By By qui Tang Tacio
Sayang na ngalabngalab
posted 1-Dec-2018  ·  
829 views  ·   0 comments  ·  

Sayang an mga ngalab-ngalab kan gabos sa pag-abot ni Superintendente Jovie Espenido. Dae man sana palan madagos sa Islang Maogma, nagcaorocag an banwaan, he! he! he!

Manlaenlaen na mga huringhuding ang nagkalat. Hahanapon daa an mga nakadulag sa shabu lab, hahabolon daa si Gob Boboy ta iyo daa ang mastermind, hahanapan daa nin butas an mga politicong dati nang pinag-akusaran, puro man sana palan drowing, he! he! he!

Sabi ngani nin sarong opisyal diyan sa Campo Camacho, kung talagang gusto ni Espenido na magtrabaho sa islang ini, awat na cotana siya nag-report sa estasyon nin Virac y nagcortesia qui alcalde Samuel.

Kung tutuoson, sabi pa, puede nang kasohan bilang AWOL si Espenido ta an orden saiya para mag-asumir bilang jefe kan Virac PNP inisyu kan Oktubre once pa. Sobrang sarong bulan bago nagdecider an Campo Crame na ibalik na sana sa Region 8 an ausenteng opisyal.

Ano daw an nahaboan ni Espenido sa isla?

Posibleng nangorngog an pulis ta isabod siya sa lugar na dae man siyang gigibohon kundi mag-aresto nin mga small-time na paratienda nin bato. Isi man siguro ni Espenido na bako man an liderato kan PNP an may kagibohan kan orden na ibalyo siya sa Catanduanes, kundi saro o duwang politico na iguang gustong ipagibong espesyal na misyon.

Dacula an posibilidad na an misyon na ini iguang relasyon sa maabot na eleksyon sa 2019 y kung sisay an tatamaan, isi na kan gabos.

*****

Tapos na palan an paripa kan simbahan na an tuyo magtipon nin fondo para sa mga helakong padi.

Taga-Caramoran palan an nanggana kan awto, alagad ipabakal siguro ini ta tibaad daa mauyag sana ini duman sa bolod kan barangay Buenavista, he! he! he!

Igua man palan nin mga politico y negocianteng nanggana, an iba ngani sobra pa sa saro an ginanahan. Natural ini ta dacul man an saendang binayadan na donasyon, hababa na siguro an sampulong booklet sa cuatro mil pesos cada. Adyan sinda Manay Siliwong, Manoy Hec, dating bise Bong y alcalde Samuel, na nabakawi nin diit sa tiket na binakalan.

An mga daing nanggana, pasensya na sana tabi ta dae camong suerte. An importante, nakatabang camo sa mga pading naghehelang, lalo na ta pigaparapakaon niyo nin masiram na rinuto.

Minsan igua nang fondo para sa saenda na pambakal nin bolong o caya pagpaopera, ipadagos man siyempre an paghulog nin duro-dacula sa cada offering sa Misa, itong dae gatanog, he! he! he!

*****

Sarong aldaw matapos an raffle, nagcaorocag naman an simbahan por sobre sa nagluwas na video sa facebook.

Ginamit palan pasilyo sa laog kan simbahan kan mga candidata sa Mutya ng Virac 2018 sa pagrampa, bagay na nakahayblad sa mga padi y mga religioso.

Nagpaaram man daa cotana an cameraman y coordinator alagad duman naghagad nin permiso sa guardia civil, bako qui senyor obispo. An paaram daa duman sana sa atubangan kan simbahan makua nin video, alagad kan maheling na bukas an higanteng puertahan, naglaog an grupo.

Bagui man sana an istorya nin nakasil-ip nin ikinabuhay. Mili naheling mo na an langit, puede ka na maglaog nin daeng permiso, he! he! he!

Caya daa maprusisyon nin alas tres nin maaaga an mga padi asin mga Catolico sa Virac, tanganing maghagad nin tawad sa Mahal na Dios sa pagbalga sa kasagradohan kan Catedral.

Naghagad na man daang dispensa an mga opisyal kan Mutya ng Virac, Inc. Maninigong gabos sinda magbali sa prusisyon nin penitensya, ibahon an videographer, coordinator asin mga candidata, basta dae naka-swimsuit, he! he! he!

Ta kulang man siguro na natipon na fondo sa paripa, ano daw kung magdonar an grupo masque gurano tanganing mabawasan an saendang ginibong kasalan?

*****

Sa Hueves, maisihan na kung sisay sa 295 na candidato para sa local na gobyerno an maatras o mapasalida.

Segun sa mga chismoso, duwa man sana sa itaas an puedeng gumibo caini. Sarong nominado sa partylist    Dae man maatras an mga candidatong bocal o consejal. Sa pagca-alcalde or bise mayor, puede pa, lalo na itong pirming maculog an arimantac ta kulang an cuarta o daog sa bulang, he! he! he!


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs