By By qui Tang Tacio
Sayang na helang nin mga orig
posted 1-Oct-2019  ·  
533 views  ·   0 comments  ·  

Nagpaluwas na palan nin orden an capitolyo laban sa African Swine Virus, na ngonian aduman na sa Metro Manila y kataraning na provincia.

Daeng bolong an virus na ini nin orig, dae man nin bakuna laban dindi. Oras na maolakitan an hayop, ciento por cientong matigbak.

Sayang na daeng virus na arog caini na puedeng makaolakit man sa mga mahabas sa gobyerno, lalo na an mga pulitikong halaba an mga kamot, he! he! he!

*****

Ngonian, importante na masabotan nin publico (pati an mga macuapo ni Nestor) na an virus dae man nakaolakit sa ibang hayop, lalo na an tawo, he! he! he!

Segun sa autoridad, dae pa man nakaabot an ASF sa rehiyon ning mga Bicolano caya ligtas pa kita.

An problema, an mga viajerong hari sa mga lugar na iguang ASF, lalo na itong mabalon nin pagkaon na posibleng dara an helang o caya nakatungtong sa lugar na iguang virus.

Sagcod caso sarong semana, an aeropuerto sana an iguang footbath o daculang tungtungan na iguang kemikal na makagadan nin virus. Sa duwang pier dae pa man, caya posibleng kung iguang dating parabono o gaalaga nin naolakitan na orig duman sa Payatas o sa Rizal na nagparibod sa isla, bitbit niya na an ASF.

Saro pa, sa kahinalabaan kan baybayon kan Isla Maogma magpoon Virac hanggan sa Caramoran o Pandan, nunca ini entero mabantayan kan mga autoridad cada oras laban sa mga ismagler nin orig.

Guiromdomon tabi na an live weight nin orig satuya minaabot na sa ciento veinte pesos cada kilo, mantang an live weight sa ibong lalo na sa Camarines Sur noventa pesos sana an kilo.

Caya ngani halos cada semana, iguang trak na minaabot sakay kan RORO na an karga labing treintang orig na pinapabakal sa saod nin Virac, San Andres, Bato o kung saen pa, cabale na an mga paratienda nin carne (dae cabale an Calle Mabole) sa gilid-gilid.

Sabi ngani kan mga nacaisi, igua pang gaabot na mga orig sakay nin demotor na bangka na gaduong sa mga baybayon kan Virac, bitbit an mga orig na dae maagui nin inspeksyon ta habo magbayad an cagsadiri nin taripa sa carne.

Igua na ngani daang kahagadan an sarong paraataman nin orig na mag-imponer na ipagbawal na an paglaog nin buhay na orig y mga productong iguang carneng orig sa isla.

Marinas na pag-isipan nin husto an bagay na ini, lalo na ta dae pa man nin ASF sa Bicol. Tibaad mangyari ini, lalong matios an banwaan, ta an mga presyo nin pagcaon na bakong orig lalo man na mahalangkaw…

*****

Minsan daeng mangyari sa anuman na gibohon ni Gob Cua sa Court of Appeals, lalo na sa desisyon caini sa kaso ni Nueva Ecija Governor Umali, an importante maipaheling sa mga tawo kan isla maogma an inhustisya kan ginibong suspension sa saendang gobernador y sa mayoriya kan mga votante.

Si Umali dinismis sa puesto y binawalan pang makabalik sa anuman na puesto sa gobyerno magpoon pa kan 2016, mantang si Gob Boboy sinuspinde kan walong prosecutor sa Ombudsman magcapirang bulan sana matapos na kasohan siya sa parking lot, an sentencia binaba pa pirang aldaw bago magpoon an campanya political.

Si dating congressman Umali kinasuhan dahil sa PDAF scam, si Cua kinasuhan dahil sa paggamit soboot nin parking lot na bako man siya direkta an gamaneho kundi an tesoreria.

Haen an hustisya dindi?

*****

Sa laog nin duwang semana, tapos na an enot na sanggatos na aldaw kan satong mga lideres sa mga municipio y provincia.

Sa gabos na naelegir na bossing kan nacaaguing eleksyon, solamenteng si Gob Cua sana an exempted sa pag-report kan saendang naguinibohan sa panahon kan saendang pagtukaw sa puesto.

    Mantang igua pang panahon, maglista na an mga alcalde kan saendang mga nahaman sa first 100 days tanganing maisihan man kan banwaan. Inano man ini kadiit, inano man kasakit sa kung anong dahilan, dapat ipaheling kan naelegir kung haen na siya sa saendang pagsunod sa ipinanuga kan campanya...


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs