By By qui Tang Tacio
Bun-akan laban sa tolong panlaqui
posted 11 days ago  ·  
469 views  ·   0 comments  ·  

Dae na man daa mapasalida si Manay Siliwong sa saiyang pagcandidato bilang representante kan Isla Maogma sa Congreso.

Iyo ini an pinasabot kan saiyang campaign manager, si JB Wong, kan nacaaguing semana.

Dae na man daang problema an rikod ni Manay y an gabos daa nindang kayamanan tanganing maelegir an saiyang ina bilang kaenot-enoting congresswoman kan isla.

An gustong sabihon, mga votanteng makiperac, mabaha talaga nin cuarta sa Mayo 2019, he! he! he!

Igua daang factoria nin cuarta an mga Wong, si Manoy Hec igua man nin bodega ning manangribo, si Manoy Jorge dae man mawaran ta pilang decada nang amo sa iba-ibang administrasyon. Si JAS na sana an dae pa sigurado, kung mahalat pa nin tabang sa sarong companya nin corriente o caya sa dati niyang bossing na si GMA.

Segun sa mga tahodan nang observador sa politica, sigurado nang si Wong y saro sa tolo an malaban sa primerong puesto. Kung sisay sa tolo, depende na sa hiwas kan saendang campanya.

Guiromdomon ta na decada na an nacaagui matapos an ultimong laban ni Manoy Jorge sa local na politica, alagad midbid man siyang halangkaw na opisyal magpoon qui Cory sagcod qui Digong. Si JAS siyam na taon man na nagpahingalo matapos na lampasohon ni Gob Boboy kan 2010. Seryoso daa ngonian si Manoy Hec alagad dae pa nahari sa mga gurang na votante an nangyari caidto sa kahon-kahon na pekeng quinientos.

Iyo ini an laban sa congreso sa 2019, sarong bun-akan laban sa tolong panlaque, he! he! he!

*****

An importante daa, sabi pa kan mga goslab na paramasid sa kanto, an gustong gumana batid makiayon sa tawo.

Sabi ngani, daeng halaga an pambubod kung dae ka batid magkurukay, he! he! he! Importante an bagay na ini masque anong posisyon an dadalaganan.

Caya ngani daa minsan sarong bulan pa bago an pag-file kan CoC, buro-buelta na sa isla si dating Cong Cotipyo tanganing visitahon an saiyang mga lider, mga amigo, mga padi, mga dating kaalyado. Si Manay Siliwong dati nang iguang presensya siring qui Gob Boboy y Cong Cesar.

An mga dapat magtrabaho ngonian sa paglagade sa tres cientos quinceng barangay iyo sinda Manoy Jorge y Manoy Hec. Naenot lang si Hector ta dati nang pigaiba ni Gob sa mga function sa municipio y barangay.

An importante sa mga pagvisitang ini, dapat iguang balon na pambubod an cada saro, tanganing dae maringwan kan mga votanteng an utak nasa bolsa asin tulak, he! he! he!

*****

Duman daa sa sarong banwaan sa Rinconada,, igua daang candidato na hinapot kung ano an plano niya para sa municipio.

    An sabi daa ni Manoy, dae pa daa siyang plano, pag nanggana na saka maplano, he! he! he!

    Iba man an utak kan candidatong ini. Igua man nin rason kung ngata. Habo mapagal nin isip lalo na ta dae man sigurado na magana laban sa tahodan na kalaban pagca-alcalde, he! he! he!

*****

Nag-asumir na siguro si Chief Inspector Jovie Espenido diyan sa Virac PNP.

Segun sa mga chismoso, hinagad daa nin naderotang candidato sa Malacanang na uya isabod si Tsip. Kung ano ang tuyo kan kahagadan, siya sana an nacaisi.

Bilang mga ciudadano kan Isla Maogma, tagboon ta nin marinas an Bisayang opisyal na ini, ta tibaad an hanap man sana caini, makapahingalo sa satong mga magayon na baybayon, maglataw-lataw sa malinig na dagat y mangaturog na daeng distorbong putok nin badil.

Panamiton ta man si Tsip kan satong pamosong pag-ako sa mga visita sa satong harong. Pacaonon nin masilam, painomon nin mahamis na tuba, he! he! he!

Kung igua man nin mga pasusuhayon na mga pusher o adik na totoong iguang badil o nanghahabon tanganing makabakal nin bato, bahala na kamo protegeran an saendong mga buhay. Bihira an nanlaban sa pulis na nabuhay.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs