By By qui Tang Tacio
Ang “oral terminator”, bow!
posted 26-Sep-2019  ·  
516 views  ·   0 comments  ·  

An cadaclan palan na mga casual sa municipio nin Virac magraduar na sa katapusan kan bulan na ini.

Tutukalan na daa ini minsan an iba sainda habo botsanan kan mga amo ta mga batid na sa trabaho.

Igua na ngani daang rinabnot na mga rescuer sa MDRRMO, pati an drayber kan ambulancia. An  mga isinalida daa basic sana an training, bakong arog kan mga sinalidahan na puede mo nang bayaan sa trabaho maski dae pagmanehohon.

Ito ngani daang drayber, nangahas na magviaje nin pasyenteng iguang helang papunta sa ciudad nin Naga, minsan daeng kaibang nurse na makasistir sa pasyente harimbawang iguang mangyaring daendata. Kung sisay man na amo an nagtugot caini, dae man sinabi, caya bahala na kamo magdiskobre, he! he! he!

Iguang bagong dies y sieteng mga casual sa rescue team, caya an sisay man na maaksidente o magpa-acuder, magdasal na sana na kung arin an gusto nindang grupo an magresponde, he! he! he!

*****

Ngonian, natural man ini sa bag-ong amo sa municipio na ikahang an mga gusto niyang tawo, lalo na kung rinibo an nag-aplay nin trabaho por sobre sa panuga kan campanya.

Alagad, igua man nin vez na dapat hilingon kung maninigo na sipaon an toltol na trabahador minsan nagvoto pa ini sa naderotang alcalde.

Segun sa mga huringhuding, an mga tatangkason pinadarhan daa nin listahan na an sabi terminated na sinda “in the exigency of the service,” he! he! he!

Sabi pa ngani, an gabos daang ini “orally informed” kan saendang termination, he! he! he!

Bahala na tabi kamo maghorop-horop kung tama ini, he! he! he!

*****

Herac man kan duwang nakalayang preso sa Bilibid na nakaabot na man cotana sa islang maogma.

Matapos mag-orden si Pay Digong na magsuko an halos dos mil na mga heinous crime convict na napalaya ni Faeldon dahil sa Good Conduct Time Allowance (GCTA), napilitan sindang magpaheling sa pulis para dae na hanapon.

Bako man sigurong mga mayaman an mga taga-islang ini na an dating trabaho parasira y parahag-ot. Imposible man na sinda nakatipon nin panglagay sa mga opisyales nin BuCor arog ki Mayor Sanchez o an mga taga-Cebu na nainvuelto sa Chiong case.

Kung an tuyo kan mga taga-BuCor iyo na bawasan an mga preso sa Bilibid, magayon sigurong mangutang naman si Pay Digong qui Xi Jin Ping nin duro-daculang cuarta para sa pagpatogdok nin mga regional prison o mga Bilibid sa manlaenlaen na rehiyon.

Mas pabor ini sa mga familia kan mga preso ta kulang an gastos. Harimbawa, an mga presong Bicolano diyan na dadarhon sa Albay. Madari sanang magviaje, dae pa mapan-os an rinutong caldereta o inun-on na ipakaon sa mahal  sa buhay na nakulong.

Haen daw si Manoy Hector o si Cong Bong tanganing sinda an magproponir sa Congreso?

*****

Kung paranoan na an EBMC y ibang ospital nin gobyerno kan mga pasyente se dengue, mas dacul daa an mga iguang dengue sa mga oficina nin gobyerno local.

Segun sa survey kan mga municipio pati provincia, cadaclan daa kan ginatos na casual o job order na empleyado kan cada LGU mga dengue-bo. An mga ini maheheling mo nakatindog o nakatukaw sa oficina, kapot an saendang mga cellphone o nakanganga sa computer habang ga-facebook o gakawat nin kung ano. An iba ngani daa igua pang sadiring mga kubo na pahayahayan, he! he! he!

Sabi pa kan mga eksperto, mas dacula daa an nawawarang cuarta ni Juan dela Cruz sa mga dengue-bong ini kaysa mga pigabolong na kinagat nin Aedes aegypti, ta an mga pasyente ginastosan kan saendang mga famila.

Sa ngonian, dae daang bolong an saendang helang, afuera na sana kung palayason “in the exigency of the service,” he! he! he!


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs