By By qui Tang Tacio
Kulang sa imahinasyon
posted 15 days ago  ·  
252 views  ·   0 comments  ·  

Magayon an naging selebrasyon kan ika-veinte cincong anibersaryo kan pagkabogtak bilang obispo ni Monsenyor Manolo.

Lo mismong ang Papal Nuncio Gabriele Giordano Caccia, ang presidente kan Catholic Bishops Conference of the Philippines (CBCP) na si Bishop Romulo Valles y an Arsobispo kan Nueva Caceres Archbishop na si Rolando Tirona an nag-abot kaibahan pa an labi pang treintang Obispo, mga kapadian y mga madre an nag-abot para mag-atender sa misa y programa sa plaza.

Aduman man si dating senador Kit Tatad, Cong Hector Sanchez, Cong Bong Teves, Acting Gob Shirley Abundo, dating Cong Cesar Sarmiento, mga bocal y consejal asin iba pang mga opisyales.

Pasado alas dose na natapos an misa, lalo na ta mas halawig an orapronobis kan mga politicong nacatocaw sa pag-omaw qui Monsenyor Manolo, he! he! he!

Habang ga-misa, nag-brownout alagad daeng nagkurahaw nin “Hector!!!”.

Kung ngata nagkadiperensya an corriente, dae man nagsabi an Dificelco. Tibaad dae naimbitaran sa comitiba kan mga kagamohan, he! he! he!

*****

Gahapot an cadaclan na taga-isla kung ngata pinaguntingan ni Acting Gob Shirley an mga acacia sa gilid kan capitolyo.

Ata daang iguang pandong an mga tawong galakaw o gahalat nin sakayan, haharion. Bako pang marinas an pakabawas kan mga saka, nagkabarari ini kaya dae na puedeng pinturahan tanganing dae malapa an afectadong parte.

Bako man daang proyecto ini kan DPWH, ta hinagadan man sana sinda nin asistencia kan capitolyo sa paghakot kan mga natakdag na sanga. Kaya bako man an tuyo kan pagtabas iyo na haleon an anuman na harang sa kalye, ta an sanga asin dahon nasa itaas man.

Dae man siguro ini makaolang sa mga carosa na iparada sa Catandungan Festival. Kung siring, sala na an mga acacia an pakialaman. Segun sa reglamento, an pinakahalangkaw na vehiculo o karga caini na puedeng mag-agi sa tinampo nacional hanggan catorce piye sana o 4.27 metro.

Ta bako nang magayon na paghelngon an kahalabaan kan cudal kan capitolyo, an mga turistang makua nin litrato sa festival duman na sana sa ibang lugar magposing.

*****

Dae man palan nagtao nin report sa first 100 days si Mayor Posoy kan Virac.

Segun sa DILG, hanggan Oct. 9, solamenteng si Mayor Paolo Teves sana kan Baras an pormal na nag-report sa banwaan kan saiyang naginibohan pati an saiyang mga plano sa masunod na mga taon.

Dae man sinabi kan DILG kung ngata habo o dae nagreport an ibang mga bossing sa municipio.

Segun sa mga chismosong paramasid sa politica, posibleng nasupog an cadaclan na kulang pa an nahaman sa puesto, natakot na hagadan kan saendang mga panuga.

Kulang sana sa imahinasyon an mga ini.

Helingon mo sa Virac, an mga job-order na empleyado ni Mayor Posoy uminabot sa quinientos, mas dakul pa sa tres cientos na casual kan DPWH.

Segun sa mga taga-tesoreria, an gastos cada bulan para sa mga casual kan municipio tres milyones pesos.

Puedeng sabihon kan alcalde na an saiyang nahaman pagtao nin employment sa ginatos na mga aplicante, minsan an cadaclan kan mga ini nasa oficinang de aircon kapot an mga cellphone habang nanukawan, he! he! he!

Natural, an cuartang ining tres milyones cada bulan gagastoson kan mga casual y makadagdag sa local na ekonomiya. Iyo man ini an efecto kan pagpagibo kan ginatos na caratulang “no parking,” mayaman an paragibo nin tarpaulin, he! he! he!

Kung hanapan man nin proyecto si Posoy, ilista niya an mga nahaman na mga proyectong pinun-an kan dinaog niyang alcalde, dae man nin mareclamo kundi an ex-mayor, he! he! he!

*****

    Kung pirming nasa isla si dating Cong Cesar, an tuyo man sana caini dae siya maringwan sa 2022, lalo na kung dae maotob ni Cong Hector an saiyang mga panuga. Depende man ini kung balosan man siya kan mga nagvoto qui Gob Boboy.


0 comments
new to catanduanestribune.com?
connect with us to leave a comment.
connect thru
Cancel
Cancel
Cancel
Other Isip-isipon Ta articles
home home album photo album blogs blogs