By By qui Tang Tacio
Milyonaryo na an mga paratienda sa plaza?
posted 24-Sep-2019  ·  
521 views  ·   0 comments  ·  

Maagui na daa sa second reading sa consejo municipal kan Virac an proponidong ordinansa na masingil nin bayad sa mga paratienda sa laog kan Plaza Rizal kung iguang mga espesyal na okasyon arog kan piyesta, Christmas Cheers, trade fair, exhibit asin iba pa.

Segun sa suhestiyon ni Consejal Rosie Olarte, an bayad para sa Cheers iba man compara sa trade fair asin iba pa.

An mga magiging bayadan iyo ini: special vending permit fee, sanitary permit fee, fire inspection fee, environmental fee, bayad sa consumo sa corriente, y garbage fee.

Entonces, ta sakop an halos gabos na okasyon, an mga kolektor nin tesoreria maribot na sa plaza para magtiket sa mga paratienda nin sitsiria, balloon, sigarilyo, mani, dolce, taho, ice cream, ice candy, pati tubig na bakong VIWAD kung iguang Christmas Cheers, trade fair, asin iba pang palabas.

Dae sinabi kung ngata dae kabale an campanya political, lalo na an miting de avance o rally. Tibaad dae magvoto an mga sisingilon na paratienda sa mga consejal na pabor sa ordinansa, he! he! he!

Caya iguang sanitary permit fee y fire inspection fee, caipuhan magpapirma sa plumber an mga matienda, mapa-inspeksyon pa sa bumbero, lalo na ta tibaad magkarabkatab an kahangan nin paninda na mga basket, nigo, styropor, careta o rolling store, he! he! he!

An pagmantenir kan kaparibotan sa plaza, na kargo kan municipio, gagastosan na kan mga paratienda sa plaza, na mabayad man kan garbage fee ta an pamatos kan saendang pagkaon an pigasabod kan gabakal na publico (cabale an mga macuapo ni Nestor).

Ta harani na an Todos Los Santos o aldaw nin mga kalag, posibleng dae na magpunta sa plaza an mga paratienda nin mga burak harimbawang maipasar an ordinansa ni Olarte.

Tibaad an pagtubod kan mga elegidong opisyal sa consejo golpi na an ganancia kan mga paratienda sa Christmas Cheers, pati na an mga rolling store o garibot nin nigo o basket nin sitsiria, balloon, sigarilyo, mani, dolce, taho, ice cream, ice candy o tubig.

Magayon na listahon na kan maafectaran na paratienda an saendang kita y gastos sa pirang oras nin ribot diyan sa plaza kung iguang okasyon tanganing maipaisi sa mga consejal pag-abot kan public hearing sa ordinansa. Dapat imbitaran man an BIR tanganing maheling kung puede pang pugaon an mga pobreng ini y maidagdag sa pambayad kan administrasyon ni Pay Digong sa mga utang sa Tsina, he! he! he!

*****

Eksperimento man sana palan daa an pagkahang nin mga NO PARKING na mga karatula sa toong parte kan mayor na kalye nin Virac.

Iyo daa ini an sinabi ni administrador Norlito Agunday sa committee hearing kan consejo municipal kan nacaaguing semana.

Pacatapos daa nin sarong bulan, sa maabot na kabang-an nin Septiembre, ibaryo na an mga karatula sa wala.

Kung ngata ta piga-eksperimentohan pa an parking sa Rizal Avenue, dae man nin pariwanag an administrador. Tibaad eksperimento man an gibohon sa pagpadalagan kan municipio, he! he! he!

Soboot, dae man daa nacaisi an consejo kung ano an plano kan administrasyon sa parking, ta an rason man sana sa ginibong no parking iyo an orden ni Pay Digong sa mga local na gobyerno na harion an mga nacaolang sa dalan.

Sabi ngani kan mga nagreclamong mga negociante, lugi an saendang mga establisimiento na kinanghan an tampad nin karatula ta an may darang sasakyan duman na sana mamakal sa ibang tindahan na puede parkingan an tampad.

*****

    Declarado na an state of calamity sa islang maogma dahil sa dengue.

    Caya puede nang gamiton an calamity fund sa campanya contra dengue.

    An importante sa panahon na ini, sigurohon na an cuartang gagamiton tama an papuntahan, bakong sa mga bulsa kan mga poderoso.

    Sabi ngani kan mga nacaisi, an pinakaimportante iyo an paglinig sa paribot tanganing mahari an mga pigasogocan kan mga namok, bako an pagbakal nin misting machine o iba pang gamit na puedeng papagcuartahan kan mga namok sa gobyerno...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs