By By qui Tang Tacio
Pasarhan an mga sugal na iguang daya
posted 10 days ago  ·  
319 views  ·   0 comments  ·  

Nabigla an gabos na pinangaturogan maging milyonaryo kan mag-orden si Pay Digong na sarhan gabos na pasugal na kapot kan PCSO por sobre daa sa korapsyon.

Cotana daa, an pinatunong sana iyo an Loterya ng Bayan na iyo an nagsalida sa Small Town Lottery (STL), y iba pang kawat na lisensyado kan agencia arog kan Keno.

Kung kuarartahan an paghoronan, dae man daang daya an lotto draw ta naheling kan cadaclan y an bayad sa mga lottohan gaagui sa on-line computers.

An problema sa STL o Loterya, an gamit dindi papel man sana na puedeng dayaon kan operator. Cadaclan na vez, dae man pigadeclarar kan operator an tunay na ganancia kan sainyang pasugal, caya lugi an PCSO pati na an mga lokal na gobyerno na pigatawan nin share hari sa taya.

Posibleng naisihan na siguro ni Pay Digong na sigeng rayaman an mga opisyal kan PCSO, na an saro ngani daa igua nang daculang resort y mga awtong minilyon an halaga.

Kung an rason kan pagpadalagan kan STL o Loterya iyo na daogon an jueteng, madari man sana cotana gibohon ini kung toltol an pagdakop kan mga pulis sa illegal na pasugal.

Iguang deligencia sa jueteng, lotteng y iba pang pasugal caya an ibang makiperac na opisyal nin PNP dagos nabota y nabongog kung nakaheling nin illegal na pasugal.

*****

Sagcod sa ngonian, doseng taon matapos na gibohon soboot ni Mark Anthony Romero an primerong kaso nin panglupig, dae pa namidbid kung sisay an saiyang kaibahan na iyo an nagmaneho kan tricycle.

Igua man daang pigpangaranan an akusado alagad dae man daa namidbid kan ultimong victima. Harimbawang igua na an pulis kan ritrato kan lalaki, ano daw kung ipaheling man ini duman sa naenot pang nga victima tanganing magbiyo na sinda ni Romero sa carcel?

Segun sa mga impormasyon na sinaysay kan mga naenot na victima, si Romero man sana daa an naggibo kan panglupig y an drayber gaheling man sana.

Iguang posibilidad na an drayber na ini mas gurang qui Romero o caya iguang poder sa akusado caya nasugo-sugo sana. An cierto sa ngonian, habang sige pa an imbestigar kan mga pulis, iyo na an drayber uyag man an payo pareho ni Romero.

Igua man nin diferencia  an mga utak kan mga nagkasong mga victima na nag-ako kan plea bargain, pati na an mga pulis y piskal, ta dati na nindang isi an mga naenot nang kaso nin rape kan akusado.

Cotana, kung awat-awat an pagkakulong caini y duman sa Munti, posibleng dae naabuso an estudyanteng taga-Bato.

    Kung ika magurang kan victima, siguradong hahagadon mo sa gobyerno na padusahan nin kagadanon o caya putlan ning ikinabuhay an mga suspechado.

    Kung puede sanang putulon an mga guramoy caini saro-saro hanggan ituga an saiyang kaiba sa krimen, awat nang naresolbar an kaso.

*****

    Ngata daw ta nag-oho an capitolyo sa disenyo kan P37-million na evacuation center na soboot gigibohon kan NCRRMC sa Viga, Pandan y San Andres?

    Isi na man nindang dae matagar sa makusog na hangin an atop caining sim o yero.

    Cotana naghagad an capitolyo na an ipatogdoc sa isla iyo itong P50-million na evacuation center na an atop kongkreto.

     Kung dae na puedeng bagohon an gabos, daeng halaga an mga evacuation center na ini harimbawang magsilong an mga taga-baryo duman y naharian nin atop.

*****

    Igua daang mga bag-ong elegidong opisyal, lalo na sa mga municipio, na baguing nanarian kan saendang poder.

    Pati mga alipores, lalo na itong mga adviser na daeng katungdan sa municipio, nakialam na daa sa padalagan kan saendang amo.

    Magayon sigurong abisuhan man kan DILG officer sa municipio kung galampas na man sa saendang mandato an mga ini. Pabasohon ngona an enterong libro kan Local Government Code of 1991 tanganing maeducar...

0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs