By By qui Tang Tacio
Nagpaheling na nin orag an BANAT
posted 27-Jan-2019  ·  
741 views  ·   0 comments  ·  

Sa tolong partylist groups na taga-Bicol na gustong makakua nin mayoriya nin voto sa masunod na eleksyon, baguing an Barangay Natin an naenot na magpaheling nin orag.

Tadtad nin patalastas kan BANAT ang palabas nin GMA TV kan laban ni Pacquiao y Broner. Senyal ini na seryoso an familia ni Manay Siliwong sa pagpa-congressman kan aqui niyang si PBM Tiptip.

Harimbawang aduman sa cada intermission an advertisement nin BANAT, an gustong sabihon onceng vez nagluwas ini sa enterong doseng round na suntukan.

An cada treinta segundong advertisement sa GMA TV sa primetime show, na saro na an laban ni Pacquiao, maabot nin cabangang milyon an bayad.

Entonces, naggastos an mga Wong y an saendang partylist nin dae mababa sa P5.5 million, dae pa cabale an bayad sa paggibo kan advertisement lalo na an bayad sa artista.

Saarin man daw mapaheling nin orag an duwa pang partylist, an TGP y Ako Bicol na pareho man iguang perac?

*****

Baguing dae naisipan kan mga tawong nasa rikod kan kaso ni Gob Cua sa Ombudsman an posibleng pakidumamay kan tawo, lalo na mga votante, ki gobernador.

Segun sa mga iguang nanud-an sa ley, manipis an kaso laban qui Cua y pinilit sana tanganing maisyuhan nin suspension order bago pa man magpoon an election period.

An problema, dae man nakua kan kaso na paniwaraon an mga votante na dae na dapat iboto si Cua. Lalo lugod naging solido an suporta kan mga loyalist sa gobernador y an mga gaduwaduwa nagpaheling na kan saendang pag-anduyog, segun sa mga goslab nang observador nin politica sa isla.

Pati daa an pigdudahan kan campo ni gobernador kan nacaaguing eleksyon, nagsimpatiya sa nangyari saiya y nagpahayag na ning suporta.

*****

Bako man sana palan si Senior Superintendent Jonathan Panganiban an afectado kan balasa kan PNP sa Catanduanes sa dae pa naisihan na dahelan.

Segun sa huringhuding, apat pang opisyal an hinare sa isla y dinara sa ibong. An saro daa duman maretiro na caya natural na pinapahingalo na duman sa Camp Ola habang gahalathalat na maghare sa servicio. An tolo daa sinabod sa ibang lugar na dae isi kung ano an saendang ginibong sala, he! he! he!

Iyo ini an problema sa pulis o soldados. Kung saen ka isabod kan headquarters, masunod ka, dae puedeng magreclamo.

Caya ngani an sistemang ini pigasamantala man kan mga politicong nasa poder, lalo na kung harani na an campanya. Siempre, mas pabor sa politico kung kapot niya an mga alas, lalo na kung an mga ini iyo an mabantay sa dalan na aaguihan kan mga manaltag na Santa Claus sa Mayo, he! he! he!

Maganancia an politico ta an kalaban dae makapanaltag, mabenepisyo man an awtoridad lalo na kung dae na ireport sa campo an nakumpiskar na pangkrismas sa votante, he! he! he!

*****

    Iba na talaga an panahon ngonian.

    Caidto dae ga suspinde nin clase lalo na kung low pressure area man sana. Diit na uran, bako man na problema sa mga estudyante.

    An nabago ngonian, mas dacul nang uran an dara nin LPA arog kan nangyari kan Deciembre 28-29 na nagresulta sa pagbaha y mga tilis sa bilog na rehiyon.

    Caya dae mo man mabasol an PAGASA y an PDRRMC kung sinda magpaseguro sa pagsuspinde nin clase oras na harani na an LPA o barong-barong.

    An importante, dapat nabantayan ninda an sitwasyon kan panahon cada pirang oras.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs