By By qui Tang Tacio
Gana an highest bidder sa DepEd?
posted 23-Dec-2018  ·  
894 views  ·   0 comments  ·  

Gana palan an mga highest bidder sa pagpa-bidding kan DepEd Catanduanes sa milyon-milyon na mga proyectong pahingayad kan mga manlaen-laen na escuelahan sa Islang Maogma.

Segun sa chismosong contratista na seguro dae naako an kadaogan, lima sindang nagbarali sa bidding. An saro tunay na taga-ibong, an duwa taga-ibong na ginamit sana an lisensya y an duwa taga-isla.

Sa saro sanang proyecto duman sa Mabini asin Tubli sa Caramoran na nagkakahalaga nin P3,188,389.00, an lowest bid isinumitir nin Jayro Construction and Supply na iguang bid na P2,355,327.30 o kabawasan na labing ocho cientos mil pesos.

Alagad an nanggana daa iyo an Duana Brothers Builders, Inc. na iyo an nagsumitir nin highest bid na P3,060,391.45, matad-an pa man an division nin ciento ocho mil pesos. An apat na kalaban caini anas nadiskwalipika por dahel ta kulang daa nin inaapod na Summary Sheet.

Segun sa reclamador, dae man daa an Summary Sheet na ini sa orihinal na bid requirements y nagulat na sana sinda kan hanapon ini sa mga document kan mga naderotang contratista.

Ngonian, dae ta man isi kung totoo ini ta dae man nin ipinaheling na reclamong opisyal an mga talunan. Cotana, kung iguang basehan an saendang reclamo, iguang surat na pinadara sa Bids & Awards Committee na an mga miembro anas man na mga toltol na opisyales kan DepEd division office.

Mga toltol man siguro an mga ingeniero na gakapot kan mga proyectos y bako man sindang arog kan iba diyan na mga adik sa cuarta y iyo na mismo an minacontrata kan mga proyectong sinda man sana an nagpreparar.

Bako man siguro ining mga parabulang na nakataya nin cien mil sa escuelahan ni Poroy (tabangan ning Diyos) o nasa listahan kan natokhang sa Campo Camacho.

Dati nang pigsahotan an ibang mga tawo sa DepEd na iyo an gaboot kung sisay an magana sa bidding y an mga habo magcooperar na mga contratista nagibohan nin paagui na dae maconsiderar an saendang mga hababang presyo. Inda kung totoo pa ini ngonian sa panahon ni Pay Digong.

Tibaad daa mga polpol man an mga nagpreparar kan mga documentos kan mga naderotang contratista y dae nareparong kulang palan nin summary sheet, kung ano man ini.

Kung ano man an mangyari sa mga reclamong ini, simbagon sana man ini kan BAC y kung isakat sa korte sinda man an manimbagan kung sala an saendang nagibo.

Sisay daw na derotadong contratista an mangahas?

*****

Pasensya an mga parabasa kung puro contrata an paghoronan na ngonian.

Diyan palan sa boulevard project ni Cong Cesar sa Sta. Cruz, bako man palan daa an nakalistang contratista, an GCI Construction, an nagtatrabaho sa proyecto. Ini daa pinabakal na sa sarong subcontractor na taga-Maynilang kayganda.

Harimbawang dos cientos milyones pesos an halaga kan proyecto, ibawas ngona an porsyento kan politico pati na mga ingeniero sa DPWH regional office. Entonces, kung diez porsyento an lagay, an matada na sana ciento otsenta milyon.

Bawasan pa man ini nin kita kan contratista, harimbawa veinte milyones man tanganing patas sana sinda kan mga mahabas sa gobyerno, an matada sa proyecto ciento sisenta milyon.

Ngonian magcacanigong maheling kan VACC, mga consumidor o sisay man na ciudadano an program of work kan nasabing proyecto kung puede pa ining mahaman sa halagang P160 million base sa reglamento kan DPWH sa klase kan materyales, halo kan concreto o paagui kan paguibo.

Guiromdomon tang igua pang isugpon dinding mga proyecto. Tibaad itao na naman sa mga daraculang contractor na taga-ibong tapos ipabakal na naman sa mga subcontractor.

Ano daw ta dae na sana ini pigatao sa mga local na contractor na igua man nin kapasidad y pareho man na gaduhor nin pahanglas sa politico y DPWH, y igua pang supog sa publico?


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs