By By qui Tang Tacio
Naghingayad ning bakong uyag
posted 12-Nov-2018  ·  
1,171 views  ·   0 comments  ·  

Hayahay cotana ang pagselebrar kan Todos Los Santos sa Virac.

Siring sa dati, ginibong Dangwa ni alcalde Samuel an covered court sa Plaza Rizal tanganing duman magtener an paratienda nin burak asin candila.

Nag-aratubang man an mga awtoridad – pulis, traffic aide asin iba pa – tanganing plantsahon an ruta kan mga tawo asin vehiculo palaog asin paluwas sa mga sementeryo.

Marinas an plano ta dati na ining ginamit kan 2017.

An problema kan Noviembre uno, igua daang nakialam na agencia na dae man ngani kabala sa miting.

Segun sa mga nacaisi, igua daang taga-LTO na nagmandong sarhan an tinampo pababa sa Gogon diyan sa canto kan Moonwalk asin national road.

Entonces, an mga awto, traysikel, motor asin iba pa na cotana pababa sa Gogon, pinariko pawala sa Moonwalk. Dangan duman na nagriko patoo papuntang simbahan nin Gogon. Sa dos cientos metros na distansyang ini, inabot nin lampas quince minutos an mga natrapik.

Nagtaragbuan na an mga vehiculo sa may waiting shed kan Gogon y dae na masabutan kan mga pulis asin traffic aide an gigibohon, sabayan pa kan moda asin agrangay kan mga drayber asin pasaheros.

Saro pa, dae daa pinaisi si alcalde kan mga minandohan kan LTO na babagohon an ruta pababa sa Gogon.

Ini an masakit minsan sa mga habo mag-atender nin miting, palso an desisyon ta dae man isi an pinaghoronan, pwe!

Atang nagkaharayblad na an mga afectadong miembro nin Publico (cabale si Nestor), sayang pa an krudo y gasolinang nagastos sa trapik.

Sa otro, guiromdomon kan mga nanunungdan an leksyon kan mga mekaniko: an bako man na uyag, dae dapat paghingayadon!

*****

Igua palan daang nangilimos na amo nin agencia de gobyerno dae pa sana naawat.

Segun sa mga nacaisi, inarapodan daa caini an mga halangkaw na candidato, nacatocaw man o bako, tanganing makimaherak na macadonar nin pambakal nin pagcaon asin iba pang gastos kan saiyang mga empleyado sa pagviaje sa ibang lugar.

Sabi pa, confirmado na kan mga hinagadan an nangyari, pareho daang nagtao an mga karatista asin boksingero nin cuarta magpoon diez mil hanggan veinte mil. Nacaamot sa solocit, he! he! he!

Sa ngonian, dae man ning galuwas na impormasyon kung talagang nagamit an fondong pinakilimosan. An pagcaisi sana kan iba, nadagos man an lamyerda, ribot dindi, ribot duman, ta an pamasahe daa sa eroplano bayad man kan agencia.

Dae sana masabotan kan magcapirang empleyado kung igua pang oli, he! he! he! Dae man daa nasabotan kan mga ini kung ngata nagtao pa man an mga candidatong hinagadan minsan dae na ninda caipuhan an tabang kan nasabing opisyal sa masunod na eleksyon, he! he! he! Naugma sana siguro manaltag an mga Santa Claus, he! he! he!

*****

Na-bidding na palan daa an contratang P200 million para sa edificio kan proponidong training center kan Coast Guard duman sa Panay sa Bagamanoc.

Mayad ini, ta makatao lamang nin dagdag na trabaho sa mga taga-isla.

Alagad, mas masuerte an sarong politicong candidato sa 2019, ta iyo palan an soboot sub-contractor kan proyecto na ginana nin taga-Maynilang Kayganda. Kung pirang milyon an pabakal kan contrata, an duwa sana an nacaisi.

An importante, hayahay an politico, igua nang panggastos sa otro taon, he! he! he!

*****

    Namitan an Tang Inasal kan pinakabag-ong kaonan sa Virac, ang Buddy’s Mami Haus sa iguang airport.

    Sa paaragaw daa kan  malasang manok, dae na nakaya kan duwang kusinero kaya halawig na an halat kan parakaon.

    Saro na sana an problema: sagcod ngonian dae pa natotocar kan consejo municipal an ap[ikasyon caini para sa van terminal. Kung ano an problema, mga honorable sana an nacaisi.     Sabi kan chismoso, tibaad abutan pa nin Krismas, ta wara pa si Santa Claus….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs