By By qui Tang Tacio
Mga kalag na trabahador
posted 10-Sep-2019  ·  
544 views  ·   0 comments  ·  

Iguang ciudadano na naghahapot kung noarin madagos ang proyecto kan Bureau of Jail Management and Penology (BJMP) na bag-ong edificio kan Virac District Jail.

Dati nang nagpirmahan an BJMP y an municipio nin Virac kan nacaaguing taon mangongod sa pagbaryo kan jail hari diyan sa solar kan municipio. Duman na ini itogdok sa municipal nursery sa Calatagan Tibang na dati nang iguang building na pinondohan ni Senador Lacson kan panahon para gibohon na drug rehab center.

Kumpleto na man daa an papeles kan bag-ong presohan, magpoon sa deed of donation na pirmado nin alcalde hanggan sa resolusyon kan consejo municipal na mina-aprovar kan donasyon.

Sabi caidto kan dating amo sa BJMP, tolong milyon an halaga kan bag-ong presohan y an lumang building sa nursery iyo man an magiging oficina kan mga jail guard.

Awat nang hanap nin daga an BJMP na babaryohan kan mga preso diyan sa sorosoan na facilidad sa Virac. Maguiromdoman na an presohan na ini an puede sana macanigo treintang detenido sana. Ngonian an sobrang sanggatos na preso bagui nang sardinas, suro-salida sa pagkaturog.

Segun sa caribangbang na maitom an payo, igua na daang karatulang binogtak duyan sa kudal kan nursery sa Tibang bago pa magcelebrar nin kapiyestahan ni Nuestra Senora dela Asuncion. Aduman na daa sa tarpaulin an litrato kan gigibohon na edificio, Alagad bigla na sanang nawara. Igua yatang mga tawo sa lipod na nagtangkas sa karatula. Kung sisay y kung ngata ginibo ini, dae pa naisihan sa ngonian. Maghapothapot na kamo sa amo kan BJMP…

*****

Sa mga rinibong reclamador sa servicio nin corriente, magayon na macaisi kamo na ginibo nang permanente kan NEA si Engr. Raul Zafe bilang general manager kan Dificelco.

An basic salary ni GM cien mil cada bulan, kaya puede nang magreclamo nin pahingurag sa amok an Dificelco kung iguang biglaan na brownout, que sala nin SUWECO o Napocor o Dificelco.

Dahil caini, pinaparibod na man kan NEA an itinalagang project employee para soboot ayuson an cooperativa.

Sabi kan mga nacaisi, medyo magabat man daa sa daghan kan taga-NEA an paghari sa islang maogma lalo na ta libre an papa, libre pa an mamam, libre an travel caiba pa an panggastos sa caonan, iguang panggastos sa kusina sa estaran sa Dificelco, pati na an katabang na maluto y malaba. Nasiraman si Pay kang buhay libre, he! he! he!

*****

Sarong pilyong taga-Bato an nag-osipon na iguang nangyaring milagro dae pa sana naawat.

Nagpoon na daa cotana mahimsa an mga sogoc pakatapos panlakihan an bun-akan kan Hunyo, alagad nabugok an halos cabanga, he! he! he!

Segun sa mga osipon, nagtagama daa nin fondong tres cientos mil pesos an municipio para sa paglimpia nin mga canal y calle sa poblacion bilang preparasyon sa mga actividades kan kapiyestahan ni San Juan Bautista.

An trabaho gigibohon soboot kan mga residentes y iguang mga itinalagang makapot kan proyecto.

Alagad, habang sige an paluwas nin bayad an tesoreria sa mga hornal, nadiskubre daa na iguang nakahalo na mga kalag na trabahador. Dae man daa naheling na nagtrabaho o nagsogkod man lamang nin pala o sighed, Alagad nag-aparecer sa tesoreria para magkubra.

An problema, kan hapoton ini kung ngata makubra minsan dae sining-otan, nagkakak kan areglo sa bayad. Segun daa sa osipon, an mga kalag na hornal dadarhon an kinubra duman sa mga mastermind para sa barangaan. An para sa duwang aldaw itao sa multo, y an tolong aldaw na bayad aduman sa nagplano, he! he! he!

Mayad ngani daang mahinapot an mga taga-municipio kundi natabag an entering tres cientos mil. Igua pa man daang natadang labing cien mil caya ibinalik na sa caja de hierro…

    Dae man sinabi kang sehongan na ciudadano kung invuelto an mga taga-municipio sa pagplano y pag-implementar kan payroll padding na ini.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs