By By qui Tang Tacio
Ringaw na naman ang problema
posted 29-Jul-2019  ·  
454 views  ·   0 comments  ·  

Awat na palan daang target kan mga pulis ang nadakop sa soboot paratienda nin bato diyan sa Gogon, Virac alagad dae nakahiwas an mga ini por sobre ta iguang koneksyon sa politico.

Iyo man ini an realidad sa isla, an mga autoridad gahiwas depende man sa kung ano an koneksyon caini sa mga tawong nasa poder o an may sala iyo mismo an nacatocaw.

Masakit man baga talaga makalaban an tawong puede kang balosan, ta tibaad isabod ka na sana sa kung saen na destino, herac man an familia mo.

Hilnga itong solamenteng nagadan sa drug war uya sa islang maogma: taga-Davao daa, an caibahan sana an saiyang maestrang agom, daeng aqui, daeng koneksyon sa sisay man, nanlaban kaya nagadan, daeng witness kundi an mga nakabadil, daeng kaso.

Itong nadakop na mga goons na armado sa Bato, kaibahan sa convoy nin politicong candidato. Kulong an mga arkiladong goons, libredo an amo, he! he! he!

An mga nadacop na manaltag nin cuarta sa San Isidro Village, Virac, duwa sana an naposasan ta an ibang naglampaw sa kudal dae na binukod. Treinta y uno mil sana daa an darang perac sa van alagad an sabi kan mga nacaisi, labing saro may cabangang milyon an aduman. Dae na maghanap kan cuarta ta baad dinuhay na, aduman na sa septic tank kan cuerpo de policia, he! he! he!

Saro sana an dapat gibohon tanganing dae ka madakop nin autoridad: dae ka magibo nin sala. Kung ika dinakop na daeng sala, puede ka na maghuramentado…

*****

Ta asensado na an mga ciudadano sa Islang Maogma, labi na kaimportante sa mga negociante na magcaigua nin parking space sa saendang mga establisimiento.

An mga parabacal na iguang imo, natural mangahang sa hardware o tindanan na iguang darang awto. Kung an tindahan daeng maparadahan, mahanap an nin iba na iguang mapasibogan kan carruaje.

Hilnga an hardware ni Terencio, an Home Depot ni Napol, an Junction Hardware ni Nelson, anas nakaatras an mga edificio kaya malibyano an pagparada kan sasakyan.

An iba, maski ngani an mga hotel y saro sa duwang mall sa Virac, kulang sa parkingan, kaya an mga sasakyan nakaocupar na nin tinampo na nagiging dahelan kan trapik.

Magayon na ini maging leksyon sa mga engineering offices na iyo an nagpapasunod kan Building Code, na an gabos na establisimiento de negocio, opisina, y iba pang edificio na pigatogdok dapat magsunod sa parking requirement.

*****

Ngonian na sige na an uran, gaandar na an mga hydro power plant y igua nang gailig na tubig sa posit, tibaad ringaw na naman kan mga tawo an mga problemang dapat solosyunan.

Manongod sa corriente, pinapasumitir daa ni PBM Edwin Tanael an Dificelco, Suweco y Napocor kan saendang mga plano sa pagsolusyon sa power crisis sa laog nin treinta dias. Ito sana tabing pagsumitir an treinta dias, ta an solusyon tibaad abutan nin forever, he! he! he!

Diyan ta man maisihan kung an nag-alegar na gabayad na kita sa mga dae nahaman na hydro plant kan Suweco, masumitir kan saiyang naisihan pati an mga ebidensyang documento sa oficina ni bocal Edwin.

Kung ano an gigibohon kaini kan junta provincial, magiging pruweba sa mga votante kung toltol an mga naelegir nindang mga representante sa SP.

*****

Surumpaan na naman palan an mga opisyales kan PTA sa manlaenlaen na escuelahan sa isla, kaya galagade man an mga politicong elegido sa pag-acomodar kan imbitasyon kan mga opisyales.

Siertong presente an gabos na magurang sa okasyon na ini, nakabiste, mahamot y praktisado sa chacha.

Iyo man ini an solamenteng panahon na an gabos na magurang sa homeroom nagcontribuer kan kaipuhan sa induction o kaya nagbitbit nin pagcaon, inumon y pulutan.

Sa mga masunod na bulan bago magtapos an school year, cadaclan caini igua nang rayuma ta masakitan nang magbotbot sa bolsa nin pambayad sa PTA fee.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs