By By qui Tang Tacio
Tugakan an habay, bawasan an saromsom
posted 13-Aug-2018  ·  
1,210 views  ·   0 comments  ·  

Habang amay pa, dapat nang apudan ni GM Raul si Buboy Fernandez, an trainer ni Senador Pacquiao.

Igua daa palan ning mga posibleng maging kasunod ni Manny sa boksing y an mga taga-NPC mismo an mapatunay sa naheling nindang orag sa suntukan kan duwang taga-Dificelco, he! he! he!

Segun sa osipon, nasorpresa daa an an mga taga-Napocor kan biglang magpunete an duwang dispatcher kan Dificelco duman mismo sa laog kan cuarto kung sain nakakahang an mga electrical equipment na mina-control kan pagpalaog nin corriente sa linya.

Evidencia kan orag kan duwang boksingero an dae daa pagtama kan saendang suntok sa mga delicadong equipajeng ini, na cotana mapalala sa padagos na brownout sa isla.

Naging reperi an mga taga-Napocor, alagad pakaluwas daa kan saro, dagos na naghuba, nangangat, naglaog otro sa ofisina y naghabulan sa compound habang sige an punete.

Sagcod ngonian, dae pa naisihan kung anong padusa an narecibe kan duwa sa manejamiento kan Dificelco, kung an mga boksingerong ini sususpendihon o haharion sa pagka-dispatcher.

Segun sa mga osipon sa kahadean ni Raul sa Marinawa, trabaho daa an dahelan kung ngata nagcalentar an mga utak caini.

Bago iyan, saboton niato kung ano an trabaho nin dispatcher. Depende sa orden kan GM, an dispatcher iyo an gapalaog sa linya kan Dificelco kan corriente kan lambang supplier, NPC man o SUWECO. Entonces, may poder ka na na itinao kan GM, hayahay pa an trabaho ta nasa airconditioned na cuarto masque pa maribok ta harani sana an gaandar na maquina kan NPC.

Ngonian, an pinun-an daa iyo an dae pagkasinabotan kung sisay an ma-absent o maenot pag-absent sa duty. Simpleng helingon alagad iguang komplikasyon. Mga macusog daa an boot mag-absent ta iguang reliever y saro pa, anas daa ining mga presentado mag-duty kung holiday ta double pay.

Halaton ta an Sangguniang Panlalawigan kung mapasar man nin resolusyon na kasuhan nin SUWECO an mga pasusuhayon na ini, he! he! he!

Saarin man daw mapasar nin resolusyon an junta provincial para kasuhan kan NEA an mga dating director kan Dificelco na invuelto sa mga salang desisyon sa mga contrata sa suplay nin corriente?

*****

Mga maluyang clase palan an mga kalaban ni PBM Tiptip Wong sa pagka-congressman.

Dati nang nabareta na si Manay Siliwong an macandidato sa mababakanteng tocawan ni Cong Saryo sa 2019. Cuntodo anuncio pa ini sa local na midya duman sa Amenia beach resort kan Abril.

Ngonian na confirmado nang si Manoy Hector y Manoy Jorge an macandidato, saka man nagbotwa si Kuya Tiptip, he! he! he!

Anas ining mga maperac. Kan saguton ni Manoy Hec an sitenta mil na bayad sa banda sa  visperas kan Pandan, dagos man panuga an mga Wong na sinda man an mabayad kan banda kinaagahan, kaya hanggan taringa an ngilit ni alcalde Takoy, he! he! he!

Duman daa sa Viga, sa pasumpa daa kan mga capitan del baryo, cien mil an hinubon ni Manoy Hec, sinyal na dae ini mapapugol sa 2019. Madepende na sana siguro sa kung sisay an mataltag kan pambakal na dapat makaabot sa gapabakal, he! he! he!

Sa campo man nin mga Sarmiento, mabulos man an grasya para sa mga votante sa Mayo 2019. Guiromdomon na nasa ika-siyam na taon na sa puesto si Cong Cesar y sa taon sanang ini, P2.4 bilyon an fondo kan DPWH. Batid na kamo magcuenta, he! he! he! Madepende man siyempre kung tutugakan an habay, he! he! he!

Sa parte man kan mga Wong, bakong problema an perac sa kadinakulan kan mga negocio caini. Pruweba na sana an tolong vez na pagkapadungkal ni Manay Siliwong bago ini nanggana sa capitolyo. Saboton tang diit nang guminana si JB kan 2016, y siguradong siring na suporta an itatao kan mag-agom sa saendang aquing bocal. Kung pano mabawasan an saromsom, iyo an an dapat masolusyonan, he! he! he!


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs