By By qui Tang Tacio
Magtanom tanganing dae magutom
posted 17-Sep-2018  ·  
769 views  ·   0 comments  ·  

Sigurado na daa si Cotipyo sa pagdalagan na makua an dati niyang tocawan sa Congreso.

Segun sa mga osipon, an mga dati daang caibahan ni JAS inaapodan na tanganing magkaburonyog guiraray sa maabot na campanya.

Sabi ngani, dae pa daa natapos an bulan nin Agosto, nagvuelta sa Virac an dating congresista y nakiayon man sa pag-atender kan mga pasumpa sa PTA. Natural, nagbitbit man ini nin grasyang pambubod, he! he! he!

An problema daa, sabi kan mga chismosong observador sa politica, tibaad an iba sa mga dati niyang parasunod aduman na sa ibang tangkal nanginaon, he! he! he!

Alagad bako daa ining problema, ta kung iguang fondo, madari makaroy an mga nanginaon na ini basta marinas an pambahog, he! he! he!

Sa campo daa kan mga Wong, dae pa sigurado kung si PBM Tiptip an pabuagon, minsan ini nag-anuncio na sa publico (dae nadangog ni Nestor).

Nagpa-survey daa an familia kung sisay talaga an gusto kan mga votante na magcandidatong congressman y an nagluwas sitenta porciento an gusto si Manay Siliwong.

Sa ngonian, apat na an declaradong mabali sa saramulyong laban sa Congreso: si JAS, si Manoy Hec, si Manoy Jorge y si PBM Tiptip. Kung abutan man nin gilok sa utak si Atorni Nonong Mendoza ta sigeng ribot sa isla, tibaad maging lima. Bahala na sinda magbaranga kan mga votante, lamang an iguang perac, honestong parataltag y fiel na mga votantes lalo na mga kapamilya.

*****

Aduman na palan sa campo ni Gob Boboy si Bise Gob Shirley Abundo.

Ini an pagheling kan mga ciudadano matapos na magluwas an mga tarpolin na gairiba sinda gobernador, bise gobernador y Manoy Hec.

Dati nang nabareta na tolong grupo an gaharyaw sa maboot asin capableng bise gobernador, na sagcod ngonian dae pang kalaban. Si Cong Cesar, si Gob Boboy y dating Bise Bong na an pacahona kan mga tawo iyo an gakapot sa dating PBM.

Sa pag-analizar kan mga madunong na parasunod kan buhay politica sa isla, parehong napaboran an duwang campo nin Cua y Abundo kan saendang pag-ibahan para sa 2019. An gustong sabihon, pareho sindang kumbinsido na an saendang kaibahan magana sa maabot na eleksyon.

Masakit na daogon an babayeng candidato, lalo na kung igua man nin bitbit na pambahog y alisto pa magbubod. Masakit man na daogon an lalaking candidato, lalo na kung midbid na karatista y puede pang lanihon masque anong oras.

*****

Nueve porciento daa an inflation rate sa enterong Bicolandia. Inano man daw sa islang maogma?

Posibleng mas halangkaw pa, lalo na ta an cadaclan kan satong gulay hari pa sa Baguio. Magbakal ka ngonian nin tigsarong pidasong carrot y reployo sa saod nin Virac ta sisingilon ka nin lampas ciento cincuenta pesos.

An bagas na commercial daa halos suro-semana an langkaw nin presyo, caya ngani napilitan daa an NFA provincial office na dagdagan an pagpaluwas nin bagas sa mga hadlayong barangay asin  mercado (bakong si Orly) tanganing dae magpirila sa sentro.

Kulang man an mga paraoma na mapabakal nin saendang naaning paroy ta itago man ninda para sa saendang consumo.

An marinas sana sa mga taga-isla ta bakong marineklamo, sige sanang gumod-gumod sa facebook, dae mo mahiling na magbitbit nijn placard para magprotesta sa saod, silaan o paratienda nin bagas. Sa eleksyon na an balos sa mga opisyal na pabaya o dae lamang pagmangno sa mga constituentes na gatios.

An solusyon dindi magtaranom nin kalibong batag, mais, camonte, moros, hoping onod, ta pareho man sana an nin bagas na carbohydrate. Iyo man an gulayon na puedeng pataloboon sa sadiring solar.

    An mahigos magtanom dae nagutom. Nganga an mga burad...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs