By By qui Tang Tacio
Napan-o na ang boulevard sa Virac?
posted 19-Dec-2018  ·  
1,060 views  ·   0 comments  ·  

Nagkainitan na ang mga senador y congresista manongod sa pork barrel.

Matapos na kalkalon ni Lacson ang soboot bilyon-bilyon na fondong nakadalagan sa distrito ni GMA sa Pampanga y Rolando Andaya sa CamSur, nagbalos man an duwa. P1.3 billion man daang pondo para sa flood control projects an nakadalagan sa Sorsogon y Catanduanes na dae daa nakaisi an mga congressman caini.

Kung ano an kaluwasan caini, siguradong magakaarayusan man sana an duwang grupo ta parehong interesado sa deligenciang makukua sa mga fondong ini, puro sana sagin-sagin, he! he! he! Sabi ngani ni Erap kan panahon, weather-weather lang yan, he! he! he!

Bobowa an masabi na dae isi kan congresista an gabos na fondo kan mga agencia de gobyerno sa saiyang distrito, lalo na an DPWH, he! he! he!

Iyan an dahelan kung ngata an anti-corruption campaign ni Pay Digong dae maabante, hanggan sana sa mga ilid-ilid na kayang-kayang dacupon. An mga pating y balyena masakit na siloon kan Malacanang, he! he! he!

*****

Segun palan sa Republic Act 7941, an ley na nagtao kan reglamentos sa pag-implementar kan Partylist System sa Pilipinas, an cada rehistradong partylist organization dapat magsumitir nin listahan kan saendang mga nominado na dae mababa sa lima, kung saen kukuahon an matukaw na representante oras na manggana ini nin saro, duwa o tolong tocawan sa Kongreso.

Segun pa sa Section 8 kan nasabing ley, an sarong tawo puede sanang manominar sa sarong listahan. Entonces, sa saro sanang partylist.

An listahan daa kan mga nominadong ini dai dapat kabala an sisay man na candidato para sa elective position o sisay man na tawo na nadaog sa saiyang pagdalagan sa elective office sa ultimong nakaaguing eleksyon.

Sabi pa, daeng mangyayaring pagbabago sa listahan o sa pasurunod-sunudan kan mga ngaran, afuera n asana kung an nominado, matigbak, mag-atras nin pormal, o caya maging incapacitated.

Ini pasabot sana sa mga maboto sa partylist…

****

Gahagad nin tabang an Philippine Red Cross Catanduanes Chapter, lalo na an Emergency Response Unit (ERU), sa mga maayad-ayad na magdonar lamang nin mil ocho cientos pesos, na iyo an halaga nin pagpaeksamin kan dugo tanganing ligtas asin malinig ining maitao sa mga nagtitios na pasyente lalo na itong mga naaksidente.

An proyectong ini piglansar kan ERU ta naheling nindang golping naaksidente o naospital na daeng pambayad sa blood processing fee sa cada unit kan dugo na pangsalbar nin buhay.

Puede daang idara na sana an donasyon sa Red Cross headquarters diyan sa EBMC compound o sa BDO Remit, o caya apudan an ERU sa 09079338303 o 09178068528, hanapon si Joewi Ariate.

Mabalos sa saindong regalong buhay!

*****

    Ano daw lamang an aksyon na giniguibo kan DPWH regional office diyan sa daendatang trabaho kan contractor sa Imelda boulevard expansion project diyan sa Sta. Cruz sa Virac?

    Nangorngog na daa an mga ciudadanong nakaestar sa tampad kan proyecto ta baguig dae man pigatrabahuhan kan contratista, gakaralawang na an mga bakal na ikinahang sa dagat.

    Halos tolong bulan na daang daeng trabaho sa proyecto. Kang pagbuhos man daa kan concreto sa irarom kan dagat, baguing dae man ginamitan nin magkakanigong paagui tanganing an semento dae magbulag sa bato asin baybay.

    Marinas na an bagay na ini maipaabot sa mga nanunungdan, lalo na sa director kan DPWH Bicol o caya duman na diretso sa Ombudsman o sa 8888.

    Tibaad dae nang cuarta an contratistang taga-ibong ta naubos na kataoha bilang advance SOP sa mga buaya sa gobyerno, he! he! he!

    O tibaad tuyo man an estilong ini tanganing sa pag-abot nin  suoy na macusog, madari sanang marumpag an seawall. Entonces, hihingayadon na naman, cuarta na naman, he! he


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs