By By qui Tang Tacio
Dae maatras si Manoy Hec, Cotipyo
posted 10-Feb-2019  ·  
938 views  ·   0 comments  ·  

Noarin man daw mahaman an widening project sa parteng Bigaa, Valencia y Sto, Domingo?

Baguing dae na man nin gatrabaho. Sabi ngani kan sarong reclamador, an sabi daa kan trabahador, dae na man gapadara nin materyales an contractor. Nangahoy na daa nin mga gamit nang retaso para pangtukod sa porma sa pagbuhos kan mga dae pa nahaman na drainage cover.

Sabi man kan DENR, sagcod ngonian dae pa nacompleto kan contractor an mga caipuhan para mataohan nin permiso an pagputol kan mga kahoy na nacaolang sa dalan.

Ano man daw an pigagibo kan mga taga-regional office ta sinda an gaimplementar kan proyecto? Sige sanang kubra ning deligencia?

*****

Dae man daa maatras si Manoy Hec y Cong Cotipyo sa laban sa pagca-congressman.

Ini an saendang mga anuncio sa publico (atang cabali si Nestor!) matapos na mapabaretang baguing dae na maabante an saendang campanya ta dae na naheling sa isla.

Sabi pa, padagos an pagribot ni JAS sa isla para magpaguiromdom y makahoron an saiyang mga dating tawohan. Dae daa siya mabitbit nin candidato para sa pagca-gobernador.

Ang osipon ni Cotipyo, baad igua daang gustong ipaatras siya sa laban. Dae sinabi kung sisay ini pero saro man sana an makinabang kung mawara siya sa karera, he! he! he!

Igua ogaring nin mga huringhuding na dae man daa nagpaapod kan saiyang mga mayor na lideres si Cotipyo y an trangkahan ngani kan harong sa Gogon pirming cerrado, he! he! he!

Sabi man ni Manoy Hec, seryoso siya sa saiyang kandidatura y peke ang balita na tibaad maatras na siya.

Kaipuhan niya daang magpirmi sa Maynilang kayganda por sobre sa saiyang mga contrata sa gobyerno y sa Marso 29 pa man an campanya. Sayang man daa an mga gananciang puede pang ipangdagdag sa natipon para sa eleksyon.

Marinas ining pigakalag an mga candidato kan mga chismis na sinda maatras na o caya gatinghak na an campanya. Hilinga si Manoy Jorge ta naghigos kan maisihan sa survey na harayo an baya saiya ni Manay Siliwong.

*****

Kung Hei Fat Choi!

Segun sa mga Intsik, taon ngonian ning mga orig. Caya palan dacul man na mga litsonon an nacalistang candidato sa Mayo, he! he! he!

Iguang mga mataba na, ta nasobrahan na ning unas sa bahogan, he! he! he! Igua man ning mga maniwang pa, ta dae pa nalugaran maghigop ning sagmaw, he! he! he!

Habang adyan pa sinda, dodoa niyo na ngona tanganing magdugo, ta sa Hulyo bawal na….

*****

Dae daa magngalas an mga parabatlay sa boulevard kung an naheling nindang nakatambak sa gilid kang boulevard anas mga dugui na iguang bato.

An mga panambak daang ini na kinua yata sa mga tilis iyo an ipantay diyan sa baldoza kan boulevard pakahari kang slab na luma, Bako man ini an ikahang na pundasyon sa dagdag na boulevard, kaya dae sana daa mahagas an mga residente ta bako man ining pambawi sa advance ning kung sisay na politico, he! he! he!

*****

    Sarong semana na sana, Valentine’s Day na. Mayad na an mga sobra sa saro ang nene o nonoy, mag-iskedyul kan saendang pag-ilaid tanganing daeng maputulan ning ikinabuhay o caya macaluwas sa mosquitero...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs