By By qui Tang Tacio
Sungayan na baka sa Binurong
posted 21-Aug-2018  ·  
764 views  ·   0 comments  ·  

Naghampangan sa wakas sa junta provincial an SUWECO, FICELCO y mga bocal manungod sa isyu kan corriente.

Maguiromdoman na nagpasar daa an SP nin resolusyon na gahagad qui board president Alex Ang Hung kan Virac na maglampaw na sa puesto, ta iyo daa an pigabasol sa Christmas light na servicio kan cooperativa.

Sa sesyon kan Lunes, nagluwas na an pakasabot palan kan magcapirang bocal, puede sanang paandaron nin basang an dinarang diesel genset kan SUWECO tanganing mapanoan an kakulangan sa suplay.

Bakong arog caini kadari, sabi ni Dir. Alex, por sobre ta an pagpaandar kan genset pati na an singil sa corriente caini dae pa man aprobado kan ERC.

Saro pa, iguang kalaen na nadiscubre an mga auditor kan NEA sa inaprobaran na 2nd Amendment kan mga nacaguing board. Enot caini an salang komposisyon kan BAC na nag-aprobar sa contrata, ta kabala sa BAC an sarong director y an OIC, y pagbalga sa RA 10531.

An gusto palan daa kan SP, pirmahan na sana kan BOD an anuman na contrata sa SUWECO masque na pagbalga sa ley.

Dae man sinabi kung nagpasar man nin resolusyon an SP na minahagad sa Dificelco na kasuhan an CPGI y SUWECO sa dai ninda pagpirma sa salang contrata.

*****

Igua palan daang nangyaring aksidente duman sa popular na Binurong Point kan Domingo.

Segun sa informante, dinara niya daa sa Guinsaanan tanganing matan-aw man an famosong tourist attraction sa ngonian.

Pabalik na yata sinda sa barangay kan bigla daang sinungay kan sarong baka an saiyang dose anyos na aking babaye. Mayad ngani daang nakaptan kan aki an duwang sungay. Paka-apyat kan aki, dagos daa ining dalagan sa mga abakanhan para makadulag, alagad pagabot duman, igua man daang mga baka sa paribot.

Nagi daang hysterical an aki y nagparahibi habang pigabugaw kan tour guide an baka. Dae na daa naorian an aki, dai na nagkaon pag-abot sa harong sa Virac, habo na ngani magpa-escuelahan pagkaaga.

Sabi kan reclamador, pinuntahan daa ninda an capitan na inabotan nindang gapanit nin lukban, alagad bagui sanang balewala an tratamiento caini.

Magayon daa cotana, nakural an mga baka tanganing dae makaencuentro kan mga turista. Puede man na gibohan nin kudal na maseparar sa dalan duman sa lugar na pigasabsaban kan mga baka.

Saro pa, sabi niya, dapat magcaigua nin first aid training an mga tour guide sa barangay o sa arin man na destinasyon sa isla, tanganing batid na sinda kung ano an gigibohon oras na iguang mangyaring emergencia.

*****

Nagpalabas na naman palan an alacalde kan Casiguran, Sorsogon, an contratistang si Mayor Boboy Hamor.

Halos daa cabangan milyon an pinanaltag caini sa Viga asin Virac kan Sabado y Simba, cabale an veinte cincong motor, mga electric fan, telebisyon asin iba pang gamit sa harong. Rinibong tawo an nag-atender sa pa-raffle sa Viga sa kahadean ni alcalde Tarin, mismo daang si Jorge Sarmiento an saro sa mga nag bunot kan mga ganador na tiket.

Sa Virac, alas dose pa sana, igua nang tawo sa Plaza Rizal, caya alas cuatro nagpoon na an palabas. An problema sana, sunod-sunod na an misa sa katedral kaya nadisturbo an mga padi pati an parasimba.

Dae na man puedeng tunongon an programa ta halos diez mil na an tawo sa plaza, kaya naghagad na lang nin dispensa si alcalde Samuel sa simbahan.

*****

    Maogmang kapiyestahan sa Viga y Calatagan sa kaaldawan ni Nuestra Señora dela Asuncion!

    Mamantikaan man lamang an saendong mga ngiwi, masque dai na magpaboyong tanganing daeng helang. Bawal na an magdala nin supot, dadakupon nin tanod..


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs