By By qui Tang Tacio
Siram sana nin mamam, habhab
posted 28-Sep-2018  ·  
948 views  ·   0 comments  ·  

Dai man nin danyos na hinubon ang bagyong Ompong sa islang maogma.

Itong nagkitay-kitay na poste ning kuryente sa Marinawa talagang mangyayari por sobre sa widening kan DPWH, inabot ang kaitaasan kan pagkaykay nin daga.

Minsan duwang aldaw nin uran, kulang pa daa an tubig na binuhos sa isla. Dai ngani nagbaha sa Gogon diyan sa Virac.

An mga napagal magkabit nin typhoon guard o ginakot an mga bintana, medyo mapagal na an pagtangkas, magpasiguro na sana nin agua de pataranta tanganing diretso nanoc pakatapos, he! he! he!

An solamenteng casualty ni Ompong iyo an selebrasyon kan kapiyestahan nin Sta. Cruz. Masabaw an vispera, masabaw pa an fiesta. An nakinabang sana iyo an mga bisitang an tuyo talagang malamos sa Emperador Light, Ginebra o Red Horse, he! he! he!

*****

Minsan masiram an buhay na iguang bisyo, bakong kangangalas, an dapat isipon sa ngonian na panahon iyo an regalo nin buhay na itinao saimo kan Mahal na Dios.

Sabi ngani nin madunong na investor sa Estados Unidos, tinawan sana kita nin tigsarong ginhawa, kaiba na an utak, na iyo an satong gagamiton tanganing manamitan ta an silam nin buhay sa kinaban.

Magayon daang pagpoon pa sana na kita batid na mag-isip, protegeran ta an satong ginhawa tanganing an satong mga kaisipan sa buhay asin mga pangaturog mangyari sa maabot na panahon.

Dae daang halaga ang satong kamas-kamas kung pag edad veinte anyos, lalaspagon ta na an satong isip asin ginhawa sa sigarilyo, alak, babaknit, droga asin iba pang bawal na masilam.

Maabot man an panahon na nakua mo na an hanap mong siram sa buhay, sisingilon ka na kan saimong ginhawa ta nadanyos kan saimong bisyo.

Guiromdomon sana na cadacol na ngonian na dae na nakaabot sa sisenta anyos, bigla na sanang gahagong sa katurog o natumba habang galakaw.

Mayad kung an mabayaan mo maresibe nin milyones, bakong listahan nin utang.

*****

Hanggang ngonian sige pa an pagdakop kan pulisya sa mga parasugar sa barangay, lalo na itong mga mahilig sa tong-its, pusoy dos, mahjongg asin iba pang libangan nin mga daeng gibo.

Ang reparo kan mga ciudadano, ngata daa ta an autoridad dae gareparo sa gapataya nin Small Town Lottery (STL) kan PCSO. Segun sa mga reclamador, dae na man daa gatao nin resibo an mga parapataya y kung minsan naisihan nindang igua nang mga reserbadong numero na dae na puedeng tayaan. Igua ngani daang vez na baguing saro sanang tawo an pirming gagana.

An gustong sabihon, bagui na man sanang jueteng an operasyon kan STL. Lugi an gobyerno local, PNP, PCSO pati na an pati na an parataya y an mga pasyentang nakinabang sa taya kan mga tawo.

Magayon na inspeksyonon kan mga nanunungdan an gibo kan local na companyang gapadalagan kan STL tanganing masigurong dae nin nadehado. Pasensya na an mga nakinabang sa areglo, kung igua man….

*****

Tolong semana na sana, mapoon na an filing kan mga Certificate of Candidacy sa local na eleksyon sa 2019.

    Sa itaas, haman na an linyada kan mga maralaban, duwa sa capitolyo, apat sa Congreso.

    Sa ibaba, pati na diyan sa junta provincial, medyo malabog pa an pangheling kan mga chismoso.

    Natural ini, ta an mga nasa itaas, dae na caipuhan magbilang nin cuarta. Isi na ninda kung pila an saendang bala y badil na dae gaputok.

    Sa Ibaba, madepende pa kung an sarong candidato igua lamang nin pambubod hari sa saendang mga amo sa itaas.

    Malas mo na sana kung an nakua mong amo, makunit pa sa tsinelas ni Pedro Tan diyan sa saod nin Virac, he! he! he!

    Harimbawang igua man  nin madonar nin pampasuwerte, mayad ta dae ka na makimahelak sa votante, manabwag na sana, he! he! he!

    An tigo-tigo na an capital, magpoon-poon na sa pagpabakal nin propiedad, mag-abiso sa mga aking nasa abroad, o caya magluway-luway na sa paghigad sa rueda….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs