By By qui Tang Tacio
Duwang kabayo na sana ang matada?
posted 3-Feb-2019  ·  
1,037 views  ·   0 comments  ·  

Ini daa an posibleng mangyari sa Marso pagpoon kan campanya nin mga candidato para sa tocawan na babayaan ni Cong Cesar.

An pagmate daa kan mga mayor na candidato, pati na an mga parabantay sa local na politica, dae na maabante an campanya ni dating Cong Cotipyo ta baguing dae man nin tawo, dae man ngani daa gapamiting kan mga lideres.

Posible daang mapinaw na sana ini sa Virac o kung mangyari man, magpadagos alagad para sana macua an votong madalagan qui Manoy Jorge kung si JAS makurambiste.

Segun pa sa sarong chismosong candidato, nagpamate na man daa si Manoy Hec na tibaad dae na magpadagos kan campanya, lalo na ta an kukuahaaan ninda ni Manay Siliwong nin voto iyo an Caramoran y Pandan. Posible daang magpa-reimbursar na sana ini kan saiyang gastos sa pagribot sa isla y panaltag sa mga lider o kaalyadong candidato.

Entonces, kung maatras si JAS y Manoc Hec, an matada na sana sa karera sa pagka-congressman iyo si Manay Siliwong y Manoy Jorge.

Ini an laban nin pinakamaperac na candidato kontra sa pinaka-qualificadong aspirante na igua man nin sadiring hinanapan. Helingon ta daw kung sisay an maglamang sa mga tawo paglaog kan kampanya.

*****

Bawal na palan mag-inom nin alak an mga pulis sa mga pampublicong lugar arog kan ARDCI, Sea Breeze, Reco’s, Kemji o Carrie’s.

Mas lalong bawal na maheling sinda sa Calle Mabole, ta bako sanang maripot na bote nin alak an piganamitan duman, he! he! he!

Dati nang binawal sinda asin sa mga opisyal nin gobyerno na maglaog sa mga casino.

Dae ko lang isi kung sinda bawal man magtocaw sa madyungan, tong-itan, pokeran, o bulangan, kabale na an Global.

Sa isla, dae man siguro ma-istrikto an PNP lalo na kung off-duty man si Pay y kaipuhan na pakaonon man nin masiram-siram an familia.

*****

Nangarasab palan si Bise Mayor Boroy duman sa Bato kan gibohon an Unity Walk y Peace Covenant Signing para sa mga candidato sa local na eleksyon sa Mayo.

Tinaboga daa kan bise an pulis asin Comelec sa soboot maanomalyang pagpa-eleksyon kan 2016, bagay na dae daa nagustuhan kan election officer y mga pulis.

Segun sa mga nakadangog, dae na daa cotana nagdiscurso sa tribuna si Boroy, ta parareho man gabos na candidato na nagbalga kan Omnibus Election Code kan nacaaguing pirilian, he! he! he!

Iyo ngani ini an diferencia kan mga covenant signing kan mga candidato, ta an may kaya sanang gumibo nin pagbalga kan election code iyo itong sobra an panggastos sa campanya. An mga daeng imo, dae man makabakal nin voto y dae man makabayad nin mga goons.

*****

Haen na an mga maorag na politico sa isla?

Porbahe niyo daw kabongaga an Philippine Ports Authority sa Tabaco ta igua naman nin ginibong makapatios sa mga biyaherong taga-isla.

Pinahare daa kan port manager an ticketing booth kan RSL, Bicolandia y Silangan duman sa laog kan passenger terminal y binary dindi sa iguang main gate.

Magpoon daa sa Viernes, Febrero 1, dae na palaogon an mga bus y van sa pier para magdiskarga nin pasahero.

An gustong sabihon kan PPA, mabarababa gabos magpoon sa gurang, aqui, omboy, pilay, buta o bados, bitbit an saendang magabat na bagahe, para magpila para sa saendang tiket sa lantsa. Dae pang pandong an pipilahan, caya aaldawan o uuranan.

Pakakua kan tiket, mabatlay pa terminal, guyod an mga bagahe ta habo na maggastos sa mga porter, papunta sa terminal tanganing magbayad nin terminal fee, maagui sa terminal nin dae masarong minute saka masakay sa lantsa.

Haen daw an satong congressman na iyo an chairman kan House transportation committee? Haen daw an gobernador na an familia iyo an cagsadiri kan sarong lantsa? Haen daw an mga alcaldeng nasanay na sa eroplano? Haen daw an mga bocal kan Sangguniang Panlalawigan?

    Habang dae pa gapoon an campanya y libre pa ang bayad sa buaaw sa tribuna, porbahe niyo daw tabi bag-ohon an katarantaduhan na ini sa PPA Tabaco. Ini kung igua pa kamong pagmaculog sa mga biyaherong taga-isla na daeng cuartang pambayad sa PAL o CebuPac.

    Igua pa kamong mahigit sarong bulan para gibohon ini. An dae maghiwas, mabawasan nin voto, sigurado y cierto….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs