By By qui Tang Tacio
HELP! HELP! HELP!
posted 10-Jul-2019  ·  
740 views  ·   0 comments  ·  

Kung GO SHINE VIRAC ang kurahaw kang administrasyon kan dating alcalde, ini man daa an mayor na programa kan torno ni alcalde Posoy na an pigaarogan iyo an BUILD, BUILD, BUILD ni Pay Digong.

Gustong sabihon, an gabos na nangangaipo nin tabang, puede nang magpunta sa municipio basta oras nin oficina. Siring sa panuga kan panahon nin campanya, veinte cinco mil an itatao sa mga familiang iguang nasuerohan sa ospital.

Inaapodan man an sisay na mahanap sa alcalde para maghagad nin tabang kung Sabado, Domingo o piyesta opisyal, na kung puede pang mapa-Lunesan, mas mayad tanganing dae man malugadan nin golpe an saiyang bolsa, he! he! he!

Cinco mil na man daa an nakatambak na application sa trabaho diyan sa municipio. Inda sana kung an gabos na ini maacomodar ta limitado man sana an fondo para sa mga job order na trabahador.

Mag-abot na sana sa tres cientos pesos cada aldaw, an ibabayad sa mga ini kung enterong macalaog, cabong-cabong na P1.5 milyon cada aldaw. Maorot an tesoreria sa kasusuweldo sa mga ini, lalo na kung an cadaclan adyan man sana sa de-aircon na oficina matambay.

Caya, pasensya an mga nagsumitir nin application kung enoton ngona an quinientos ngonian na Julio, quinientos naman sa Agosto, sagcod na matawan gabos nin torno sa maripot na oficina.

Masakit an maging alcalde, lalo na kung dacul an napanugaan kan panahon nin campanya. Caya satong saboton si Mayor Posoy kung sa mga enot na bulan, dae dagos matawan nin magcacanigong simbag an hagad kan mga tawo, lalo na itong nagtrabaho sa campanya.

*****

Habang aduman si Gob Boboy sa capitolyo para magsumpa sa posisyon na daeng tocawan, aduman daa si ex-Cong Cesar sa San Pablo sa pagbasbas kang bag-ong kapilya na saendang pinondohan kan tugang niyang si Jorge.

Habang gapaluwas nin culog nin boot an elegidong gobernador sa herodes na mastermind kan suspensyon niya sa puwesto, aduman daa ang ex-cong gapamibi sa kalangitan na sa 2022 tawan pa siya nin tsansa na makabawi sa saiyang kalaban, lalo na ta nalugadan.

Pasensya ngona an mayoriya kan mga votante sa islang maogma na por dahel sa kasong ginastosan daa nin diez milyones pesos, dae masusunod an saendang kagustuhan na an saendang padaba an padagos na magtukaw bilang gobernador.

Sabi ngani, ang buhay parang gulong, kung minsan naplatan, kung minsan nakarigis nin duhay, he! he! he!

*****

Iguang reclamo an mga saraday na contratista pati na an mga small-time na ganegocio nin graba y baybay.

Segun sa sarong kimotan na representante, dapat daang reparohon kan gobyerno provincial an salang gibo kan mga daraculang contractor na quarry permittee.

An pigagamit daang mga trak kan daraculang negocianteng ini bako na itong mga higanteng dumptruck na pigbawal na kan magcapirang barangay ta nacauyag nin tinampo. Mga saraday na sana daang trak an gadeliber nin graba y baybay sa saenda.

An problema sana, kulang na sukol o volume an delivery ta an gamit bako man apat na cubico kundi hababa pa sa tres cubico, alagad an presyo para sa cuatro cubico.

Cotana daa mas hababa man an bayad sa delivery kung bako man cuatro cubico an kaya kan trak na saday.

Ano daw kung matocar ini kan Provincial Mining Regulatory Board (PMRB) sa saendang masunod na miting tanganing dae na man magparangalabngalab an kimotan na paratienda nin baybay asin graba? Puede man siguro makialam an DTI ta tamang presyo ang invuelto…


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs