By By qui Tang Tacio
Duwa sana ang Santa Claus na politico
posted 7-Jan-2019  ·  
566 views  ·   0 comments  ·  

Duwa sana palan an daculang politicong nag-Santa Claus kan Deciembre 25.

Segun sa mga nagribot na mga tawo hale sa bolod kan Virac asin kataraning na banwaan, an naabutan sana nindang mga harong nin politico na iguang nanaltag nin pang-Krismas iyo an qui Gob Boboy Cua y Manay Siliwong.

An mga harong ninda dating Cong Cotipyo y Manoy Hec, anas sarado, y an oficina man ni Cong Cesar sa San Vicente dae man nin tawo. Si Manoy Hec daa an tinawan sana mga capitan nin barangay sa Virac, tiglimang kilong bagas.

Qui Manay, igua man daang sardinas, noodles, pati calendaryo na may litrato ni Manay Siliwong kaibahan an enot na macuapo pati si PBM Tiptip y an agom. Dae man daa nagtagal an parataltag y an pinagpreparar na mga supot ta dae pa ngani alas diyes naubos na.

Duman sa pinakadaculang Santa Claus sa isla, inabot yata nin odto an pila kan mga naki-Krismas nin bagas sa Capilihan

Sa mga naglakaw nin harayo o kaya namasahe pa hale sa saendong mga banwaan, pagpasensyahan na nindo an mga dae nanao nin regalo. Tibaad naubusan ning sinsilyo, kulang sa praktis sa karate o kaya nakareserba na para ipanaltag sa Mayo 2019, he! he! he!

*****

Segun sa public (cabale si Nestor y familia), dapat daang reparohon kan reclamador bako sana an proyecto kan taga-ibong diyan sa pagpahalakbang kan Imelda boulevard kundi pati na an iba pang proyecto kan DPWH regional office.

Tibaad daa igua pang mga iba-ibang proyecto na tinao sa mga taga-ibong na contratista na sagcod ngonian dae pa nahahaman.

An mas delicado kung an mga proyectong ini ginibohan nan in cuarta kan sisay man na politico na nakakua na nin advance na komisyon. Maheling daa ini kung makakua an imbestigador nin kopya kan statement of accomplishment kan mga proyecto. Magayon daang maicompara an porciento na nakakahang sa report duman sa tunay na nahaman sa project site.

Harimbawang dacula an diferencia y mas halangkaw an pinagreport kan project engineer tanganing dacula an macubra kan contratista, posibleng kaso sa Ombudsman an resulta.

*****

Igua man palan nin diit na milagro an pagtakas kan detenido diyan sa Virac police station kan Kapaskuhan.

Sabi kan mga chismoso, dae man daa cotana makatakas si Herbe Marino kung dae ini pigtiwaraan kan sarong guardia, na an agom soboot kadugo kan detenido.

Ini daa an dahelan kung ngata nakaluwas sa carcel an suspechadong parapabakal nin shabu, lalo nan a nag-asegurar daa ini na dae siya madulag. Naheling pa ngani daa ining gakintid sa may likodan kan estasyon, pigamasidan an aaguihan.

Nagcaigua daa ining tsansa na makadara nin sarong pidasong dos por dos sa laog kan carcel, na iyo an ginamit ni Marino, katuwang an duwa pang detenido, para guaton an rehas para siya makaluwas.

Nakaabang na man palan sa luwas an traysikel kan ama niyang retiradong maestro kaya dagos sinda nakaviaje sa Cabcab kung saen duman sinda nagsakay sa demotor na bangka pa-Sabang sa Camarines Sur.

An consintidor na ama kinasuhan na sa Korte, alagad an duwang presong nagtuwang sa pagguat kan rehas baguing dae pa.

Iguang leksyon sa insidenteng ini.

Kung ika madulag paluwas sa isla, pirmi kang dakop kung dae kang kakomplot na autoridad. Hilnga itong mga Intsik sa shabu lab. Kung dae sinda pinatakas kan mga taga-ibong na pulis, papunta pa sana sinda sa Caramoan gahalat na cotana an mga pulis sa pier duman.

*****

    An maogma asin matoninong na Bag-ong Taon magdara ning kaginhawahan sa sainyo gabos!


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs