By By qui Tang Tacio
Narabya na an mga taga-Caramoran
posted 5-Jun-2019  ·  
598 views  ·   0 comments  ·  

Nagpalabas palan nin orden si DILG Secretary Eduardo Año na magpoon kan Mayo 10, 2019 dae na matao nin certificate of appearance sa mga local na opisyal asin mga empleyado na sige an viaje sa Maynilang Kayganda minsan daeng darang travel order sa alcalde, gobernador o Malacanang.

Naisihan na siguro kan DILG an paglamyerda kan mga local na opisyal, lalo na mga alcalde, na cada semana an sakay sa eroplano, para soboot maghanap nin mga proyecto.

Cadaclan pano kan mga opisyal na ini, igua nang harong, condo o negocio sa Metro Manila, caya an cada viajeng personal nagiging official travel ta apurado sana magpapirma sa DILG asin ibang oficina, he! he! he!

Pahayahay na sa Maynilang kayganda sagot kan local na gobyerno, nakapamasyar pa sinda sa mga aki o caya inakian, he! he! he!

Tangani sigurong dae makapandaya an mga viajerong ini, pasul-uton sinda nin cadena sa riog na iguang GPS y nagpapadara nin signal kung haen si alcalde o bise alcalde cada cinco minutos, he! he! he!

An madacop na nagbiglang liko, bungkal sa puesto, he! he! he!

*****

Duwa na palan an satong congressman.

Nag-aparecer sa National Board of Canvassers si dating Bise Gob Bong Teves matapos na matawan ning sarong tocawan sa Congreso an saiyang TGP partylist.

Nacacua ning labing dos cientos mil na voto sa enterongMi Pilipinas an TGP y an veinte siete mil caini pigcontribuir kan islang Catandungan.

Alagad, dae pa sigurado kung macatocaw si Cong Bong, ta baad daa iguang magreclamo por dahel ta bawal daang maging nominado an sarong dating candidato na nadaog sa nacaaguing eleksyon.

Harimbawa man na makaabot na sa Gatasang Pambansa an satong panduwang congressman, tibaad lamang na matapsikan man an isla sa pork barrel sa masunod na tolong taon y bako sanang sa Baras ipadalagan lalo na ta an saiyang aqui an nangganang alcalde.

An icaduwang partylist sa Islang Maogma, an Ako Bicol, nacacua nin tolong tocawan y an saro daa caini totocawan mismo ni Zaldy Co, an amok an SUWECO y Misibis.

Posibleng kung masiraman ini sa politica, macandidato man ining senador, lalo na kung madagos na an federalism.

*****

Sarong bulan pa bago mag-asumir sa puesto an mga bag-ong alcalde, igua na daang nagralampaw sa puesto.

Diyan sa Virac, amay na nagretiro an sarong opisyal, na habo na daa makitrabaho sa masunod na alcalde. Igua na man daang tinarangkas na mga job-order ta caipuhan daang dae na paghiwason an fondo para sa bag-ong administrasyon.

An mas daculang problema hahampangon kan mga empleyado o opisyales nin mga municipio na tunay na nangampanya sa mga nadaog na alcalde.

Dacula an posibilidad na sinda mangarigos nin moda sa enot na aldaw kan bag-ong hade sa LGU o caya guibohon na basurero o parasighid sa saod, he! he! he!

Alagad, igua man nin proteksyon an ley sa mga afectado kan mga detail order, bahala na an saendang mga abogado kung caipuhan an legal na aksyon.

*****

Narabya na an mga tawo sa Caramoran y Pandan sa manejamiento nin Dificelco.

    Segun sa mga reclamador, apat na aldaw na daa sindang tios nin voltaheng 110 sa laog  nin harong.

    Gakaralapa daa an saendang mga pagcaon ta dae man napaander an pridyider. Dae ca lamang daa macaparipot minsan iguang aircon, lalo na ngonian na mainit na panahon.

    An masakit pa, dae man daang halaga an mga hotline number kan cooperativa, ta dae man nakontak o caya daeng gasimbag.

   Inaapodan si GM Raul Zafe na aksyonan dagos an mga reclamong ini, na iyo ngani an mayor na isyung tinocar ni Cong Hector sa miting niya sa mga oficiales kan Dificelco kan Hueves.

    Magayon sigurong maguibohan nin paanos kan Dificelco na makanghan nin duwang modular genset an Caramoran-Pandan tanganing toltol na an corriente sa mga harong.

    Mapasobri man daa si Cong Hec nin daga sa Caramoran para istakan kan mga poste y materyales kan cooperativa. Ano daw kung isabay na sana an lugar para sa saday na power plant?

*****

    Dae pa palan naubos an cuartang pinanaltag kan eleksyon.

    Kulang pa an sila saod, senyal na habo pa maglawod an mga parasila ta igua pang pambakal nin agua de pataranta, he! he! he!

    Nagkaurubos pati daa an beer y softdrink sa Virac kan semana pacatapos kan eleksyon, he! he! he!


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs