By By qui Tang Tacio
Mga consejal an pataltagon nin tubig
posted 3-Sep-2018  ·  
778 views  ·   0 comments  ·  
Baguing nalaogan nin politica an isyu manongod sa pagdeclarar nin State of Calamity kan consejo municipal.

Segun sa mga osipon, apat sana daang miembro nin consejo, cabale na si bise Arlynn, ang pabor sa declarasyon na pinagrecomendar kan MDRRM Council.

Kan aldaw na iyo an pinakamainit sa istorya kan isla, dae daa nagcaoroyon an consejo ta an mayoriya gusto pang magconducta nin ―field validation‖ kan mga rason o evidencia na isinumitir kan MDRRMO y PAGASA.

Nagtukad palan an ibang consejal duman sa Cauayan tanganing personal na maheling an camogtacan kan Cauayan river na pinagkukuahan kan Virac Water District.

An iba daang honorable nagsayuma o dae na nacaantos ta garebenta na an mga tuhod. Alagad saro daang consejal an nacaabot sa intake tank. Pinaheling caini an litrato kan tanke na pigaaguihan nin tubig na may galataw na mga dahon.

Naging rason ini para akusaran an VIWAD na pinababayaan an tanke. Alagad nagluwas sa testimonya ni manedyer Surtida na awat na palan na abandonado an tangkeng ipinaheling, he! he! he!

*****

Ngonian, pinagpariwanag daa ni alcalde Samuel na an declarasyon nin calamidad bakong sabihon na

gagastoson na an enterong Calamity Fund.

An hihiwason sana daa iyo an tres cientos mil pesos na dati nang nakabadyet sa water augmentation, y an cuarta para man sana sa gastos sa pagdeliber nin malinig na tubig sa mga napapahang constituents sa mga barangay na dugang na an mga bombahan.

Segun sa mga mainit nang payo na miembros kan MDRRMC, dae ninda masabotan kung ngata ta caipuhan pang beripikahon kan mga consejal an mga datos na isinumitir ninda.

Saro pa, dati na daang nagdeclarar nin state of calamity an onseng barangay, sobra na sa duwang barangay na caipuhan segun sa ley.

Magayon siguro, sabi kan sarong chismoso, tawan an mga consejal, lalo na an mga reeleksyonista, nin iskedyul kan pagdeliber kan tubig, tanganing sinda mismo an magtaltag sa mga paha na votantes, he! he! he!

*****

Sa Sabado na palan an asembliya kan mga miembros-consumidores kan Dificelco duman sa Bato Rural Development High School.

Saro daa sa mga mataramtaram iyo si Cong Cesar. Inadalan na daa ni CS an isyu kan Dificelco pati an mga contrata caini sa mga supplier y nanuga na daa ini na daeng sasantohon, director man, supplier o politico, tanganing maitama an mga sala

Maatender man daa an mga reclamador sa padagos na brownout.

Magayon ini ta awat nang puro sana mga consumidores na an habol sana papa asin premyo sa raffle. Pag hinapot kung uyon sa mga pigapasar kan junta directiva, sige sanang oho basta maapura an paripa.

*****

Sarong residente kan San Isidro Village an gahapot kung aprobado sa zoning office kan municipio an mga garahe nin daraculang trak y heavy equipment sa barangay.

Gareclamo na daa an mga kagurangan na nadistorbo kan mga gaaraguing trak y mga equipaje, lalo na ta tap-og, ribok asin posibilidad nin aksidente an dara kan mga ini. An mga sinabod daang mga asayte pigapailig sa mga kanal asin an hangop kan krudo y gasoline nakakaabot sa saindang mga harong.

Reparo ni capitan Rudy y MPDO an caipuhan caini…

*****

Segun sa DAR, si bise mayor daa an nagreclamo nin illegal conversion laban sa mag-agom na alcalde Eulogio.

Ngonian, pigaheling na lugod kan mga imbestigador nin DAR an iba pang ciudadano nin Bato na igua man nin siring na pagbalga sa ley. Daramay na an gabos sa awat nang durulak nin bise y alcalde.

Awat sana kang eleksyon tanganing maheling na kung sisay an alisto sa Bato….
0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs