By By qui Tang Tacio
Kaipuhan an deligencia sa capitolyo
posted 18-Aug-2019  ·  
418 views  ·   0 comments  ·  

Nakabangga palan daa ang bus na hinagadan ni dating Mayor Samuel Laynes kan nacaaguing semana.

Segun sa osipon, dae daa ining drayber kan mag-andar y banggaon ang kudal kang Virac Central Elementary School.

Kung sisay an drayber na itinoka kan bag-ong administrasyon, dae man sinabi.

Basta daa an sabi, bigla na sanang nag-abante an bus.

Tibaad basolon si defunto bise mayor Roy Laynes na iyo an nagmaneho sa bus, lalo na ta grabe daa an kulog nin boot caini sa mga kalaban kan saiyang tugang kan campanya.

Sabi kan mga nacaisi, saro daa sa mga ultimong pananaramon kan dating administrador iyo na sabihan an campo ni Mayor Posoy na tunongon na ang panguyag sa ngaran kan familia Laynes ta tapos na man an ralaban, nakua na ninda an hanap.

Maguiromdoman na manlaenlaen na panguyag, kabubuwaan y daeng mangyaring panuga an ibinungag kan mga kalaban ni alcalde Samuel, na dinamay pa an mga miembros nin familia.

Kung saarin mabolong an mga kulog na hinubon caini sa mga naafectaran, an Kagurangnan sana an makasabi.

*****

Mapoon na palan bago matapos an bulan na ini an icaduwang parte kan rehabilitasyon kan Virac public market.

Segun sa DPWH, cincuenta milyones pesos an nakatagamang fondo para sa pagparinas kan mercado (bakong si Orly). Matapos na man siguro an pagpatibay kan mga poste y baldosa sa lumang saod na macincuentang taon na ang edad.

Ipadagos man daa ini ni alcalde Posoy ta napun-an na. Igua pa daang tadang fondo na puedeng utangon sa Land Bank, base sa loan agreement na pinirmahan kan 2018.

Magayon sigurong mahaman ngona an mga stalls na babaryohan kan mga pinaharing mga market stall owners tanganing maayos na man an hiwas kan trapiko sa paribot kan saod.

*****

Iguang reclamador na nagpaabot nin mensahe para sa BJMP.

Segun sa saiya, ngata daa na an aqui niyang napreso hinahagadan nin imong pampadoktor kan mga guardia civil.

Naghagad daa an akusado na siya maki-plea bargain sa piskalya tanganing matapos na an kaso Alagad pinapabayad daa siya nin tres mil pesos para daa sa doktor. Kung sisay na doktor ini y aanohon an cuarta, dae man sinabi an reclamador.

*****

Nareparo daa kan mga chismosong paramasid sa capitolyo na igua nang mga pinahari sa BAC asin iba pang mga comitiva na mga tawo kan suspendidong gobernador.

Ini nangyari daa matapos na ikahang na bilang administrador an dating campaign manager ni Manay Siliwong.

Bagui daang mga tawo na ni Dayunyor Verceles an nacatocaw sa mga importanteng puesto sa capitolyo, preparasyon daa harimbawang dae na makavuelta an gobernador ta igua pa daang isang-at na kaso an dae naorian na derotadong kalaban.

Bako man siguro ining totoo.

Natural na sa nacatocaw, lalo na an mga adviser, na gibohon an gabos tanganing makakua nin mejoras sa mga transaksyon sa gobyerno. Ta kung dae mahingoha mag-agahid sa honasan, gutom an amo, he! he! he!

Saen makua nin ipanao sa mga oro-aldaw na gahagad nin tabang para sa lubong, lamay, compleanyo, viaje pa-Manila y iba pang mga agrangay kan mga votante?

*****

    An cadaclan nakidumamay sa familia Laynes, lalo na an nabayaan na agom y duwang aqui, sa amay na pagviaje sa kaitaasan ni dating bise mayor Roy Laynes.

    Veinte-unong taon na nagsirve sa municipio nin Virac an defunto, magpoon kan siya consejal hanggan makagraduar, maging bise hanggan makagraduar otro, y tolong taon bilang administrador.

    Anom na eleksyon na dae nadaog, senyal na midbid siya bilang honestong servidor nin banwaan, minsan nasobrahan yata nin pakihampang sa mga boltokerong mga votante.

    An saiyang nagin buhay sa politica magi man lugod panalmingan kan mga presenteng nacatocaw y mga ambisyosong maabot pa….


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs