By By qui Tang Tacio
Bawal na ang mag-shorts sa CSU?
posted 10-Apr-2019  ·  
570 views  ·   0 comments  ·  

Bawal na palan daa ang mag-shorts sa laog kan CSU.

Ini daa an kapagbootan kan bag-ong amo ning mga sikyu diyan sa unibersidad. Gabos daang galaog na naka-shorts pigasabihan na sa otro magpantalon na. An enot daang nalasayan, iyo an mga contratista kan mga proyecto diyan sa laog kan CSU, ta an saendang mga trabahador dae na pinalaog ta naka-shorts, he! he! he!

Kung ano ang basehan kan chief sikyu, dae man ning sinabi an mga alipores caini.

Sabi ning tagalaog, dae man daang pinasatr na bag-ong palisiya ang Board of Regents. Lalo man na daeng pigluwas na reglamento an Civil Service Commission manongod sa pagbado ning shorts sa mga campus ning unibersidad.

Kung siring ang pagpasunod sa laog kan CSU, dacul an afectado.

Mamundo an mga machong para-jogging diyan sa laog ta dae na mabuhayan nin puting dugo pag daeng nasundan na maputing pata, he! he! he!

Ta bawal na mag-shorts, an gabos na makawat ning basketball anas na magamit ning jogging pants.

Pag-abot man sa mga beauty contest arog kan Ms. Intrams y Ms. Gay, gabos man na candidato y candidate nakapantalon, dae nang maheheling na mga sinsilyo sa bitis an audience, he! he! he!

Magayon caini, irecomendar ni chief sikyu sa BOR na bag-ohon na an uniporme kan mga estudyante tanganing bako sanang pata an itahoban kundi gabos na parte nin tawo na makapatagas nin carne, he! he! he! Puede siyang ipadara sa Middle East tanganing maghanap nin supplier nin burqa, he! he! he!

*****

Nagpoon na an campanya sa politica.

Adyan na naman an mga bobowaon, comediante, saginero, hamboguero, asin iba pang mga tawong an hanap man sana poder y deligencia, he! he! he! Bako man gabos, kaya bahala na an mga votante maghagay kung sisay an dapat pilion.

Kung iisipon kan cadaclan, lalo na kan mga nakasabot, dapat kaherakan an mga candidato, igua man nin imo o dae.

Ngonian na panahon nin pagharyaw sa votante, an gabos na mga para-solicit, lalo na itong mga solocit, an hanap mga candidato. Madara nin surat pirmado ni capitan, o sampulong tawo, kung dae man reseta nin doctor o caya bayadan na kung ano. Ipresentar sa candidatong dae macadulag y natural matao na sana maski diit ta masakit magsayuma ngonian na panahon.

Kung hababaw an bplsa, dae maantos sa ultima hora an cuarta. Kung hararom, mabawasan man an pambakal nin voto.

Atang nagbobowa na sa mga proyectong saiya daa alagad cuarta man sana nin publico (cabale pa si Nestor, tabangan ning Diyos), mabobowa pa otro na siya honesto, he! he! he!

Minsan matagas pa sa tsinelas ni Tanstep an karneng pulutan, masagin pang masiram ta masakit na kalaban an nakainon , he! he! he!

An marinas sana sa pagcandidato ta nabuhayan daa nin dugo, pirmi sanang makusog lalo na nakiabrasa. An iba nakanagbo ning langubo na carneng hilaw, kaya mariksi man sa hapiyap boda ilaid, he! he! he! Igua na ngani daang candidatong nadakop kan agom na iba man na voto an piga-asikaso, he! he! he!

Saro pa, an mga pandoc ngonian nin candidato dae na caipuhan ipaagi sa facial, ta baging lastiko. Minsam nauyam, alagad an pandoc naka-smile pirmi, kahuna mo puedeng utangan, he! he! he!

*****

    Nalubong na lamang ang sinabod na gadan duman sa Pajo, dae pa naresolveran an kaso caini.

    Segun sa mga pulis, habo man daa makicooperar an familia caini pati na an iba pang mga testigo.

    Segun sa osipon, dati daang NPA an victima, nagbaba y naging CAFGU. Kang magbaba man an kaibahan caini, inagda siyang maging courier nin shabu. Alagad nauyaman daa ini ta pirming nagastos an cuarta sa sugal.

    Kaya inapod daa ini duman sa may boulevard sa tampad kan junkshop, duman na pinukpok nin matagas na bagay. Aduman pa daa an birilog na dugo.

    Sinakay sa motor kan apat na lalaki gamit an duwang motor, binaryo sa traysikel asin dinara sa Pajo. Igua daang nakaheling caining traysiker driver man.

    Natakot daa an familia na baad makabali sinda sa kasong droga o kaya bueltadahan kan mga suspechado. Kung daeng testigo, tapos an kaso...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs