By By qui Tang Tacio
Kulang an interes kan mga jovenes sa SK
posted 20-Jan-2019  ·  
834 views  ·   0 comments  ·  

Maeleksyon na palan an mga miembros nin SK para sa mga vacanteng posisyon sa 138 na barangay sa isla.

Alagad baguing dae nacaisi an banwaan, lalo na an mga qualificadong magcandidato y magvoto sa special elections na pinaapod kang COMELEC.

Maguiromdoman na matapos an synchronized barangay and SK elections kan sarong taon, dacul na mga SK an bakong completo ta kulang an mga candidato. Igua ngani nin veinte unong barangay na saro sana an miembro, an solamenteng SK chairman.

Iyo ini an resulta kan SK reform law. Binawal an pagkandidato kan mga parientes kan mga eligidong opisyal, alagad hinari man an honorarium kan mga SK member.

Natural, kulang an interes kan mga jovenes na mag-miembro sa SK na an makinabang sana kan fondo iyo an chairman. Sabi ngani daa, pagaparasogoon palan sinda sa libreng mirindal sala mantang si chairman iguang honorarium, he! he! he!

Kung sa islang ini, halos quinientos an vacanteng posisyon sa SK, inano daw sa enterong otsentang provincia y mga ciudad sa Pilipinas?

Ano daw kung an pakandidatohon sa mga vacanteng posisyon na ini itong mga dae man gaescuela tanganing dae sinda magparatambay sa plaza, puedeng sugoon nin SK chairman o ni capitan maglabnot lamang nin aga-aga sa higad ning tinampo?

Kung cinco mil an honorarium nin chairman, bangaon na sana y iyo man an pagadiit-diiton kan mga SK member, pambakal nin tinapay o inumon kung Sabado, he! he! he!

*****

Afectado an campanya ni Gob Boboy Cua kan suspensyon nin anom na bulan na matapos pa sa Hunyo.

Dae na siya makagamit kan mga awto y tawo kan capitolyo sa paglibot-libot, bawasan pa kan panggastos sa krudo y gasolina.

Pabor sa saiyang kalaban na si Cong Cesar, na iyo an makinabang sa gabos.

An problema sana, baguing lalong nagkusog an suporta para sa suspendidong gobernador, lalo na itong dating gaduwa-duwa. Mahilig an mga Pinoy sa mga pigadaog-daog, lalo na ta pilang dekada nin hiling nin pelikula ni FPJ, he! he! he!

Sa saendang simpleng pagheling, dae man ning invueltong panghabon nin cuarta sa reclamo sa Ombudsman na soboot dinara sa Maynilang kayganda ni Rey Mendez caibahan an sarong daculang lalaking puti an buhok.

Sabi ngani kan mga contratista sa DPWH, dae man cabale sa contrata an arkila sa daga na totogdokan nin bunkhouse kan contractor. An igua sanang bayad iyo an gastos sa pagtogdok nin bunkhouse.

Segun sa saenda, kung talagang dapat pagpabayadon an mga contratista sa pag-gamit kan daga kung saen itogdok an bunkhouse, cotana daa kinasuhan man si Manay Siliwong ta duman mismo sa laog kan capitolyo nagtogdok nin bunkhouse an contractor nin convention center kan panahon.

Magayon na hapoton man an mga contratista kan DPWH sa boulevard expansion project kung sinda iguang lease contract sa paggamit kan espasyong tinogdokan nin bunkhouse diyan sa gilid kan boulevard. Cotana kasohan man an PPA o sisay man na kagsadiri kan boulevard.

*****

    Marinas man palan an duwang prusisyon kan Nazareno sa Virac.

    An naenot dae man nagbawas an mga devote, na sige an arapon nin panyo o tuwalya na ipahid sa imahen ni Hesus.

    An icaduwa, banggui na nakahale, cuntodo pa paputok, pigmisahan pa pag-abot caya matanga na nakaparibod an mga tawo. Pormal daa an mga nag-attender, daeng tawo sa itaas kan caro, lalo na ta nakabantay an mga padi...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs