By By qui Tang Tacio
Nagputol nin kahoy na daeng permiso
posted 28-Oct-2019  ·  
333 views  ·   0 comments  ·  

Nagkulog an boot kan magcapirang mga taga-San Pablo sa Virac matapos na sapoon kaputula kan mga taga-municipio an sarong kahoy nin avocado na soboot labing cincuenta años na.

Segun sa mga nagmuromuto, road clearing operation daa ito kan municipio bilang pagsunod da orden kan DILG na haleon an mga nakaharang sa kalyeng aguihan nin mga vehiculo.

Dae man daang kuwestiyon kung ini an saendang tuyo alagad ngata daa ta basta na sana puputolon an kahoy.

Segun sa saenda, sakop pa man kan reglamento sa pagputol nin anuman na kahoy an municipio, pati na an mga tawo caini sa engineering office o anuman na task force, pati an mga alalay na pulis.

Kung an DPWH ngani dae puede magputol nin kahoy na nakaolang sa national road na daeng permiso kan DENR, an municipio dae man puedeng gibohon ini.

An reglamento kan DENR, kung an sarong kahoy labing cincuenta años na, puede na ining ideclarar na heritage tree y dae na ini puedeng hiwason sagcod na ini tumbahon nin bagyo o malapa.

Kung an mga nakinabang sa bunga kan avocadong ini dae matunawan kan saendang kulog nin boot, marinas na isihon sa municipio y sa pulis kung sisay an nag-orden naputulon an kahoy pati na an mga nagputol caini tanganing makasohan nin pagbalga sa Forestry Code.

*****

Mangalabngalab daa ngonian na Miercoles si alcalde Posoy Sarmiento nin Virac sa saiyang mga naginibohan sa laog nin sanggatos dias matapos magtucaw sa puesto.

Magayon na an gabos na Viracnon, nagvoto man saiya o dae, magdangog sa saiyang magiging pahayag sa direksyon kan saiyang administrasyon.

Bako man sanang pagbogtak nin “no parking” na mga karatula an nahaman ni Posoy, igua pa man sigurong marinas na mga proyecto na dae sana naipublicar kan saiyang mga alipores.

Fecha ocho nin Oktubre an ika-100 na aldaw Alagad minawot kan alcalde na ngonian na a-nueve gibohon an saiyang report ta compleaño niya.

Kulang an mareclamo sa diit niyang accomplishment sa panahon na nag-agui, lalo na kung an mga madangog pano man an kimot, he! he! he!

Sabi ngani kan mga alisto sa psychology y negocio, an mga pagpa-oho daa sa daraga mas madari kung ipaagui sa hampangan nin caonon, siring man sa pagpirmahan sa contrata.

Iyo man ini an pagtubod nin mga mahabas na gusto makalaog sa sarong harong: an mga bantay na ayam dae malayat kung iguang naakab na tol-ang, he! he! he!

*****

Magayon nang pasyaran an playground na tinogdok diyan sa laog kan capitolyo sa tampad kan Hall of Justice.

Maogma an mga aqui na magkawat sa lugar na naparibotan nn mga daraqculang estatwa nin mga action figure sa pelikula o comics arog ninda Iron Man, Batman, Spiderman asin iba pa.

Pakimaherak sana sa mga mahilig mag-selfie, bawas-bawasan an pag-post sa facebook ta tibaad mahiling kan Marvel Comics y iba pang maysadiri kan original rights sa cartoon characters na ini, tibaad daeng permiso an Marvel sa paggamit kan mga character sa sisay man na supplier kan mga rebulto.

Noarin man daw ikahang an mga rebulto kan mga Pinoy superheroes arog qui Darna, Lastikman, Astrobal, Captain Barbell, Ang Panday, Dyesebel, Bernardo Carpio, Enteng Kabisote, Galema, Kapitan Kidlat, Kulafu, Leon Guerrero, Machete, Mang Kepweng, Palos, Pedro Penduko, Petrang Kabayo, Agent X44, Siopawman, Totoy Bato, pati na si Zuma?

*****

    Sa aga iyo an ika-25 na aniversaryo kan pagka-obispo ni  Monsenyor Manolo delos Santos.

    Iguang misa alas nueve nin aga na soboot pangengenotan kan Papal Nuncio Gabriel Caccia kaibahan an halos veinteng Obispo asin mga kapadean diyan sa cathedral kan Inmaculada Concepcion.

    Pacatapos kan misa, iguang grand agape sa plaza. Imbitado daa an gabos maghabhab kan mga hinanda kan mga relihiyoso. Bawal magdara nin supot. An madacop, putol an camot, he! he! he!


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs