By By qui Tang Tacio
Dae nin kasong apurado
posted 24-Jul-2019  ·  
513 views  ·   0 comments  ·  

Parehong nadanyosan an campo ninda dating Congressman Cesar y suspendidong Gob Boboy kan nacaaguing semana.

Nadakop na enot an sarong casual na taga capitol na nagluwas nin caliber cuaranta y cinco sa VTC maaaga ning Sabado. Dati na daa ining nakulong ta inaponan nin granada an paykyuhan sa Ilawod pirang taon na an nacaagui. Napung-aw siguro sa caonon sa Muntinlupa, he! he! he!

Kinaagahan, sinalakay man kan mga pulis an harong kan soboot personal driver kan familia ni ex-cong Cesar, tolong pakete ning shabu an nakua na nagkakahalaga nin sisenta mil pesos. Dati na daa ining nasa listahan kan pulis sa illegal na droga alagad dae hiniwas sa rason na isi na kan gabos. Masakit man talaga an dae na sa poder, he! he! he!

*****

Pareho sigurong nagpadasal an mga water district sa Bato y Virac, pati na an Dificelco, caya nagsabod nin uran sa isla an Kagurangnan.

Alagad, isipon ta na an mga bagyo paminsan-minsan sana y igua pang vez na kung macusog ini matao nin daculang distroso sa mga linya nin tubig y corriente.

Apesar kan pagbayad kan bulanan na consumo sa tubig y corriente, obligasyon nin mga consumidor o saendang mga representante na reparohon an manejamiento kan water district o cooperativa.

Masakit ogaring ining gibohon, kung an mga director dae man nin kamatidan sa linaogan nindang trabaho o caya kiyom na an kimot pati an mata ta natahoban ning cuarta.

Deficil man kung an mga consumidor an magkaso sa manejamiento ta saen madisponer nin pambayad sa abogado. Dae man nin abogadong mapresentar lalo na kung daeng bayad.

Maghalat na sana kita kung ano an gigibohon kan satong mga elegidong opisyal, lalo na an gobernador y congressman, kung igua pa sindang pagmaculog sa banwaan pacatapos kan eleksyon.

*****

Nagpoon na palan an mga pasumpa sa PTA sa mga escuelahan.

Herac man kan mga naimbitaran na elegidong opisyal, lalo na an mga consejal sa onceng banwaan na dae pa ngani nakakubra kan saendang enot na sueldo sa municipio.

Daeng problema an mga alcalde, bise alcalde, bocal, bise gobernador, gobernador o congressman ta igua pang tada sa saendang caban pacatapos kan pamayad sa botante.

An mga consejal, natubis na an bolsa sa panaltag, caipuhan pang maghubon nin pandagdag sa fondo kan mga PTA.

Caya an mga alcalde dapat dae man solohan an mga proyecto sa municipio, tawan man an mga consejal tanganing dae man marogado. Masakit ang magkinuripot, madari madaog sa eleksyon.

*****

Tama an sinabi ni Pastor Efondo sa pamiting ni PBM Tanael manongod sa krisis sa corriente.

Lumang tugtugin na daa an mga paapod na consultative meeting o power summit. Oro-otro na sanang paapod, magpoon pa kan panahon ni Gob Dayunyor, Gob Boboy y Gob Siliwong, dae man sanang resultang magayon.

Kaipuhan daa ora-mismong solusyon, arogon an ginibo kan Bohol governor na kinasuhan an cooperativa. An hapot sana, an kaso sa ERC o kung saen man na corte dae man matao nin ora-mismong solusyon. Isi ta na an hiwas nin mga kaso daog pa an baoo sa daga.

An mga companya nin corriente maimo, makakua nin mga abogado de campanilla. Kung hiringmayan an laban, daog an publico (cabale an  mga eredero ni Nestor).

Kung makaso, magkaso na alagad bako sana ini an asahan. Maghanda sa mga masunod na eleksyon sa mga distrito tanganing makapili nin mga toltol na tawong dae mapadara sa politica o cuarta diyan sa board of directors sa Dificelco. Saro na sana an problema: kumbinsihon an mga votante na magvoto na daeng bayad…

*****

    Dae mo man mabasol an mga consejal sa tolong banwa kung nag-enroll sa masteral course kan PCL. Atang libre na, kaya pang tapuson sa laog kan termino. An problema sana, dae man naheling sa tinaposan an kapangganahan sa eleksyon, kundi sa pinatosan, he! he! he!

    Habang dae pang orden an COA sa pagrefund kan ginastos, magtipon-tipon na nin pambayad….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs