon pa sa mga kagurubay sa PMFC na igua siyang evidencia na sarong halangkaw na opisyal garecibe nin lagay sa para-lotteng.

Sabi pa kan tawong kimutan, an trak daa pano nin kahoy kan madakop, alagad binawasan daa an laog caini tanganing an duwang inaresto makapiyansa. Ini daa an suhestiyon kan abogado kan may sadiri kan trak, sarong consejal sa Virac na harani qui Cong Cesar.

Saro pa daang nareparo na baguing sala. Kan maibareta daa an pagkadakop caini duman sa Campo Camacho, dae na daa sinabi sa report kung sisay an kagsadiri kan trak. Maguiromduman na kan madakop an dumptruck na pano nin kahoy diyan sa tampad kan VTC dae pa sana naawat, clarado duman sa report na an may sadiri kan trak iyo an Eastern Island Shipping na pagsadiri kan mga Cua.

Ano daw ta pati an pag-report nin mga bagay na ini babalihan pa nin pulitika?

*****

Nagpasyar na naman palan an Trafcon kan LTO kan nacaaguing semana.

Amot na naman an nadakop na mga pasusuhay na drayber pati mga dae rehistradong mga motorsiklo y iba pang vehiculo.

An problema sana, pati dapit nin gadan nadamay ta an carruaje yata dae rehistrado pati na an drayber, he! he! he! Dae man sinabi kan impormante kung isinakay na sana sa traysiker an kahon nin gadan o hinalat pang maglayas an mga traffic police.

Iyo man ini an sala sa satong mga motorist. Obligasyon ninda na iparehistro taon-taon an saendang mga kabayo o carruaje tanganing dae madakop kan mga pulis. Sinda man sana an naabala, bako man an pulis. Mayad kung dakul an saendang sasakyan ta puede sanang cabanga an iguang rehistro, y an cabanga gagamiton sa pakidali-dalihan sa Trafcon.

*****

Salang solusyon an ginibong load shedding kan VIWAD.

Imbes na mabawasan an mga reclamador na consumidor, lalong nadagdagan.

Segun sa noticia, tig-anom na oras an pailig nin tubig sa mga afectadong barangay sa itaas kan Virac. Entonces, dati pa man siempre an servicio sa banwa, veinte-cuatro oras an ilig sa posit. Alagad, duman sa Calagatan, Cavinitan, Moonwalk, asin iba pang lugar na dating nacarecibe nin tubig nin dose oras cada aldaw o lampas pa, tios na ngonian an pagpila sa bombahan o pagpano nin mga balde.

Sabi ngani kan sarong consumidor, dae man nasunod an anom na oras na rasyon ta nawara man an suplay kung odto y an ilig bako man na macusog.

Kung dati nakalabar sinda pagmata sa aga, hangin an maluwas sa gripo. Harimbawang dae camong katabang sa harong, y an mag-agom matrabaho sa luwas y an mga aqui nasa eskwelahan ta duman na man makaon, daeng mapano kan saendang balde o mga bote.

An masakit kan polisiyang ini, na nagkua ki Pedro tanganing itao ki Juan, mantang si Jose sumo-sumo nin tubig, dae na ini puedeng bawion.

Magayon na an mga barangay na nabawasan nin golpi an supply nin tubig, magpasar nin resolusyon o reclamo sa VIWAD, tanganing an mga director magkamas-kamas man na pariboton an saendang water truck na rasyonan an mga residentes sa Calatagan, Tibang y Cavinitan, siring sa paghatod caini nin tubig sa mga water refilling station na afectado kan water load shedding.

Saro pa, magayon siguro harimbawang igua naman nin vacante sa board, ipalaog an sarong taga-simbahan, lalo na padi, tanganing iyo an mangenotan sa pagdasal nin Oratio Imperata cada sesyon. Maghagad nin dakul na uran, mga duwa o tolong aldaw cada semana basta maluya sana an hanging, tanganing macanamit man an mga paha.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs