By By qui Tang Tacio
Sisay an madulag?
posted 9-Dec-2018  ·  
1,125 views  ·   0 comments  ·  

Saro sana palan an nag-atras sa laban, si dating PBM Asay na soboot nagfile ning CoC para gobernador ta iguang hinanakit sa buhay, he! he! he!

An natadang 294 na candidato padagos an laban, iguang cuarta o dae, he! he! he! An mga hababaw an bolsa igua pang labing tolong bulan para mangilimos, magtipon, o caya magpabakal nin lote, carbaw, harong, motor, o alahas tanganing makapasinsilyo sa bangko nin mananggatos, dos cientos o quinientos.

Dae na tabi uso an manalapi, ta dae nang uli kung mabakal an votante nin sarong litrong gasolina. Baad modahon ka pa, he! he! he!

*****

Sisay daw an madurulag sa siyam na kakasuhan kan DOJ sa isyu kan shabu lab, maliban qui Eric Isidoro, Lawrence Pinera y an mga Intsik na pinadulag?

Natural an igua sanang kakayahan na magpatago iyo itong dakul an pataguan, he! he! he!

Pasensya an dae makaipsot ta an bagsak ninda sa piot na carcel kan Makati City, kaibahan an mga natokhangna durugista.

Duwa man sana an puedeng mangyari. Puedeng baliktadon otro ni Usec. Emmeline Villar an saiyang desisyon sa review resolution, kung marinas an itinaong rason kan mga kinasuhan sa motion for reconsideration ne pig-file ninda.

Harimbawang dae na, ta baging masakit nang tuwadan an sadili, sa corte naman an dalagan kan mga agrabyado. An problema, maawat ini. Tibaad nakulong na an cadaclan, dae pa lamang nahiwas an mga document.

Kung totoo an sahot ni Manay Siliwong na iguang poderosong politico sa rikod kan re-filing kan kaso, sisay daw ini?

Hapoton niyo daw an sadili niyo kung sisay sa mga presenteng politico an nasa poder y iyong makinabang sa nangyari sa pamilyang Wong?

*****

Naka-ocho milyones pesos man palan an raffle kan simbahan Catolico para sa kad-ayadan kan mga tugang tang padi asin an pagpagayon kan cathedral kan Inmaculada Concepcion.

    Segun sa mga sponsor, babangaon an ganancia, apat na milyon para sa mga gasakit na padi asin apat man para sa simbahan.

    Ito palan daang Mirage G4 na ginanahan kan taga-Buenavista sa Caramoran gustong ipabakal kan ganador ta dae man batid magmanejo y bako pang sementado an tinampo papunta sainda. Igua na daang bid na cuatro cientos mil. Kung sisay an mabayad nin duro-dacula pa diyan, lalo na quinientos mil, iyo an magana kan awto.

*****

    Sa sobrang kusog nin hangin asin dagat, gaparatago na palan an kasilaan sa dagat kaya nasakitan an mga parasira sa pagdakop.

    Namate an efecto caini diyan sa mercado nin Viracm, kung saen an maniwang na malasugui gacantidad na nin tres cientos cincuenta pesos cada kilo. An lapu-lapu dos cientos cincuenta an ordinary. Mas mahal an pula.

    Herac man kan mga daeng ikabayad, mapasensya sa turay, duwar, doradong angogan, bangus na hangop lamdok asin tilapiang imported sa ibong.

    Ngonian na Kapaskuhan, magtios ngona kita sa manok, litson, crispy pata, hamon, ta mas barato pa sa sila, he! he! he!

*****

    Iparungkab, iparonot o caya ipasolo na daa kan RTC Makati an mga evidencia kan shabu lab case diyan sa Palta Small.

    Segun sa informante, igua na daang orden an juez sa PDEA na gibohon an pagdistroso ngonian na bulan.

    Bigyan si juez ng Tang-Inasal ni Buddy!

    Awat nang haloy na pigabantayan an warehouse ning mga pulis veinte cuatro oras cada aldaw magpoon pa kan 2016, an sueldo y overtime bayad kan publico (bako sana si Nestor). An pagcaon man daa cortesia kan mga manoc asin upon kan cagsadiri kan farm, masque daeng paisi.

    Mayad na mangyari na ini ta gusto na daang gibohon na pasogocan nin manoc an presenting barracks kan mga guardia civil tanganing iguang trabaho an nagretiro nang kafamilia kan farm owner.

    Macapahingalo na man an mga pulis na bantay….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs